Pagbantay sa Kalibutan

▪ “Paagi sa Subaru kag Keck nga mga teleskopyo, natukiban sang isa ka grupo sang mga astronomo sa Mauna Kea [Hawaii] ang tuman kadaku nga galaksiya nga may kalayuon nga 200 milyones ka light year. Amo ini ang pinakadaku nga butang nga natukiban.”​—SUBARU TELESCOPE WEB SITE, JAPAN.

▪ Ang Office for National Statistics sang United Kingdom nagreport nga “ang 2006 amo ang may pinakadiutay nga ginkasal [sa Inglaterra kag Wales] sa sulod na sang 110 ka tuig. Nagadamo na gid ang luyag nga magpuyopuyo lang.”​—THE GUARDIAN WEEKLY, BRITANYA.

▪ Suno sa Pew Forum on Religion and Public Life, “44% sang mga adulto ang nagsaylo sa iban nga relihion. Ang iban naman nga wala gid anay sing relihion nag-entra na sa relihion kag yadtong may relihion anay, wala na gid nakig-upod sa bisan ano nga relihion.”​—U.S.A.

Pagpakig-sex kay Bisan Sin-o sa mga Kolehiyo

‘Sa publiko, pribado kag Katoliko nga mga kolehiyo kag unibersidad, uso gid sa mga estudyante ang pagpakig-sex kay bisan sin-o, magluwas lang sa pila ka Protestante nga mga kolehiyo.’ Amo sini ang komento ni Donna Freitas, isa ka Katoliko nga teologo kag kabulig nga propesor sang unibersidad, pagkatapos nga gintun-an niya ang pagginawi sang mga estudyante tuhoy sa sekso kag relihion sa mga kolehiyo sa Amerika. Suno sa National Catholic Reporter, si Freitas nagsiling nga bangod ang relihion wala sing talaksan sa moral nangin kinaandan na lang ang pagpakig-sex kay bisan sin-o kag ‘wala sing mahimo ang relihion agod tapnaon ini.’

May Bayad ang Pagsagod sa mga Bata nga Babayi

Ginatanyagan sang panguluhan sang India ang imol nga mga ginikanan sing mga 3,000 dolyares (U.S.) sa pagpadaku sang ila bata nga babayi, report sang BBC News. Makabaton ang mga pamilya sing kuarta kon may mabun-ag nga bata nga babayi sa ila pamilya tubtob mag-18 anyos sia. Bisan gindumilian na ang pagpahulog sa mga lapsag nga babayi sang 1994, lapnag ini gihapon. Sa pagkamatuod, ginabulubanta nga mga 10 milyones ka babayi nga lapsag ang ginpahulog sang nagligad nga 20 ka tuig. Gani, nagdiutay gid ang mga babayi sa pila ka duog. Sa bug-os nga pungsod, suno sa 2001 nga sensus, 927 lang ang babayi sa kada 1,000 ka lalaki nga wala pa mag-anom ka tuig, kag amat-amat pa gid nga nagadiutay ang babayi. Sa isa ka bahin sang pungsod, 793 lang ang babayi sa kada 1,000 ka lalaki.

Reaksion sang mga Pispis sa Gahod

Ang pila ka pispis dapat maghuni sing matunog agod mabatian sila sa magahod nga siudad. Makapairitar sa mga tawo ang gahod, pero mahimo nga peligro gid ini sa kabuhi sang mga pispis, siling sang magasin nga New Scientist. Ngaa? Bangod ang gahod makaapektar sa pag-amba sang “sulog agod arigayon ang munga kag markahan ang ila teritoryo.” Gani agod mabatian sila, ginapatunog ukon ginapatagsing sang pila ka pispis ang ila huni kag ang iban sa gab-i nagaamba. Pero indi lamang ang mga pispis sa siudad ang nagahimo sini kundi pati na ang mga nagaistar malapit sa “busay kag masulog nga suba,” siling sang magasin.