Sin-o ang Magapaluntad sing Dayon nga Paghidait?

NGAA wala ginasabat sang Dios ang mga pangamuyo para sa paghidait sang mga lider sang nanuhaytuhay nga mga relihion sang kalibutan? May makawiwili nga sabat ang Biblia. Indi nga ang Dios wala sing interes sa paghidait​​—⁠mas daku ang iya handum nga magluntad ang paghidait sangsa mga klerigo nga nagapangamuyo para sa sini. Sa katunayan, nakahimo na ang Dios sing pat-od nga mga kahimusan agod paluntaron ang paghidait sa bug-os nga kalibutan. Nakahimo na sia sing pat-od nga mga tikang padulong sa sini nga tulumuron. Maathag nga napaalinton na niya ang iya mga katuyuan sa katawhan. Apang, makapasubo nga ginasikway sang mga relihion sang kalibutan ang ginsiling sang Dios.

Ang Dios sang una nagsaad sing isa ka “binhi,” isa ka manuggahom, nga progresibo nga ginalaragway sang Biblia, agod maghatag sing dugang kag dugang pa nga impormasyon tuhoy sa kon sin-o sia. (Genesis 3:​15; 22:18; 49:10) Si manalagna Isaias, nga kilala sa iya tumalagsahon nga Mesianikong mga tagna, nagsulat nga ining gintagna nga Lider mangin “Prinsipe sang Paghidait” sa ibabaw sang duta kag nga sa idalom sang iya paggahom, ‘walay katapusan ang paghidait.’ (Isaias 9:​6, 7) Subong langitnon nga Manuggahom, magapasilabot sia agod dulaon ang kalautan kag himuon ang duta nga isa ka paraiso, nga wala na sing inhustisya, balatian, kaimulon, ukon kamatayon. Magaluntad ang paghidait kag dayon nga kabuhi. (Salmo 72:​3, 7, 16; Isaias 33:24; 35:​5, 6; Daniel 2:​44; Bugna 21:⁠4) San-⁠o ini mahanabo?

Ang Bug-os Kalibutan nga Paghidait Malapit Na

Ginsugiran ni Jesus ang iya mga disipulo nga antes malaglag ining malaut nga sistema sang mga butang kag magsugod ang isa ka bag-ong katilingban sang tawo, mahanabo anay ang talalupangdon nga mga hitabo nga magatay-ug sa kalibutan, nga mahanabo sing dulungan sa sulod sang isa ka dag-on. (Mateo 24:​3, 7-​13) Madamo sini nga mga hitabo​​—⁠mga inaway, mga kakulang sing pagkaon, mga linog, sa pagsambit sing pila lamang⁠​—⁠​ang natabo na sa tion kag tion sa tagsa ka dag-on. Apang, wala pa gid matabo nga ginsalot sini ang katawhan sing dulungan kag lapnag sa bug-os kalibutan subong sang nagakatabo sa aton dag-on. Kag mas daku ang halit sini nga mga kalamidad karon bangod mas madamo ang pumuluyo sang duta.

Ang isa pa ka butang nga gintagna sang Biblia amo ang pagguba sang mga tawo sa ila kinaugali nga  palibot. (Bugna 11:18) Dugang pa, antes mag-abot ang gintagna nga katapusan, dapat anay tapuson ang pagpaandam sa bug-os nga kalibutan, ang pagbantala sing “maayong balita sang ginharian.” Ginahimo karon sang mga Saksi ni Jehova ini nga hilikuton sa bug-os nga kalibutan.​​—⁠Mateo 24:14.

Ang katumanan sini nga mga tagna nagakahulugan sing maayong balita para sa matutom nga katawhan. Ang gintagna nga bag-ong kalibutan nga may bug-os nga paghidait malapit na! Garantiya ini nga madula sing bug-os ang dumot kag terorismo. Ang Biblia nagapaathag: “Indi sila magahimo sing bisan ano nga halit ukon magatuga sing bisan ano nga kagulub-an sa bug-os ko nga bukid nga balaan; bangod ang duta pat-od gid nga matugob sang ihibalo ni Jehova subong sang tubig nga nagatabon sa dagat.”​​—⁠Isaias 11:9.

Mga Pangamuyo nga Ginapamatian sang Dios

Ang pagpangamuyo sa Dios indi gid isa ka walay pulos nga buhat ukon walay kabilinggan nga seremonya. Sa Biblia, si Jehova ginatawag nga “Nagapamati sa pangamuyo.” (Salmo 65:⁠2) Gani sa bisan ano man nga oras, ginapamatian niya ang indi maisip nga mga pangamuyo sang sinsero nga mga tawo sa duta. Apang, may dapat bala himuon agod pamatian ang mga pangamuyo? Ginapahangop sang Biblia nga dapat sundon sang bunayag sing tagipusuon nga mga tawo ang mga kamatuoran nga matun-an nila sa Biblia tuhoy sa Dios, sa amo mangin “matuod nga mga sumilimba” sila, nga nagasimba sa iya “sa espiritu kag kamatuoran.” (Juan 4:23) Ang mga pangamuyo sang mga tawo nga wala nagatahod sa iya kabubut-on wala ginasabat: “Sia nga nagapahilayo sang iya igdulungog sa pagpamati sa kasuguan [sang Dios]​​—⁠bisan ang iya pangamuyo kalangil-aran.”​​—⁠Hulubaton 28:9.

Makapasubo nga madamo nga relihioso nga mga lider karon ang wala nagatudlo ukon nagapangamuyo tuhoy sa katuyuan sang Dios nga paluntaron ang paghidait. Sa baylo, nagapangamuyo sila nga malubad sang tawhanon nga mga gobierno ini nga mga problema, samtang ang Pulong sang Dios maathag nga nagasiling nga “wala sa tawo nga nagalakat bisan ang pagtuytoy sa iya tikang.”​​—⁠Jeremias 10:23.

Gintagna nga “sa ulihi nga bahin sang mga adlaw,” sa aton dag-on, ang mga mahigugmaon sa paghidait magadugok sa simbuliko nga “bukid sang balay ni Jehova”​​—⁠kon sayuron, sa matuod nga pagsimba. Ini sila magahimo sing daku nga mga pagbag-⁠o sa ila kabuhi: “Salsalon nila ang ila mga espada nga mga punta sang arado kag ang ila mga bangkaw nga mga galab nga inughagbas. Ang pungsod indi magabayaw sing espada batok sa pungsod, kag indi na sila magtuon sing inaway.”​​—⁠Isaias 2:​2-4.

May grupo bala sang mga sumilimba karon nga nagatinguha sa pagsunod sa sining mga pulong? Ukon nagahambal lamang bala ang tanan nga relihion tuhoy sa paghidait samtang ginasakdag nila ang inaway? Sa madason nga tion nga masumalang mo ang mga Saksi ni Jehova, ginaagda namon ikaw nga hambalan upod sa ila ang tema tuhoy sa paghidait kag hibalua kon ano nga relihion ang nagatudlo sa katawhan nga mangin mahidaiton sa tanan.