Ano Abi Kon Manaad nga Indi Makigsekso?

SINING karon lang nga tinuig, ang mga panaad tuhoy sa pagkaulay ukon pagdumili gikan sa seksuwal nga buhat, subong sang “Indi makigsekso kon indi kasal,” nangin popular sa mga pamatan-on. Ini nga mga panaad nagapakita sang dalayawon nga mga tulumuron kag nahisanto sa mga sugo sang Biblia. (1 Corinto 6:18; Efeso 5:5) Apang, ginaduhaduhaan ang pagtuman sini nga mga panaad. Suno sa isa ka surbe, mga 60 porsiento sang mga tin-edyer ang nagguba sang ila panaad sa sulod lang sang isa ka tuig.

Dugang pa, ginakabalak-an man ang paghangop sang pila ka pamatan-on tuhoy sa “pagdumili gikan sa seksuwal nga buhat” kag “pagkaulay.” Sanday Charlene C. Giannetti kag Margaret Sagarese nagsulat sa ila libro nga Boy Crazy!: “Ang paglapnag sang seksuwal nga mga buhat paagi sa baba kag buli, ginaangot sang mga eksperto sa mga kabataan nga luyag magpabilin nga ‘ulay.’ Suno sa ila ang bisan anong buhat nga wala sing seksuwal nga paghirupay indi pagpakigsekso.”

Maathag nga ini nga pagtamod lapnag kaayo. Pagkatapos nga mainterbyu ang kapin sa isa ka libo ka tin-edyer, ang isa ka awtor nagsiling: “Daw mga isa ukon duha sa isa ka gatos ang nagakabig sa oral nga pagpakigsekso nga isa gid ka pagpakigsekso.” Nagdugang sia: “Dapat gid ninyo mahibaluan nga ayhan amo sini ang ginahunahuna sang imo anak nga tin-edyer kag ayhan bisan sang imo anak nga wala pa magtin-edyer.”

Nahibaluan sang mga nagasunod sa talaksan sang Biblia nga ang oral nga pagpakigsekso ukon pagpakigsekso paagi sa buli—subong sang ginapakita sang pagtawag sa sini maathag nga pagpakigsekso. Nagsugo ang Biblia nga ‘maglikaw sa pagpakighilawas’ (“mangin . . . bug-os nga hilway sa seksuwal nga imoralidad,” Today’s English Version) nga nagadalahig sang tanan nga porma sang ginadumilian nga pagpakigsekso.—1 Tesalonica 4:3.