Bulig Agod Maamligan ang Aton mga Anak

Sang nagligad nga tuig ang isa ka babayi sa Virginia, E.U.A., nagsulat agod ipabutyag ang iya apresasyon sa libro nga Magtuon Gikan sa Daku nga Manunudlo, nga nagasiling: “Antes magtulog ang akon mga apo nga lalaki, nagasiling sila: ‘Lola, basahi kami sing isa ka sugilanon gikan sa libro ni Jesus.’ Nagaedad sila sing 4, 6, kag 7, kag naluyagan gid nila ang mga sugilanon.”

Ang lola nagpaathag: “Ginbasa ko ang kapitulo 32 nga may tig-ulo ‘Kon Paano Gin-amligan si Jesus.’ Nagdayaw gid ako kay pagkatapos ini magsugid kon paano ni Jehova gin-amligan si Jesus, ang leksion nagabulig sa mga kabataan nga maamligan ang ila kaugalingon paagi sa paghatag sa ila sing praktikal nga laygay. Ini nagasiling: ‘Kon may maghimo sini, singgana sia sing serioso apang sa mabaskog nga tingog: “Untati ina! Isugid ko ikaw!”’”

Sa Mexico ang iloy sang lima ka tuig nga bata nga babayi nga si Betsaida nagsiling nga natapos na niya basa ang Manunudlo nga libro upod sa iya bata, kag ginabasa nila ini liwat karon sa ikaduha na nga tion. Ang iloy nagsiling: “Manubo na gid ang moral sang kalibutan, kag mas madamo nga pag-ipit ang ginaatubang sang aton mga kabataan. Ang akon anak nagsiling nga nagapasalamat sia sa instruksion kon paano niya maamligan ang iya kaugalingon gikan sa malaut nga mga buhat, subong sang ginasambit sa kapitulo 32.”

Ining 256-pahina nga libro nga pareho kadaku sini nga magasin may matahom nga mga laragway, kag nakabulig gid sa mga ginikanan sa pagtuman sa sugo sang Biblia nga hanason ang ila kabataan. (Hulubaton 22:6) Ang mga leksion, nga ginbase sa mga panudlo ni Jesucristo, mahapos hangpon; apang, ang mga topiko sini para sa bisan ano nga edad. Mahimo ka makapangabay sing isa ka kopya paagi sa pagsulat kag pagpadala sang kaupod nga kupon sa adres nga yara sa kupon ukon sa nagakaigo nga adres nga nalista sa pahina 5 sini nga magasin.

□ Interesado ako nga makabaton sing kopya sang libro nga Magtuon Gikan sa Daku nga Manunudlo.

□ Palihug kontaka ako may kaangtanan sa isa ka wala sing bayad nga pagtuon sa Biblia sa puluy-an.