Bulig kag Proteksion Para sa mga Dalagita

MAKAPASUBO kon ang isa ka dalagita nga daw wala pa sing buot magbusong na nga wala sing bana. Apang, lapnag ang pagbusong sang mga tin-edyer, kag sa pila ka paagi apektado sini ang kabuhi sang tanan. Ang makapasubo nga pagbusong sang mga tin-edyer isa lamang ka pamatuod nga husto ang sugo sang Dios: “Palagyo kamo sa pagkamakihilawason.”​​—⁠⁠1 Corinto 6:18.

Walay sapayan, kon kaisa, ginapili sang isa ka dalagita nga gintudluan sang mga dalanon sang Dios nga sikwayon ang iya nahibaluan. Nagahimo sia sing seksuwal nga imoralidad kag nagabusong. Ano ang ginahimo sang matuod nga mga Cristiano? Kon ining nakasala nga pamatan-on maghatag sing pamatuod nga naghinulsol sia, dapat sia buligan sing mahigugmaon sang iya mga ginikanan kag sang iban pa nga mga katapo sang Cristianong kongregasyon.

Binagbinaga liwat si Nicole. Ginapadaku sia sang iya mga ginikanan nga mangin isa sa mga  Saksi ni Jehova. Busa, makapahuol gid sang nagbusong sia nga wala sing bana. Apang, siling ni Nicole, “Ginduaw ako sa balay sang mga kauturan kag ginpalig-on ako nga magtuon sang Biblia kag magpabilin nga suod kay Jehova.”

Wala nagaugyon ang mga Saksi ni Jehova sa seksuwal nga imoralidad. Apang nagapati sila nga kon iaplikar ang mga prinsipio sang Biblia, mahimo “magbalhin” ang mga nakasala. (Roma 12:2) Nagapati gid sila nga ginapatawad sang Dios ang nakasala nga nagahinulsol. (Efeso 1:7) Nagapati man sila nga bisan pa bastardo ang isa ka bata, wala sing sala ang bata. Gani sa baylo nga pakalainon ang bata, dapat sia pakitaan sang mga katapo sang Cristianong kongregasyon sing pagpalangga, kaluoy, kag kaayo kaangay sang bisan sin-o nga bata sa tunga nila.​​—⁠⁠Colosas 3:12.

Ang isa ka di-minyo nga iloy nagsugod sa pagtuon sa Biblia upod sa mga Saksi ni Jehova. Madali niya nga ginbaton ang mensahe sang Biblia kag naghimo sing daku nga mga pagbag-o sa iya kabuhi. Nagsiling sia tuhoy sa mga Saksi: “Nagpakita sila tanan sa akon kag sa akon kabataan sing matuod nga interes. Ginahatagan nila kami sing pagkaon kag mga bayo kon kinahanglanon kag sing kuarta man. Sang kalipikado na ako nga magpakigbahin sa pagministeryo sa latagon upod sa mga Saksi ni Jehova, sila ang nagbantay sa akon mga bata. Ginhimo nila ang tanan nga masarangan nila agod buligan ako nga makapalambo sing matuod nga gugma kay Jehova.”

Kon Paano Makalikaw

Walay sapayan, mas maayo gid kon mabuligan ang mga pamatan-on nga likawan ang mga problema sa panugod pa lang. Amo sini kon ngaa ginatinguhaan sang mga Saksi ni Jehova nga mangin mahigugmaon sa ila mga anak. Sa baylo nga pahugon lang ang ila mga anak batok sa AIDS ukon pagbusong​​—⁠⁠ginatinguhaan sang mga Saksi nga ipatudok sa ila pamatan-on nga mga anak ang matuod nga gugma kay Jehova nga Dios kag sa iya kasuguan. (Salmo 119:97) Nagapati sila nga dapat hatagan ang kabataan sing sibu nga impormasyon tuhoy sa sekso. Mas importante, nagapati sila nga halin sa pagkalapsag dapat tudluan ang kabataan sang mga prinsipio sa moral nga ginahatag sa Biblia. (2 Timoteo 3:15) May pormal nga instruksion nga ginaaman sa lokal nga mga Kingdom Hall sang mga Saksi ni Jehova. Apang, ginapalig-on man ang Saksi nga mga ginikanan nga magtuon sa Biblia upod sa ila kabataan. Ang mabuligon nga literatura, subong sang libro nga Questions Young People Ask​​—⁠⁠Answers That Work, ginbalhag agod buligan ang mga ginikanan sa paghatag sa ila mga anak sing panuytoy sa moral.⁠⁠ *

Ang pagsunod sa estrikto nga mga talaksan sa moral sang Biblia nagasumpakil sa imoral nga mga huyog nga lapnag sa kalibutan karon. Apang isa ini ka dalanon sang pagkabuhi nga kon sundon, malikawan sang minilyon ka dalagita kag sang ila mga anak ang mabug-at nga problema nga resulta sang pagbusong sang mga tin-edyer.

[Nota]

[Retrato sa pahina 12]

Mainayuhon kag may konsiderasyon nga ginapakig-angutan sang matuod nga mga Cristiano ang pinamataan nga mga iloy