Pagbantay sa Kalibutan

▪ “Tuman kadamo sang mga ebidensia sa siensia nga nagasakdag sa ebolusyon nga dayag naton nga makita kag nagadugang ini sang aton ihibalo sa kabuhi.”​—POPE BENEDICT XVI.

▪ “Nagkarankaran ang mga opisyales . . . sa pagpanglaghap sing kuarta agod inspeksionon kag kay-uhon ang mga 74,000 ka ‘depektibo nga desinyo’ sang mga taytay sa E.U., sa tapos marusdak ang 40-anyos nga malaba nga taytay sang Minneapolis [Minnesota] sa tion sang trapik sa kataason nga 60 ka tapak sa Suba Mississippi, nga nagpatay [sa 13 ka tawo].”​—THE WEEK, U.S.A.

Ang Kalabanan Nagalapas sa Kasuguan

“Ang pagpati nga ‘ang kalabanan nagatuman sa kasuguan’ indi matuod,” siling sang pamantalaan nga Times sa London. “Ang kalabanan nga taga-Britanya nag-ako nga ginatuman lamang nila ang kasuguan nga luyag nila tumanon kag kon san-o nila luyag.” Ginapakita sang pagpanalawsaw para sa Centre for Crime and Justice Studies sa King’s College, sa London, nga ang “talahuron” nga mga tawo sang sosiedad amo sa masami ang nagalapas sang kasuguan. Ikatlo nga bahin sa mga gin-interbyu ang nagabayad sing cash agod indi pagsukton sang buhis, ikatlo nga bahin man ang wala nagauli sang sobra nga sensilyo, kag ikalima nga bahin ang nag-ako nga nangawat sila sa ulubrahan. Naghinakop ang mga manugpanalawsaw nga ini nga mga batasan ‘mas sibu nga palatandaan sang moral nga kahimtangan sang katilingban sangsa kasingki kag mga krimen sa kalye.’

Ang Nuklear nga mga Hinganiban, Yara Bala “sa mga Kamot sang Dios”?

Ginpakabulahan sang Ortodokso nga Simbahan sa Rusya ang hilikuton sang mga tawo nga may responsibilidad sa pagtago kag pagmentinar sang mga nuklear nga hinganiban sang Rusya. Sa isa ka mensahe nga ginbasa sa seremonya sa Simbahan sang Christ the Savior, sa Moscow, kag ginreport sa pamantalaan nga Krasnaya Zvezda, ang pinuno sang Ruso nga Ortodokso, nga si Alexis II, nagsiling: “Ginapangamuyo ko sa Dios . . . nga ang nuklear nga mga hinganiban nga inyo ginhimo kag ginpatago sa inyo kabay nga yara sa mga kamot sang Dios kag gamiton lamang sa pagpakugmat sa iban kag sa pagbalos sa mga pungsod nga magasalakay.”

Dugos sa Dumaan nga Israel

“Ang paglaragway sang Biblia sa Israel . . . subong ‘duta sang gatas kag dugos’ (ukon subong duta sang dugos), napamatud-an sang nakutkutan nga mga butang” siling sang Institute of Archaeology sa Hebrew University sa Jerusalem. May nasapwan sa Tel Rehov, sa Beth Shean Valley sang Israel, nga nagalakip sing tatlo ka raya sang daw mga banga nga balay sang putyukan nga mga tatlo ka tangkas. Ini nga mga balay sang buyog napetsahan sing “ikapulo tubtob sa ikanuebe nga siglo B.C.E.,” kag “mahimo nagaunod sing mga 100 ka balay sang buyog,” siling sang report. Ginabanabana sang mga nagasagod sang putyukan nga ining duog mahimo nagpatubas anay sing “mga tunga sa tonelada nga dugos” kada tuig.

Ginauna ang mga Hinuptanan

Suno sa isa ka surbe sa Internet, “isa sa apat ka taga-Australia ang nagasiling nga ang ila hinuptanan amo ang isa sa labing importante nga bahin sang pamilya, mas importante pa gani sangsa ila asawa, bana ukon mga ginikanan,” siling sang report sang The Sydney Morning Herald sa Internet. Suno sa isa sa tatlo nga nakigbahin sa surbe nga ginhimo sang isa ka kompanya sa Australia, “mas madamo nga tion kag kuarta ang ginagamit nila sa ila hinuptanan sangsa ila kaugalingon nga pagpabulong.” Ang mga pagpabulong sa mga hinuptanan nagalakip sang magnetic resonance imaging, keyhole surgery, bone graft, chemotherapy, organ transplant, hip replacement, kag lakip na ang operasyon sa utok.