Kon Ngaa Importante Gid Sia

SA SULOD sang 2,000 ka tuig na karon, labi nga igtalupangod ang ginpatuhoy sa pagkabun-ag ni Jesus. Suno sa unang-siglo nga manugbulong nga si Lucas, ginsilingan sang anghel ang lamharon nga ulay nga si Maria: “Yari karon! magapanamkon ka kag magabun-ag sing anak nga lalaki, kag pagahingalanan mo sia nga Jesus.” Ano ang ginsiling sang mensahero nga anghel tuhoy kay Jesus? “Ining isa mangin daku kag tawgon nga Anak sang Labing Mataas,” siling niya. “Magahari sia [si Jesus],” kag “ang iya ginharian wala sing katapusan.”—Lucas 1:31-33.

Pat-od gid nga amo sini ang kinahanglan sang katawhan—isa ka matarong nga manuggahom sa kalibutan agod magdumala sa mga hilikuton sa duta sa mahigugmaon nga paagi! Sa pagkamatuod, madugay pa antes ginbun-ag si Jesus, ang Biblia nagtagna: “Sa aton natawo ang isa ka bata, sa aton ginhatag ang isa ka anak nga lalaki; kag ang gobierno mangin sa iya abaga. Kag pagatawgon sia nga . . . Dayon nga Amay, Prinsipe sang Paghidait. Ang kabuganaan sang iya gobierno kag paghidait wala sing katapusan.”—Isaias 9:6, 7, New International Version.

Isa ka matarong nga gobierno kag paghidait—daw ano ka makalilipay nga palaabuton! Apang, talupangda nga ini nga gobierno gintagna nga mangin sa abaga sang isa ka prinsipe—ang “Prinsipe sang Paghidait”—nga nagapakita nga ang Hari sang tanan nga tinuga, ang Dios nga Labing Gamhanan, nagatugyan sini nga pagginahom sa Iya Anak. Busa, sulitsulit nga gintawag ni Jesus ini nga gobierno diin sia ang Manuggahom nga “ang ginharian sang Dios.”—Lucas 9:27, 60, 62.

Sa maaga nga bahin sang iya ministeryo, si Jesus nagsiling: “Dapat ko ibantala ang maayong balita sang ginharian sang Dios, kay tungod sini ginpadala ako.” (Lucas 4:43) Gintudluan pa gani ni Jesus ang iya mga sumulunod nga ipangamuyo nga magkari ang Ginharian sang Dios. (Mateo 6:9, 10) Ang dyurnal nga Christianity and Crisis nagsiling nga “ang Ginharian amo ang nagapangibabaw nga tema sang panudlo ni [Jesus],” kag nagdugang ini: “Wala na sing iban pa nga topiko nga iya pirme ginahunahuna ukon panguna gid sa iya mensahe. Ginhinambitan ini sing kapin sa isa ka gatos ka beses sa kasaysayan sang Ebanghelyo.”

Mga Pamangkot nga Dapat Binagbinagon

Paano mo ginahanduraw si Jesus karon? Masami nga sa sini nga tion sang tuig, ginalaragway sia subong isa ka lapsag sa pasungan. Kag matuod nga sa malip-ot nga tion isa sia ka wala sing mahimo nga lapsag. (Lucas 2:15-20) Apang, amo gid bala ini ang dapat nga dumdumon sa  iya? Hunahunaa ini, Ngaa ginbun-ag si Jesus subong tawo? Sa pagkamatuod, sin-o sia?

“Si Jesus bala Anak sang Dios, ang ginsaad nga Mesias sang Hebreo nga Biblia?” pamangkot sang Encarta Yearbook sang 1996. “Ukon sia bala isa lamang ka tawo, ayhan pinasahi lang, apang tawo man sa gihapon?” Ini nga mga pamangkot takus sang serioso nga pagbinagbinag. Ngaa? Bangod ang aton gid nga kabuhi kag kalipay nagadepende sa aton pagtamod kay Jesus kag pagpanghikot nahisuno sa iya. “Sia nga nagatuo sa Anak makatigayon sing kabuhi nga walay katapusan,” siling sang Biblia, apang “sia nga wala nagatuman sa Anak indi makatigayon sing kabuhi.”—Juan 3:36.

