Mga Halimbawa sang Madinalag-on nga Pamilya—Bahin Uno

Subong sang ginapakita sining pinasahi nga gua sang Magmata!, ang madinalag-on nga mga pamilya may mga problema man. Indi na kita matingala sa sini kay nagakabuhi kita subong sa panahon nga ginalaragway sang Biblia nga “makahalanguyos nga mga tion nga mabudlay atubangon.” (2 Timoteo 3:1) Gani indi gid malikawan nga may mga problema ang tanan nga pamilya.

Dumdumon naton nga ang kadalag-an sang isa ka pamilya wala lamang nagadepende sa maayo nga kahimtangan. Sa baylo, si Jesus nagsiling: “Malipayon ang mga mahunahunaon sang ila espirituwal nga kinahanglanon.” (Mateo 5:3) Ang mga pamilya nga may maayo nga relasyon sa Dios kag nagasunod sa mga prinsipio sang Biblia nangin madinalag-on bisan pa may mga problema sila. Binagbinaga ang masunod nga mga halimbawa.

Pag-atipan sa bata nga may diperensia. Ginapabaloran gid sang Biblia ang pag-atipan sa pamilya, kag nalakip sa sini ang pag-atipan sa mga may sablag sa lawas. Nagsiling ini: “Kon sin-o man ang wala nagaaman para sa mga natungod sa iya, kag ilabi na para sa mga katapo sang iya panimalay, ginapanghiwala niya ang pagtuo kag malain pa sa tawo nga wala sing pagtuo.”—1 Timoteo 5:8.

Sa pahina 15, isaysay sang isa ka amay nga si Victor nga taga-South Africa, kon paano nila gin-atipan nga mag-asawa ang ila bata nga may diperensia sa sulod na sang sobra sa kuarenta ka tuig.

Gin-adoptar lang ako. Ang mga prinsipio sa Biblia makabulig sa isa ka tawo nga mangin balanse sa iya pagpabalor sa kaugalingon bisan pa nga ginbiyaan sia sang iya matuod nga ginikanan. Ang matuod, ang Biblia nagsiling nga si Jehova nga Dios “nanginmanugtabang” sang mga ilo.—Salmo 10:14.

Sa pahina 16, isaysay sang isa ka babayi nga si Kenyatta nga taga-United States, kon paano niya naatubang ang kasakit tungod wala gid niya makilala ang iya matuod nga ginikanan.

Pag-atubang sa kamatayon sang isa ka ginikanan. Kon ang isa mapatyan sang amay ukon iloy mahimo nga magbatyag sia sing tuman nga kasakit nga daw indi gid madula. Pero, makabulig ang Biblia. Ang Awtor sini nga si Jehova, amo “ang Dios nga may bug-os nga paglugpay.”—2 Corinto 1:3.

Sa pahina 17, isaysay ni Angela nga taga-Australia, kon paano sia nabuligan sang iya kaangtanan sa Dios nga maatubang ang kasakit nga mapatyan sing hinigugma.

Ang tanan nga pamilya may mga problema gid nga dapat atubangon. Pareho sa mga eksperiensia nga makita naton sa masunod nga mga pahina, ang mga nagatuman sa mga prinsipio sa Biblia nabuligan nga mangin madinalag-on sa pag-atubang sini nga mga problema.

 [Kahon/Mga retrato sa pahina 15]

Pag-atipan sa Amon Bata nga May Diperensia

Panugiron ni Victor Maynes, South Africa

“Sugod sang natawo si Andrew, kami na ang nagapailis sa iya, nagapaligo sa iya, kag kon kaisa ginahungit pa gani namon sia. Kuarentay kuatro anyos na sia subong.”

NATALUPANGDAN namon nga may diperensia si Andrew sang wala gihapon sia nagalakat bisan isa na sia ka tuig. Dayon, ginkombulsion sia. Gindala namon sia sa ospital, kag nabal-an namon nga may kuyap sia. Pero magluwas sini, sang ginpaeksamin pa gid namon sia, nakompirmar nga may diperensia ang iya utok.

