Mahimo Bala Mangin Makalilipay ang Pagtigulang?
Mahimo Bala Mangin Makalilipay ang Pagtigulang?
ALAS 6:30 na sang isa ka matugnaw kaayo nga aga sang tigtulugnaw sa Soweto, sa Bagatnan nga Aprika. Dapat na magbangon si Evelyn. * Apang, nabudlayan gid sia, bangod wala sing heater ang iya balay.
Bisan masakit, amat-amat nga ginplastar niya ang iya may artraytis nga mga tuhod sa kilid sang katre. Dayon nagpungko sia kag nagpahunayhunay anay. Amat-amat nga nag-ugdaw ang pagngutngot sang iya mga batiis. Nian, nagpanukod si Evelyn kag nagtindog. Nag-agunto sia sa kasakit. Kaangay sang ‘tibakla nga nagaguyod sang iya kaugalingon,’ ginpahamtang ni Evelyn ang iya mga kamot sa iya balikawang kag nagkiangkiang padulong sa banyo.—Manugwali 12:5. *
‘Maayo gid ang nahimo ko!’ himulungon ni Evelyn sa iya kaugalingon. Indi lamang nga may isa naman ka adlaw nga nadugang sa iya kabuhi kundi nagihugiho man niya ang iya nagapalanakit nga kalawasan.
Apang, isa pa ka butang ang ginakabalak-an niya. “Basi ‘madiskaril’ ang akon panghunahuna,” siling ni Evelyn. Kon kaisa, nagakalipat sia kon diin niya ginbutang ang iya mga yabi, apang alisto pa ang iya panghunahuna. “Kabay nga indi kuntani ako mag-ulianon,” siling ni Evelyn, “subong sang iban nga mga tigulang.”
Sang hoben pa si Evelyn, wala gid sa iya bungog ang pagtigulang. Sa hinali lang, daw ginlalas ang mga tinuig, kag karon ang iya nagapalanakit nga kalawasan pirme nagapahanumdom sa iya nga 74 anyos na sia.
Ang iban nga mas maayo ang kahimtangan kon ikumparar kay Evelyn kag halos wala sing malala nga balatian kag kahuol makasiling nga ang ila pagtigulang makalilipay. Kaangay sang patriarka nga si Abraham, mahimo sila makalab-ot sa “katigulangon, tigulang na kag naayawan.” (Genesis 25:8) Ang iban nagaantos sing “masubo nga mga inadlaw kag mga tinuig” kag makasiling lamang: “Wala ako sing kalipay sa kabuhi.” (Manugwali 12:1, Maayong Balita nga Biblia)
Paano mo ginatamod ang pagtigulang? Ano ang pila sang mga kabudlayan nga ginabatas sang mga may edad na? Indi bala malikawan ang paghabol sang panghunahuna kon nagatigulang na? Ano ang makabulig agod mangin malinong ang panghunahuna walay sapayan sang katigulangon?
[Mga nota]
^ par. 2 Gin-islan ang iban nga mga ngalan sa sini nga mga serye.
^ par. 3 Ini nga dinalan sa dumaan nga tulun-an sang Manugwali sa Biblia madugay na ginkilala subong isa ka mahinantupon kag mabinalaybayon nga paglaragway sa mga kabudlayan sang pagtigulang.
