Isa ka Kalibutan nga Wala na sing Gutom?

HUNAHUNAA lamang ang ginabatyag sang isa ka matinatapon nga amay kon makita niya ang iya mga anak nga nagaantos sing malnutrisyon. Masakit gid ini sa iya. Kon amo sina ang ginabatyag sang isa ka tawhanon nga ginikanan, daw ano pa ayhan ang ginabatyag sang aton mahigugmaon nga langitnon nga Amay. Nakahibalo gid sia sang ginabatyag sang ginatos ka milyon nga nagaantos sing malnutrisyon.

Walay sapayan sang maayo nga tinutuyo sang katawhan nga amanan sing pagkaon ang mga gutom sa kalibutan, ang gutom labi nga nagalala sang pamuno sang ika-21 nga siglo. Apang, dulaon sing dayon sang aton langitnon nga Amay nga si Jehova, ang gutom. Paano naton ini nahibaluan?

Ginapaathag sang Biblia nga sang ginbutang sang Dios sanday Adan kag Eva sa hardin sang Eden, gin-aman niya ang ila tanan nga kinahanglanon agod mangin malig-on sila, kontento, kag makakaon sing husto. Nagsiling ang Dios sa ila: “Ginhatag ko sa inyo ang tanan nga tanom nga may binhi nga yara sa kadaygan sang bug-os nga duta.” Katuyuan ni Jehova nga ‘matugob ang duta’ sang mga anak nanday Adan kag Eva kag may bugana nga pagkaon ang katawhan.​—⁠Genesis 1:​28, 29.

Walay sapayan nga nagrebelde ang unang mag-asawa batok sa ila Manunuga kag nawasi nila ang iya kahamuot, ang orihinal nga katuyuan sang Dios para sa katawhan wala magbag-o. Ginatawag sang Biblia si Jehova subong “ang Isa nga nagahatag sing tinapay sa mga gutom,” kag suno sa madamo nga tagna sini, dulaon niya ang tanan nga problema may kaangtanan sa suplay nga pagkaon.​—⁠Salmo 146:7.

Sang nangayo sing tanda ukon ebidensia ang mga alagad ni Jesus kon san-o niya tukuron ang iya Ginharian kag hilabtan ang mga nagakatabo sa duta, ginlista ni Jesus ang mga kahimtangan antes sina nga pagpasilabot. Ang isa sini amo ang “kakulang sing pagkaon.” Ang maid-id nga pagbinagbinag sa ginsiling ni Jesus nagapasalig nga malapit na madula ang pag-antos sang katawhan.⁠ *​​—⁠Mateo, kapitulo 24.

Tuhoy sa Paraiso nga tukuron sang Dios, ang Salmo 72:16 nagatagna: “May bugana nga uyas sa duta; sa putukputukan sang kabukiran magahapayhapay ini.” Ang uyas kinaandan na nga ginatanom sa mga nalupyakan sa dumaan nga Israel. Apang, sa ginpakamaayo nga mga kahimtangan nga ginlaragway sa sining tagna, ang binhi nga ginsab-ug bisan sa labing kigas, mamala, kag di-mapatubason nga duta​—⁠nga kinaandan na nga wala sing patubas​—⁠magapatubas sing bugana nga ani. “Sa panahon sang Mesias,” siling sang isa ka iskolar sang Biblia, “daw subong nga ang talamnan sang mga uyas makita bisan diin, bisan sa putukputukan sang kabukiran, ukon daw subong nga ang mga pukatod gintamnan tubtob sa mga putukputukan, agod nga ang bug-os nga duta mahil-ob sang nagahapayhapay kag maayo nga mga ani.”

Daku gid ang kinatuhayan sang palaabuton nga ginatagna sang Biblia kag sang kahimtangan sang minilyon karon! Huo, nagasaad ang Dios nga sa palaabuton, “ang duta pat-od nga magahatag sang iya patubas; ang Dios, ang aton Dios, magapakamaayo sa aton.”​—⁠Salmo 67:6.

Kon luyag mo mahibaluan kon paano mo kag sang imo mga hinigugma maagom ini kag ang madamo pa nga pagpakamaayo nga ginalaragway sa makalilipay nga mga tagna sa Biblia, indi magpangalag-ag nga pamangkuton ang mga Saksi ni Jehova sa inyo lugar ukon sulatan ang nagakaigo nga direksion sa pahina 5 sini nga magasin.

[Nota]

 [Retrato sa pahina 10]