Madinalag-on sa Tunga sang Kabudlayan

Subong gintagna sa Biblia, nagakabuhi kita sa “makahalanguyos nga mga tion nga mabudlay pakigbagayan.” (2 Timoteo 3:1, NW) Ang mga kinagamo sa pamilya, problema sa panglawas, kag pinansial nga mga kahuol pila lamang sa mga ginaantos mo. Kon kaisa, mabatyagan mo nga daw indi ka na makaagwanta. Apang, mahimo ka magmadinalag-on sa tunga sang kabudlayan. Talupangda ang masunod nga ilustrasyon.

Ang bulak nga Teide violet nagapamuhi sa halos 3,700 metros nga kataason sa isla sang Tenerife malapit sa baybayon sang Aminhan nga Aprika. Ang bulkan nga Pico de Teide diin ginkuha ang ngalan sang bulak, makit-an gid sa bug-os nga subtropiko nga isla. Daw kalbo tan-awon ang naibabaw nga bahin sini. Apang sa tigpamulak, ang natunaw nga niebe nagahatag sing bastante lang nga tubig agod makapamuhi liwat ining mabakod nga mga bulak kag kulintasan sang duag-lila nga bulak ang bulkan. Huo, ini nga bulak daw mahuyang kag matapok, apang nagapamuhi ini kag nagapamulak pa gani sa sining lamgod kag indi maayo nga palibot.

Subong sang bulak nga Teide violet, mahimo ka man magmadinalag-on sa tunga sang mabudlay nga mga kahimtangan. Nabuligan sang Biblia ang madamo nga mga Saksi ni Jehova nga magmadinalag-on bisan sa pinakamabudlay nga mga tion. Halimbawa, nahimo ini sang mga nabilanggo sa kampo mga konsentrasyon sa Nazi nga Alemanya. “Mas grabe ang pagtratar sa ila sangsa bisan anong iban pa nga grupo,” siling sang manunulat nga taga-Sweden nga si Björn Hallström, “apang paagi sa ila pagtuo sa Dios, naatubang nila ini sing mas madinalag-on sangsa iban nga grupo.”

Bisan ano man ang imo kahimtangan karon, mabuligan ka sang Biblia nga magmadinalag-on sa tunga sang kabudlayan. Pakig-anguti ang mga Saksi ni Jehova sa inyo komunidad, ukon sulati ang direksion sa pahina 5 sini nga magasin para sa isa ka libre nga pagtuon sa Biblia.