La Bambouseraie—Isa ka Damgo nga Nagmatuod

SANG KORESPONSAL SANG MAGMATA! SA PRANSIA

SANG nagligad nga halos 150 ka tuig sa bagatnan sang Pransia, ginsugdan ni Eugène Mazel, isa ka importador sing mga rekado sa Asia, ang nangin pinakadaku nga talamnan sang semilya sang kawayan sa kalibutan, nga may halos 200 ka baridad sining madasig-magtubo, madamo-sing-magamitan nga hilamon. Tubtob sang 1855, ang ambisyon ni Mazel nabalabagan sang isa ka daku nga balagbag: Ang kawayan wala anay nagapamuhi sa Europa.

Napaslawan ang mga pagtinguha sa pagpasulod sini nga hilamon gikan sa Asia. Bisan pa nga mapag-on ang kawayan sa ginatubuan sini (ang pila ka sahi sini sarang mabuhi sa manubo nga temperatura nga-24 degrees Celsius kag nagataas tubtob sa 5,000 metros), imposible mabuhi ang mga gamot sini sa malawig nga paglakbay tabok sa mga kontinente. Apang, sang may mas madasig na nga mga barko, madinalag-on nga napasulod ang mga ispesimen sang kawayan sa Inglaterra sang 1827 kag, sang ulihi, sa Pransia. Malapit na magmatuod ang damgo ni Mazel!

Ang masunod nga hangkat kay Mazel amo ang pagpangita sing nagakaigo nga lugar nga mangin talamnan sang semilya. Sang 1855 ginbakal niya ang 33.6 ka ektarya nga propiedad malapit sa Anduze, sa bagatnan sang Pransia, nga may klima sang Mediteraneo kag may nagakaigo nga duta. Kinahanglan ang daku nga pagpangabudlay agod mapasulod ang tubig halin sa malapit nga suba. Apang nagmadinalag-on ang maukod nga mga panikasog ni Mazel.

Sing makapasubo, sang 1890, naputo si Mazel kag napilitan nga ibaligya ang iya hamili nga hardin. Apang, sing makalilipay, ginpadayon sang iban ang iya nasugdan, amo nga kada tuig karon ginaduaw sang ginabulubanta nga 350,000 ka tawo ang La Bambouseraie—ang damgo ni Mazel nagmatuod.

[Ginkuhaan sang laragway sa pahina 31]

Tanan nga larawan: La Bambouseraie de Prafrance