ANO ang imo pagtamod sa mga tawo nga lain ang kolor sang panit kag rasa? Ginatamod mo bala sila nga pareho sa imo? Makapasubo nga para sa iban nga tawo, ang ila rasa labaw sangsa iban. Suno sa isa ka diksionaryo, ang rasismo “isa ka pagpati nga ang rasa amo ang panguna nga rason kon ngaa lainlain ang mga kinaiya kag mga ikasarang sang tawo, kag bangod sini ginatamod sang kada rasa nga mas maayo sila sangsa iban nga rasa.”

Ini nga pagpati nagresulta sa daku gid nga kahalitan. Ang pagpati sang iban nga rasa nga labaw sila amo “ang nangin kabangdanan sang pagpanakop ukon pagpang-ulipon sa iban nga grupo sang tawo,” sulat ni Propesor Wen-Shing Tseng sa iya libro nga Handbook of Cultural Psychiatry. Nagsiling pa gid sia nga ang rasa amo ang ginagamit nga “rason kon ngaa magkatuhay ang tindog sa katilingban, kahimtangan sa pangabuhi, kag pagginobierno.” Bisan subong, may rasismo gihapon sa madamo nga bahin sang kalibutan. Pero may mabakod bala nga basihan ining makahalalit nga pagpati? Ano ang ginasiling sang siensia kag Biblia parte sa sini?

Ang mga nadiskobrehan sa genetics (pagtuon kon paano ginapanubli ang mga kinaiya kag hitsura paagi sa mga gene) nagapakita nga indi matuod nga may isa ka rasa nga labaw sangsa iban. Sang gintun-an sang mga researcher ang mga tawo halin sa lainlain nga kontinente, nakita nila nga mga 0.5 porsiento lamang ang kinatuhayan sa DNA sang kada duha ka tawo halin sa lainlain nga lugar sa kalibutan. * Kag mga 86 asta 90 porsiento sa sini nga kinatuhayan ang nakita sa mga tawo nga pareho sing rasa. Gani, mga 14 porsiento lamang sang 0.5 porsiento nga kinatuhayan sa DNA ukon mas manubo pa sa sini ang nakita sa mga tawo nga magkatuhay sing rasa.

Bangod “halos wala sing kinatuhayan ang gene sang mga tawo” siling sang dyurnal nga Nature, “ang genetics isa ka importante nga paagi kag makabulig agod masanagan ang mga tawo kag mauntat na ang binais parte sa rasa.”

Indi bag-o ini nga pagpati. Sugod sang 1950, sunodsunod nga nagpagua sing mga deklarasyon ang United Nations Educational, Scientific, and Cultural  Organization agod mapauntat ang rasismo. Ini nga mga deklarasyon ginpangunahan sang mga anthropologist, geneticist, kag mga sociologist. Pero nagpadayon gihapon ang rasismo. Maathag nga indi pa bastante ang pag-edukar sa mga tawo. Dapat malab-ot ang tagipusuon, ukon ang nasulod nga pagkatawo. “Gikan sa tagipusuon nagagikan ang malaut nga pangatarungan,” siling ni Jesucristo.—Mateo 15:19, 20.

Ang Biblia ginsulat agod pahulagon ang mga tawo. Halimbawa, magluwas nga ginasiling sini ang kamatuoran nga napamatud-an sang siensia nga “ginhimo [sang Dios] gikan sa isa ka tawo ang tagsa ka pungsod sang mga tawo, agod magpuyo sa bug-os nga kadaygan sang duta,” ang Biblia nagsiling pa gid: “Ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sang pagkamatarong kalahamut-an sa iya.” (Binuhatan 10:34, 35; 17:26) Wala ka bala napahulag nga higugmaon ang Dios?—Deuteronomio 32:4.

Gusto ni Jehova nga Dios nga ipakita naton nga ginahigugma naton sia paagi sa pag-ilog sa iya. “Mangin manug-ilog kamo sa Dios, subong mga anak nga hinigugma, kag padayon kamo nga maglakat sa gugma,” siling sang Efeso 5:1, 2. Nalakip sa ‘paglakat sa gugma’ ang paghigugma sa mga tawo subong sang paghigugma sang Dios sa ila, bisan ano man ang ila rasa ukon kolor sang panit.—Marcos 12:31.

Indi gusto sang Dios nga mag-alagad sa iya ang mga tawo nga nagahimo pirme sing malain ukon may ginadumtan kag may ginapasulabi nga rasa. (1 Juan 3:15) Ang matuod, madali na lang mag-abot ang tion nga dulaon sang Dios ang tanan nga malaut nga tawo sa duta. Ang mga nagailog lamang sang iya mga kinaiya ang magapabilin. Dayon madula na ang pagdumot kag pagpasulabi sa rasa. Ang tanan nga tawo magasimba sa isa ka Dios kag ang tanan mangin isa ka pamilya.—Salmo 37:29, 34, 38.