Madamo kami sing gintilawan nga paagi sa pagbulong, asta nga nakontrol ang pag-atake sa iya. May tion nga kinahanglan sia magtomar sing apat ka lainlain nga bulong, tatlo ka beses kada adlaw. Siempre, indi sini mapaayo ang kondisyon sang iya utok. Gani bisan 44 anyos na sia subong, ang iya pensar pareho lang sa lima ukon anom ka tuig nga bata.

Ginsilingan kami sang mga doktor nga ibutang si Andrew sa isa ka pasilidad nga nagaatipan sa mga may diperensia, pero wala kami nagpasugot. Masarangan man namon sia atipanon, gani nagdesisyon kami nga ipauli sia sa balay bisan pa nga mabudlay ini sa amon.

Ang amon bug-os nga pamilya amo ang nagaatipan sa iya. Daku gid ang nabulig sang mga utod ni Andrew nga duha ka babayi kag isa ka lalaki nga ara pa sa balay, kag nagapasalamat gid ako sa ila! Isa pa, bilang mga Saksi ni Jehova, ginsuportahan gid kami sang amon mga kaupdanan sa kongregasyon. Kon kaisa, ginadalhan nila kami sang pagkaon kag ginabantayan pa nila si Andrew para mahimo namon ang amon mga hilikuton subong mga ministro, kag maatipan ang iban pa nga butang.

Pirme gid namon ginadumdom ang ginasiling sa Isaias 33:24, sa diin nagsaad ang Dios nga sa ulihi “ang pumuluyo indi magsiling, ‘Nagamasakit ako.’” Nagapati gid kami nga tumanon sang Dios ang iya katuyuan nga bag-uhon ang kahimtangan sang kalibutan kag dulaon ang tanan nga balatian. (2 Pedro 3:13) Ginalauman gid namon ang tion nga magaayo na si Andrew. Samtang wala pa ini, nagapati gid kami sa ginsiling ni Jesus nga kon unahon namon ang Ginharian sang Dios, ihatag niya ang amon mga kinahanglanon. (Mateo 6:33) Napamatud-an gid namon ini. Wala gid kami nawad-an sang amon mga kinahanglanon.

Matuod, may mga kahimtangan nga indi puede atipanon sa balay ang isa ka miembro sang pamilya nga may diperensia. Pero para sa mga nagaatipan sa ila sa balay, ginapanugda ko nga mangamuyo gid kamo pirme. (1 Pedro 5:6, 7) Ikaduha, palanggaa gid ang inyo bata, kag dumduma nga may ikasarang gihapon ang inyo bata nga kilalahon kag higugmaon si Jehova nga Dios. (Efeso 6:4) Ikatlo, dapat magbuligay ang bug-os nga pamilya. Ikap-at, dumduma nga sa inyo lamang puluy-an mabatyagan sang inyo bata nga ginapalangga gid sia. Siempre, lainlain man ang mga kahimtangan. Pero wala gid namon ginhinulsulan ang amon desisyon nga atipanon si Andrew sa amon puluy-an. Para sa akon, sia ang pinakamahapos palanggaon nga bata kag ang pinakamahapos palanggaon nga tawo nga nakilala ko.

 [Kahon/Mga retrato sa pahina 16]

Gin-adoptar Lang Ako

Panugiron ni Kenyatta Young, United States

“Maayo pa kon manak ka, kay ang isa sa ginakilala mo nga ginikanan, matuod mo gid nga ginikanan. Pero tungod gin-adoptar lang ako, pareho sila nga indi ko matuod nga mga ginikanan, gani wala ako kahibalo kon kay sin-o ako nag-ilog.”

