Gikan sa Amon mga Bumalasa

Pagbulig sa mga Pamatan-on nga Maatubang ang Hangkat (Marso 2007) Disiotso anyos ako karon, amo nga may masiling gid ako tuhoy sa cell phone kag Internet. Nakigkomunikar ako sa mga indi ko kilala sa Internet. Apang malain sa ulihi ang akon nadangatan bangod sining malain nga mga kaupdanan. Amat-amat nga nagluya ang akon kaangtanan sa Dios. Nagpasugot pa gani ako nga makigkita sa pila sini nga mga tawo. Kag makapasubo nga nagresulta ini sa imoral nga paggawi. Kabay pa nga mabuligan sini nga artikulo ang iban agod malikawan ang kasakit kag kalisod nga akon naeksperiensiahan. Indi gid ini mahapos kay indi ako pirme makatulog kag nagabalikbalik sa akon hunahuna ang akon malain nga inagihan, apang nagapanikasog gid ako nga indi madaug ni Satanas.

B. R., Estados Unidos

Ngaa Nagakalipong Ako? (Abril 2007) Makapaumpaw gid nga mahibaluan nga indi lang gali ako ang nagakalipong. Sa sini nga artikulo, daw si Jehova mismo ang nagasiling sa akon, “Nakita ko ang nagakatabo sa imo, gani luyag ko nga mapalig-on ka.”

I. R., Madagascar

Isa ka Butang nga Mas Mapinadayunon Pa Sangsa Taliambong (Abril 2007) Daku gid ang pagpasalamat ko sa sini nga artikulo. Sa sulod sang anom ka tuig, ginadumalahan ko ang duha ka puesto sa pagpangretrato. Madinalag-on gid ang akon negosyo. Palangga ko gid ini nga obra kay diri ko mapabutyag ang akon pagkamapahituon. Apang narealisar ko sang ulihi nga samtang nagamadinalag-on ako kag nagabantog sa akon obra, amat-amat man nga nagaluya ang akon pag-alagad kay Jehova. Nawili gid ako sa akon obra amo nga diutay na lang ang akon tion sa iban nga butang. Kinahanglan nga may bag-uhon gid ako. Gani ginbiyaan ko ang akon obra kag gindugangan ko ang akon tion sa pag-alagad sa Dios. Ang kaayawan kag kalipay sa paghimo sing mga retrato indi gid mapaanggid sa kalipay nga akon nabatyagan sa pag-alagad sa Dios subong isa ka Cristiano.

A. P., Estados Unidos

Pamangkot sang mga Pamatan-on . . . Bagay Bala Sia sa Akon? (Mayo 2007) Sining karon lang, naluyag ako sa isa ka tawo nga abi ko bagay gid sa akon. Apang, sa tapos ko mabasa ang artikulo, nabinagbinag ko nga indi gid man gali importante ang mga kinaiya nga naluyagan ko sa iya. Narealisar ko sa sini nga artikulo nga ang mas importante sa palamanhon amo ang diosnon nga mga kinaiya kag kon paano niya ginapakig-angutan ang iban. Nagapasalamat gid ako kay Jehova kay may amo sini nga mga artikulo nga makaamlig kag makagiya sa mga pamatan-on.

E. P., Estados Unidos

Pangilalaha ang mga Tawo sa East Timor (Mayo 2007) Nanamian gid ako sa pagbasa sini nga artikulo. Una ko nga nabatian ini nga pungsod sang ginbalita sadto ang mga inaway sa sini nga lugar. Sugod sadto, ginakabalak-an ko kon paano makatibawas ang mga taga-East Timor kag kon paano naapektuhan ang pagbantala sang mga Saksi ni Jehova didto. Nagdayaw gid ako sa kinaiya sini nga mga tawo, nga wala gid magpadala sa mapiot nga kahimtangan, sa baylo padayon sila nga naghimakas sa ila adlaw-adlaw nga pagkabuhi. Indi ko gid malipatan ang kalig-on sang mga taga-East Timor kag ang matam-is nga mga yuhum ni Jacob kag sang iya pamilya.

Y. M., Japan