Ang Pagtamod sang Biblia

Matuod nga Pagtuo—Ano Ini?

“KON WALA SING PAGTUO IMPOSIBLE NGA MAPAHAMUT-AN SIA SING MAAYO, KAY SIA NGA NAGAPALAPIT SA DIOS DAPAT MAGPATI NGA AMO SIA KAG NGA SIA ANG NANGIN MANUGPADYA SADTONG HANUOT NGA NAGAPANGITA SA IYA.”—HEBREO 11:6.

ANO ang pagtuo? Ginapaathag sang iban ang pagtuo subong relihioso nga pagpati sa Dios nga wala sing mabakod nga pamatuod sang iya pagluntad. Ginpaathag sang Amerikano nga dyurnalista nga si H. L. Mencken ang pagtuo subong “isa ka di-makatarunganon nga pagpati sa indi mahimo matabo.” Amo bala ini ang matuod nga pagtuo nga ginalaragway sa Biblia? Kinahanglan ang maathag nga paghangop sa kon ano ang pagtuo bangod, subong ginbalikwat sa ibabaw, ‘kon wala sing pagtuo imposible nga mapahamut-an ang Dios.’

Ang Biblia nagasiling: “Ang pagtuo amo ang pagpat-od sa mga butang nga ginalauman naton.” (Hebreo 11:1, The New Testament in the Lan­guage of Today) Busa, napasad ang pagtuo sa sibu nga ihibalo, mga kamatuoran nga sa sini mahimo ipasad ang husto nga mga desisyon. Nagakinahanglan ini indi lamang sing pagpati kundi sing rason sa pagpati.

Sa pag-ilustrar: Ayhan may isa ikaw ka abyan nga tuhoy sa iya makasiling ka: “Nagasalig ako sa sina nga tawo. Makasalig ako nga tumanon niya ang iya ginasiling. Nahibaluan ko nga kon may problema ako, magabulig sia sa akon.” Masiling mo ayhan ina sa isa nga nakilala mo sa isa pa lang ukon duha ka adlaw? Dapat isa sia nga napamatud-an na niya ang iya pagkamasaligan sing madamong beses. Dapat kaanggid man sina ang relihioso nga pagtuo, nga dapat magpatubas sing paglaum kag pagpati nga napasad sa mabakod kag masaligan nga ebidensia.

Pagtuo Ukon Pagkamapinatihon?

Ang kalabanan nga pagtuo karon sa pagkamatuod pagkamapinatihon—ang pagpati sa gilayon nga wala sing makatarunganon nga sadsaran ukon rason. Ang pagkamapinatihon masami nga napasad sa nagabulubaylo nga balatyagon kag disparatis. Indi ini ang napasad-sing-maayo nga pagtuo bangod wala ini sing masaligan nga sadsaran agod patihan.

Bangod sang pagkamapinatihon, mahimo maghinakop sing padasudaso ang isa nga wala nahisuno sa kamatuoran sang Biblia. Gani, nagapaandam ang Biblia batok sa wala-sing-sadsaran nga  pagtuo: “Ang bisan sin-o nga di-eksperiensiado nagapati sa tagsa ka pulong, apang ang mahalungon nagabinagbinag sang iya mga tikang.” (Hulubaton 14:15) Si apostol Pablo nagsulat: “Pat-ura ang tanan nga butang; magpabilin sa maayo.” (1 Tesalonica 5:21) Wala ginapalig-on sang Biblia ang pagkamapinatihon. Ginapalig-on sini ang pagtuo pasad sa ebidensia.

Ang ikasarang sa paghibalo sang kinatuhayan sang matuod nga pagtuo sa pagkamapinatihon isa ka importante nga butang. Ang isa ka indibiduwal mahimo mangin relihioso apang wala sing matuod nga pagtuo. Si Pablo nagsiling: “Ang pagtuo wala ginapanag-iyahan sang tanan nga tawo.” (2 Tesalonica 3:2) Apang ang pasad-sa-Biblia nga pagtuo ginapanag-iyahan sang pila ka tawo, kag nagaapektar gid ini sa ila kabuhi.

Ang Matuod nga Pagtuo Nagapasuod sang Tawo sa Dios

Mapaanggid ang pagtuo sa isa ka kadena nga may nagatabid nga kompiansa kag pagsalig nga nagapasuod sang tawo sa Dios. Apang ini nga sahi sang pagtuo isa ka butang nga ginapalambo; indi ini isa ka butang nga yara sa aton sang mabun-ag kita. Paano mo mapalambo ang matuod nga pagtuo? Ang Biblia nagapaathag: “Ang pagtuo nagasunod sa butang nga nabatian. Ang butang nga nabatian naman paagi sa pulong tuhoy kay Cristo.”—Roma 10:17.

Busa, kinahanglan mo ang tion sa paghibalo tuhoy sa Dios kag sa mga panudlo sang iya Anak, si Jesucristo. Ini nga ihibalo indi matigayon nga wala sing panikasog. (Hulubaton 2:​1-9) Dapat ka manikasog nga mahibaluan ang ginasiling sang Biblia agod makumbinsi sa pagkamasaligan sini.

Apang, ang matuod nga pagtuo indi lamang pagpanag-iya sing ihibalo ukon pagpati nga matuod ang isa ka butang. Nagadalahig man ini sa tagipusuon​—⁠ang sentro sang motibasyon. Ang Roma 10:​10 nagasiling: “Paagi sa tagipusuon ang isa nagatuo.” Ano ang buot silingon sini? Samtang ginapamalandungan mo ang diosnon nga mga butang, nagapalambo sang apresasyon sa sini, ginapahanugutan mo ang mensahe sang Biblia nga magsalop sa imo tagipusuon. Ang pagtuo nagatubo kag labi nga nagabakod samtang ginapahulag ka nga maghikot suno sa mga saad sang Dios kag samtang makita mo ang ebidensia sang iya pagpakamaayo.—2 Tesalonica 1:3.

Daw ano ka hamili nga panag-iyahan ang matuod nga pagtuo! Makabenepisyo kita bangod sarang naton maatubang ang mabudlay nga mga kahimtangan nga may kompiansa sa Dios, nagasalig sa iya ikasarang sa pagtuytoy sang aton mga tikang kag sa iya kahanda sa pag-atipan sa aton mga kinahanglanon. Dugang pa, ginpatuhuyan sang Anak sang Dios, nga si Jesucristo, ang isa ka madugay nga benepisyo sang pagtuo: “Ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan.” (Juan 3:16) Kabuhi nga walay katapusan—isa gid ka matahom nga dulot sa mga may pagtuo!

Ang pagtuo sa saad sang Dios nga padyaan ang iya mga alagad nagahatag sa isa sing bag-o nga pagtamod sa kabuhi. Ang Hebreo 11:6 nagasiling nga ang matuod nga pagtuo nagadalahig sing pagpati sa ikasarang sang Dios nga padyaan “yadtong hanuot nga nagapangita sa iya.” Maathag, kon amo, nga ang matuod nga pagtuo indi pagkamapinatihon, kag indi lamang ini pagpati nga nagaluntad ang Dios. Nagadalahig ini sing pagbaton sa ikasarang sang Dios nga maghikot subong manugpadya sadtong hanuot nga nagapangita sa iya. Luyag mo gid bala nga makilala ang Dios? Kon amo, nian magtigayon ka sing sibu nga ihibalo gikan sa iya Pulong, ang Biblia, kag ang imo pagtuo padyaan.—Colosas 1:9, 10.

[Ginkuhaan sang laragway sa pahina 28]

Drawings of Albrecht Dürer/Dover Publications, Inc.