Nahapusan ka bala magtuman kanday Nanay kag Tatay mo?— Mabudlay gid man kon kaisa. Kabalo ka bala nga si Jesus matinumanon gid kay Jehova kag sa iya nanay kag tatay?— Ang iya halimbawa makabulig sa imo nga magtuman sa imo nanay kag tatay bisan pa mabudlay. Istoryahan naton subong ang parte sa iya.

Antes si Jesus nagkadto sa duta, didto sia sa langit upod sa iya Amay nga si Jehova. Pero may nanay kag tatay man si Jesus diri sa duta, nga amo sanday Jose kag Maria. Bal-an mo bala kon paano sila nangin ginikanan ni Jesus?—

Ginkuha ni Jehova ang kabuhi ni Jesus sa langit kag ginsaylo ini sa tiyan ni Maria, para matawo si Jesus kag mabuhi sa duta. Milagro gid ini! Nagdaku si Jesus sa tiyan ni Maria pareho man sa pagdaku sang iban nga bata sa tiyan sang ila nanay. Mga siam ka bulan sang ulihi, natawo si Jesus. Gani, si Maria kag ang iya bana nga si Jose nangin mga ginikanan ni Jesus diri sa duta.

Sang 12 pa lang ang edad ni Jesus, may ginhimo sia nga nagpakita nga palangga gid niya ang iya Amay nga si Jehova. Natabo ini sang si Jesus kag ang iya pamilya naglakbay sing malayo pakadto sa Jerusalem para sa Paskua. Pagpauli nila, inayawan sanday Jose kag Maria pangita kay Jesus. Bal-an mo bala kon diin sia?—

Nagbalik dayon sanday Jose kag Maria sa Jerusalem para pangitaon si Jesus. Nagalalain na sila kay wala gid nila sia makita. Pero pagligad sang tatlo ka adlaw, nakita nila sia sa templo! Bal-an mo bala kon ngaa ara si Jesus sa templo?— Bangod makatuon sia didto parte sa iya Amay nga si Jehova. Palangga gid niya si Jehova kag gusto niya matun-an kon paano Sia mapalipay. Bisan sang daku na sia, pirme gid si Jesus nagatuman kay Jehova. Nagatuman sia bisan pa mabudlay ini kag kinahanglan sia nga mag-antos. Gintuman man bala ni Jesus sanday Jose kag Maria?— Huo, nagtuman sia siling sang Biblia.

Ano ang matun-an mo sa halimbawa ni Jesus?— Dapat mo tumanon ang imo mga ginikanan bisan pa indi ini mahapos kon kaisa. Himuon mo bala ina?—