WALA gid ako makahibalo kon sin-o ang akon amay, kag wala ko man makilala ang akon iloy. Sang ginabusong niya ako, nagapahubog sia kag naga-drugs. Sang natawo ako, ginbutang ako sa isa ka balay alaypan. Ginsaylosaylo ako sa madamo nga balay alaypan asta nga may nag-adoptar sa akon antes ako magduha ka tuig.

Nagsiling ang akon ginkilala nga amay nga sang ginpakita sa iya sang nagabantay sa amon ang akon retrato, nagsiling sia nga gusto niya ako adoptaron. Nagustuhan ko gilayon ang akon bag-o nga iloy. Ginsilingan ko sia nga sia na ang akon nanay kag gusto ko mag-upod sa ila balay.

Pero nadumduman ko nga sang bata pa ako, nahadlok ako nga makahimo sing sala kay basi ibalik nila ako sa balay alaypan. Pamatyag ko, indi ako puede magbisyo ukon magmasakit pareho sang iban nga mga bata. Nagahalong pa gani ako nga indi gid pagtrangkasuhon! Pirme ako ginapasalig sang akon mga ginikanan nga palangga gid nila ako kag indi gid nila ako pagpabay-an.

Bisan daku na ako, ginapakigbatuan ko gihapon kon kaisa ang pagbatyag nga wala ako ginapalangga indi pareho sang iban nga mga bata nga nagdaku sa ila matuod nga mga ginikanan. Kon daw mabaton ko na ang akon kahimtangan kag wala ko na ini ginapanumdom, may mahambal sa akon sing, “Dapat ka gid magpasalamat kay may maayo ka nga mga ginikanan nga nagsakripisyo sa pag-adoptar sa imo!” Nagapasalamat gid ako nga gin-adoptar ako, pero kon mabatian ko ang amo sini nga mga komento, pamatyag ko may diperensia ako kag siguro kabudlay gid sa akon palanggaon.

Daw indi ko gihapon mabaton nga posible nga indi ko na makilala ang akon matuod nga amay. Kon kaisa, nagasakit gid ang akon buot kon madumduman ko nga wala gid ginkay-o ni Nanay ang iya kabuhi agod maatipan niya ako. Pamatyag ko wala gid ako sing pulos. Pero kon kaisa naluoy man ako sa iya. Pirme ko ginapensar nga kon magkitaay gid man kami, sugiran ko sia nga nangin maayo ang akon kabuhi kag indi sia dapat magkasubo nga ginpanghatag niya ako.

Ang mga ginikanan nga nag-adoptar sa akon mga Saksi ni Jehova, kag ang isa sa pinakamaayo nga regalo nga akon nabaton sa ila amo ang ihibalo sa Biblia. Makapaumpaw gid para sa akon ang ginsiling sang Salmo 27:10: “Kon magbiya sa akon ang akon amay kag akon iloy, niyan ang GINOO magasapopo sa akon.” Napamatud-an ko gid ini. Kag may positibo man nga mga resulta tungod gin-adoptar ako. Halimbawa, nanamian gid ako mamati sa mga tawo nga nagaistorya parte sa ila kabuhi. Siguro amo sini ang akon ginabatyag bangod wala ako makahibalo kon diin ako naghalin. Palangga ko ang mga tawo, kag importante gid ini sa amon hilikuton subong Cristianong mga ministro. Bilang isa sa mga Saksi ni Jehova, pirme ko ginasugid sa mga tawo ang mga impormasyon parte sa Biblia kag nagabatyag ako nga may balor kag katuyuan ang akon kabuhi. Kon ginasubuan ako, nagagua ako kag nagabulig sa iban. Paagi sa pagtudlo sing Biblia sa mga tawo, nakita ko nga puede man ako mangin suod sa ila. Ang tagsa sa aton may ara gid istorya sang kabuhi.

 [Kahon/Mga retrato sa pahina 17]

Pag-atubang sa Kamatayon sang Isa ka Ginikanan

Panugiron ni Angela Rutgers, Australia

“Sang napatay si Tatay, pamatyag ko daw ginkuha sa akon ang isa nga akon ginasandigan. Nadula na ang tawo nga para sa akon nakahibalo sang tanan kag makasolbar sang tanan.”

