SANG nagligad nga kapin sa 550 ka tuig, ginsugdan sang Aleman nga imbentor nga si Johannes Gutenberg ang pag-imprinta nga nagagamit sing movable type, buot silingon, ginadihon ang indibiduwal nga letra sang mga tinaga. Ang nahauna nga talalupangdon nga libro nga gin-imprinta niya amo ang Biblia. Sugod sadto, tuman kadamo na nga mga libro nga may lainlain nga mga topiko ang naimprinta. Apang, ang pinasahi gid sa sini amo ang Biblia.

• Ginabanabana nga kapin sa 4.7 bilyones ka Biblia (kompleto ukon indi) ang naimprinta na. Lima ka pilo ang kalabawon sini sa masunod nga pinakalapnag nga publikasyon, ang Quotations From Chairman Mao.

• Kasan-o lang, kapin sa 50 milyones ka kopya sang Biblia ukon mga bahin sini ang napanagtag sa sulod lamang sang isa ka tuig. “Ang Biblia amo ang pinakamabakal nga libro kada tuig,” siling sang isa ka report sang magasin nga The New Yorker.

• Ang kabug-usan ukon mga bahin sang Biblia nabadbad na sa kapin sa 2,400 ka lenguahe. Ang iban nga mga bahin sang Biblia mabasa na sa mga lenguahe nga ginahambal sang kapin sa 90 porsiento sang pumuluyo sa bug-os nga duta.

• Mga katunga sang mga manunulat sang Biblia ang nakatapos sang ila mga sinulatan antes matawo si Confucius, ang kilala nga Insik nga mangin-alamon, kag si Siddhārtha Gautama, ang tagtukod sang Budhismo.

• Daku gid ang impluwensia sang Biblia sa taliambong, lakip ang pila sang pinakabantog nga mga painting, musika, kag literatura sa kalibutan.

• Nakalampuwas ang Biblia, walay sapayan sang mga pagdumili sang mga gobierno, pagpanunog sang relihioso nga mga kaaway, kag sang mga pag-atake sang mga kritiko. Wala na sing iban pa nga libro nga ginpamatukan sing subong sini, apang nakalampuwas gihapon.

Indi bala talalupangdon gid ini nga mga katunayan? Sa pagkamatuod, ang dalayawon nga mga detalye kag mga rekord lamang wala nagapamatuod nga ang Biblia masaligan na. Masunod, usisaon naton ang lima ka rason kon ngaa nakumbinsi ang minilyon ka tawo nga masaligan gid ang Biblia.