Nahibaluan Mo Bala?

(Ang mga sabat sa sining mga pamangkot mahimo masapwan sa mga teksto sa Biblia nga ginhatag, kag ang bug-os nga listahan sang mga sabat gin-imprinta sa pahina 29. Para sa dugang nga impormasyon, tan-awa ang publikasyon nga “Insight on the Scriptures,” nga ginbalhag sang Watchtower Bible and Tract Society of New York, Inc.)

1. Ano ang ginsiling ni Jesus sa Samaritana tuhoy sa paagi nga dapat simbahon ang Dios? (Juan 4:24)

2. Agod mabatas nila ang pag-ipit kag paghingabot, ano ang ginhatag sang Dios sa iya matutom nga mga alagad? (2 Corinto 4:7-10)

3. Sin-o ang kamanghuran nga anak nga lalaki ni Hukom Gideon, nga amo lamang gikan sa 70 ka anak nga lalaki nga nakalampuwas sa pagpatay sang iya utod sa amay nga si Abimelec? (Hukom 9:5)

4. Ano nga ngalan ang ginhatag sa ika-50 nga tuig sa tapos nagsulod ang Israel sa Ginsaad nga Duta, sang ang kahilwayan ginpahayag sa bug-os nga duta? (Levitico 25:10)

5. Halin sa anong magamay nga ginharian nagkuha ang mga anak nga lalaki ni Amon sing 12,000 ka hangaway agod gamiton sa pagpakig-away batok kay David? (2 Samuel 10:6)

6. Ano ang nakita ni Hari Nabocodonosor sang Babilonia sa isa ka damgo sang ikaduha nga tuig sang iya paghari nga nagtublag gid sa iya? (Daniel 2:1, 31)

7. Ano ang ginkusnit ni Samson paagi lamang sa iya mga kamot sa nahaunang narekord nga hitabo sang iya paggamit sa hatag-Dios nga kusog? (Hukom 14:5, 6)

8. Ano nga sapat ang nakita ni Abraham nga nasangit ang mga sungay sini sa kasiutan kag gingamit niya subong halad sa baylo ni Isaac? (Genesis 22:13)

9. Paagi sa paghimo sing ano nga ginlapas ni Hari Saul ang sugo ni Jehova sa pagpakig-away batok sa mga Amaleknon? (1 Samuel 15:3-9)

10. Sa tapos sang pagkatapok sa Babilonia, ano nga ngalan ang ginhatag sa Etanim, ang nahauna nga bulan sang Judiyong kalendaryo?

11. Diin nakita sang mga ginikanan ni Jesus ang ila 12-anyos nga anak pagkatapos nga ginpangita sia sa sulod sang tatlo ka adlaw? (Lucas 2:46)

12. Sin-o ang ginsugid sa tagna nga magkalipay tungod sa madinalag-on nga pag-abot ni Jesus sakay sa tinday nga asno? (Zacarias 9:9)

13. Ngaa naglaygay si Jesus nga magtipon “sing mga bahandi sa langit”? (Mateo 6:20)

14. Ano ang ginhimo ni Jehova sa pagpahayag sang iya kaakig kay Solomon sang si Solomon naghalad sa iban nga mga dios sa iya katigulangon? (1 Hari 11:14, 23-26)

15. Ano ang ginalaygay sa aton sang Kasulatan nga dapat bantayan labaw sa bisan ano nga butang? (Hulubaton 4:23)

16. Ano ang ginhimo ni Hari Joaquim sang ginbasa sa iya ang linukot nga nagaunod sang pinamulong ni Jehova batok sa Israel? (Jeremias 36:23)

17. Ano ang ginhaumhaum ni Jacob nga amo ang nagpatay sa iya anak nga si Jose? (Genesis 37:33)

18. Sang dumaan nga mga tion ano nga siudad ang kilala nga “siudad sang mga palma”? (Deuteronomio 34:3)

Mga Sabat sa mga Pamangkot

1. “Sa espiritu kag kamatuoran”

2. “Kusog nga labaw sa kinaandan”

3. Si Jotam

4. Jubileo

5. Istob

6. Isa ka daku nga larawan sa dagway sang tawo, nga ang mga bahin nahuman sang nanuhaytuhay nga metal

7. Isa ka may bungaybungay nga leon nga totoy

8. Isa ka kordero

9. Wala niya ginpatay ang ila hari nga si Agag, subong man ang pinakaali sang ila panong kag kasapatan

10. Tishri

11. Sa templo

12. Ang “anak nga babayi sang Sion”

m13. Ang materyal nga mga bahandi nagakadula kag wala nagapahamuot sa Dios

14. Ginkuha niya ang iya pagpakamaayo kag nagbangon sing mga manugpamatok kay Solomon

15. Ang malaragwayon nga tagipusuon

16. Gin-utod niya ini kag gindap-ong sa kalayo

17. “Mabangis nga sapat nga talunon”

18. Jerico