NAPULO na ka tuig nga napatay si Tatay. Tin-edyer pa lang ako sadto. Anom ka bulan antes sia napatay, gin-operahan sia, kag samtang ara pa sia sa recovery room, ginsilingan kami sang doktor nga wala na sila sing mahimo para mag-ayo si Tatay. Sang nabatian ini ni Nanay, gusto niya nga mahangpan pa gid ang kahimtangan ni Tatay. Ang akon naman magulang nga lalaki nalipong, kag indi ko maintiendihan ang akon ginabatyag, kag daw wala ako sing madangpan. Pagligad sang anom ka bulan, napatay si Tatay.

May mga tion nga indi ko mahangpan ang akon kaugalingon. Gusto ko nga intiendihon ako sang akon mga abyan, pero indi man ako gusto nga kaluuyan nila ako. Gani ginatinguhaan ko nga taguon sa ila ang akon ginabatyag. Sa pihak nga bahin, nagapati ako nga kon tugutan ko ang akon kaugalingon nga mag-enjoy kaupod nila, mahimo pensaron nila nga normal na liwat ang akon kabuhi, pero ang matuod indi. Kon madumduman ko ini subong, narealisar ko nga daku gid ang pagpasensia sang akon mga abyan sa akon!

Ang matuod, ginabasol ko gihapon ang akon kaugalingon sa kamatayon ni Tatay. Tani pirme ko ginhambal sa iya nga palangga ko gid sia. Tani pirme ko sia ginhakos kag pirme ko sia gin-istorya. Bisan pa ginasilingan ko ang akon kaugalingon nga, ‘Indi gusto si Tatay mo nga amo sina ang pensaron mo,’ indi gihapon ako mahim-os.

Subong isa sa mga Saksi ni Jehova, nalugpayan ako sang paglaum sang pagkabanhaw nga ginatudlo sang Biblia. (Juan 5:28, 29) Ginapanumdom ko nga daw naglakat lang si Tatay sa iban nga pungsod kag sa ulihi mapuli man sia, wala lang ko galing kabalo kon san-o. Daw katingalahan nga kon hambalan ako sang mga tawo nga, “Mabanhaw man si Tatay mo,” wala ako napalig-on. Sa akon lang, ‘Gusto ko mabuhi liwat si Tatay subong!’ Pero nabuligan ako sang ilustrasyon parte sa tatay nga nagkadto sa iban nga pungsod. Ginapakita sini nga may pagkabanhaw sa palaabuton kag nabuligan ako nga mabatas ang kasakit nga mapatyan.

Daku man ang nabulig sang amon kaupod nga mga Cristiano. Madumduman ko pa nga may isa nga nagsiling sa akon nga nabudlayan sia mag-istorya sa akon parte sa pagkapatay ni Tatay, pero nagsiling sia nga pirme gid niya ako ginadumdom kag ang akon pamilya. Wala ko gid ginkalimtan ang iya ginsiling. Nakabulig ini sa akon sa mga tion nga daw wala gid sing nagaistorya sa akon. Nahibaluan ko nga bisan wala sila sing may ginahambal, nagaulikid gid sila sa amon pamilya. Nagpalig-on gid ini sa akon!

Mga apat ka bulan sa tapos napatay si Tatay, nangin masako pa gid si Nanay sa pagwali, kag nakita ko nga malipayon gid sia sa sini. Amo nga nag-upod man ako sa iya. Makalilipay gid ini, kay ang pagbulig sa iban nakabulig man sa akon nga maatubang ang kasubo. Nagpabakod ini sang akon pagtuo sa Pulong ni Jehova kag sa iya mga saad. Nakabulig man ini sa akon nga isentro ang akon kabuhi sa iban nga mga butang.