Indi Ordinaryo nga Tawo

Pagkatapos ilaragway ang mga hilikuton ni Jesus sa templo sa Jerusalem sang 12 anyos sia, ang Biblia nagasiling nga nagpauli sia sa ila balay upod kay Maria kag sa iya bana, si Jose, kag “[si Jesus] padayon nga nagpasakop sa ila.” (Lucas 2:51, 52) Apang sang nagdaku na si Jesus, nangin maathag gid nga indi sia ordinaryo nga tawo.

Sang ginpakalma ni Jesus ang unos sa dagat, ang hinadlukan nga abyan niya nagtuaw: “Sin-o gid ini?” (Marcos 4:41) Sang ulihi, gintugyan si Jesus sa Romanong Gobernador nga si Poncio Pilato tungod sa butig nga mga panumbungon. Bangod napat-od ni Pilato nga wala sing sala si Jesus kag napahulag sang dignidad ni Jesus walay sapayan sang mapintas kag di-makatarunganon nga pagtratar, may pagdayaw nga ginpresentar niya si Jesus sa kadam-an nga nagatuaw: “Tan-awa! Ang tawo!” Apang ang mga Judiyo nagsabat: “May kasuguan kami, kag suno sa kasuguan dapat sia mapatay, bangod ginhimo niya ang iya kaugalingon nga anak sang Dios.”—Juan 19:4-7.

Sang mabatian ni Pilato nga ginpatuhuyan si Jesus subong “anak sang Dios,” hinadlukan sia. Ginsugiran sia anay sang damgo sang iya asawa tuhoy kay Jesus, nga gintawag sang iya asawa nga “inang matarong nga tawo.” (Mateo 27:19) Gani nagapalibog si Pilato kon sin-o gid si Jesus! Bisan pa nga nahibaluan niya nga si Jesus taga-Galilea, si Pilato namangkot: “Diin ka naghalin?” Sang wala magsabat si Jesus, natapos ang ila paghambalanay.—Juan 19:9, 10.

Maathag nga si Jesus nangin tawo sadto, apang tuhay sia sa iban bangod antes sia nangin tawo isa sia anay ka espiritu nga persona, nga kilala sa langit subong ang Pulong. Nian milagruso nga ginsaylo sang Dios ang iya kabuhi sa taguangkan ni Maria. “Ang Pulong nangin unod,” pamatuod ni apostol Juan, “kag nagpuyo sa tunga naton.”—Juan 1:1, 2, 14, 18; Bugna 3:14.

Kon Ngaa Kinahanglan nga Ipadala sang Dios ang Iya Langitnon nga Anak sa Duta

Antes makatigayon sing mga anak ang una nga tawo nga si Adan, nagpakasala sia. Ang rebelyuso nga anghel nga gintawag nga Yawa kag Satanas, nagmadinalag-on sa pag-engganyo sa iya nga lalison ang Dios. Gani, nadula ni Adan ang  iya kaangtanan subong anak sang Dios, suno gid sa ginsiling sang Dios nga matabo kon maglalis sia. Busa, gin-antos ni Adan ang mga epekto sang iya paglalis. Nangin di-himpit sia, nagtigulang, kag sang ulihi napatay.—Genesis 2:15-17; 3:17-19; Bugna 12:9.

Sa paglaragway sa epekto sang paglalis ni Adan sa aton tanan nga mga kaliwatan niya, ang Biblia nagapaathag: “Paagi sa isa ka tawo [si Adan] nagsulod ang sala sa kalibutan kag ang kamatayon paagi sa sala, kag gani ang kamatayon naglapnag sa tanan nga tawo bangod sila tanan nakasala.” (Roma 5:12) Sing makapasubo, tanan kita nakapanubli sing sala sa aton katigulangan nga si Adan, upod ang makahalapay nga epekto sini nga pagtigulang kag kamatayon.—Job 14:4; Roma 3:23.

