Kahamungayaan Para Kay Sin-o?

NAGAPUYO kita sa isa ka mahamungayaon nga kalibutan. Daw indi bala mapatihan? Ang matuod, tuman kadamo ang kuarta sang pila ka pungsod amo nga indi nila masarangan nga gastuhon ini tanan. Ginabanabana nga sobra sa $60 trilyones ang kabilugan nga balor sang mga produkto kag mga serbisyo sa bug-os nga kalibutan sang tuig 2005. Kon ipanagtag ining daku nga produksion sa mga pumuluyo sa duta, ang kada tawo nga nagakabuhi karon magabaton sing mga $9,000. Kag nagadugang pa ini.

Apang ang kahamungayaan sa bug-os nga kalibutan tuhay sa mahimo nga ginapaabot sang isa. Suno sa sining karon lang nga publikasyon sang Nasyones Unidas, mas daku pa ang manggad sang tatlo sa pinakamanggaranon nga tawo sa kalibutan sangsa gintingob nga produkto sang 48 ka pinakaimol nga mga pungsod. Kag nagsiling ang UN Development Programme nga 2.5 bilyones ka tawo ang nagahimakas nga mabuhi sa kantidad nga kubos sa $2 sa isa ka adlaw. Ginatos ka milyon ang wala sing husto nga pagkaon kag matinlo nga tubig.

Sa Estados Unidos, ginatun-an sang mga sosyologo ang isa ka grupo nga ginatawag nila nga “halos imol.” Daku gid ang posibilidad nga magaimol sila. Walay sapayan sang daku nga manggad sang pungsod, kapin sa 50 milyones ka tawo didto ang amo sini ang kahimtangan.

Ngaa tuman kadamo nga kuarta ang ginapatago sa mga bahandian kag mga bangko sa bug-os nga kalibutan samtang tuman kadamo naman nga tawo ang imol? Ngaa tuman kadamo ang halos wala sing oportunidad nga makapanginpulos sa nagadamo pa nga manggad sang kalibutan?

[Blurb sa pahina 3]

Mas manggaranon ang tatlo ka pinakamanggaranon nga tawo sa kalibutan sangsa gintingob nga 48 ka pinakaimol nga mga pungsod

 [Retrato sa pahina 2, 3]

Ang kita sang nagapamugon nga mga bata sa sining pabrika sang tisa mga beinte singko pesos sa isa ka adlaw

[Credit Line]

© Fernando Moleres/ Panos Pictures

[Credit Line sang retrato sa pahina 3]

© Giacomo Pirozzi/Panos Pictures