Mahilway lamang kita sa sini nga epekto paagi sa pagtigayon sing isa ka himpit nga amay, isa nga wala makapanubli sing sala kag sang makahalapay nga epekto sini. Talupangda kon paano gin-aman ining bag-o nga amay nga kaangay sa himpit nga si Adan.

Gin-aman ang Isa nga Kinahanglanon

Ang ginsaad nga “Prinsipe sang Paghidait,” subong sang madumduman mo, gintawag man nga “Dayon nga Amay.” Ang iya pagkabun-ag gintagna sa sini nga paagi: “Ang isa ka ulay magabusong, kag magabun-ag sing anak nga lalaki.” (Isaias 7:14; Mateo 1:20-23) Si Jesus wala sing tawhanon nga amay, amo man si Adan, ang una nga tawo. Kon aton usuyon pabalik ang kaliwatan ni Jesus sa ginsuguran sang maragtas sang tawo, ginpakita sang istoryador sang Biblia nga si Lucas, nga si Adan nagluntad subong “anak sang Dios.” (Lucas 3:38) Apang subong sang nahibaluan naton, nadula ni Adan ini nga kaangtanan subong anak sang Dios—sa iya mismo kaugalingon kag sa tanan niya nga kaanakan. Amo nga nagakinahanglan kita tanan, kon sa aton pa, sing isa ka bag-o nga amay nga himpit—ang isa nga kaangay ni Adan sang gintuga sia.

Ginpadala sang Dios ang iya Anak gikan sa langit nga mangin amo ang bag-o nga Adan agod buslan ang nahauna. Ang Biblia nagasiling: “‘Ang una nga tawo nga si Adan nangin buhi nga kalag.’ Ang katapusan nga Adan nangin nagahatag-kabuhi nga espiritu. Ang una nga tawo gikan sa duta kag human sa yab-ok; ang ikaduha nga tawo gikan sa langit.” (1 Corinto 15:45, 47) Si Jesus, “ang katapusan nga Adan,” kaangay sa “una nga tawo nga si Adan” bangod himpit Sia nga tawo, nga sarang makatigayon sing himpit nga mga anak, nga magapuyo sing dayon sa kahimpitan sa duta.—Salmo 37:29; Bugna 21:3, 4.

Si Jesus nga wala sing anak, nagpabilin nga matutom sa Dios tubtob sa iya kamatayon, walay sapayan sang tagsa ka pagsalakay ni Satanas. Ang may integridad kag himpit nga tawhanon nga kabuhi nga ginhalad ni Jesus, ukon ginhatag, ginatawag nga gawad. “Nahilway kita [gikan sa sala kag kamatayon nga ginpanubli kay Adan] paagi sa gawad paagi sa dugo [ni Jesus],” paathag sang Biblia. Ang Biblia nagsiling man: “Subong nga paagi sa pagkadimatinumanon [ni Adan] madamo ang nangin makasasala, subong man paagi sa pagkamatinumanon [ni Jesus] madamo ang mangin matarong.”—Efeso 1:7; Roma 5:18, 19; Mateo 20:28.

Kon magpakita kita sing pagtuo kay Jesus, sia mangin aton “Dayon nga Amay” kag aton “Manluluwas.” Ipadapat niya ang iya prinsipenhon nga paggahom sa isa ka dalayawon nga paagi samtang nagaalagad sia subong Manuggahom sa Ginharian sang iya Amay. Masunod nga binagbinagon naton kon ano ang kahimtangan sang kabuhi sa idalom sina nga paggahom kag kon san-o naton maeksperiensiahan ining tumalagsahon nga mga pagpakamaayo.—Lucas 2:8-11.

[Mga retrato sa pahina 5]

Paano mo ginahanduraw si Jesus karon?

[Retrato sa pahina 6]

Ngaa gintawag si Jesus nga “ang katapusan nga Adan”?