Ang Faeroe Islands Ginsugponsugpon nga mga Isla

ANG Faeroe Islands isa ka grupo sang 18 ka magagmay nga mga isla sa kadagatan sang North Atlantic. Diri nagaistar ang mga tawo nga nagahambal sing Faeroese. Sa sining matahom nga mga isla makita ang matag-as nga mga kabukiran kag mga pil-as sa kilid sang dagat. Ang mga balay nga malapit sa baybayon napintahan sing sarisari nga kolor. Kon tingadlaw, tuman gid katahom ang mga bakulod nga natabunan sang berde nga kahilamnan.

Bisan pa ang 48,000 ka pumuluyo sini isa man ka komunidad, indi mahapos ang ila kabuhi. Sang una, de-bugsay nga mga baruto ang ila ginasakyan kag ginakargahan sang mga produkto pakadto sa iban nga mga isla. Nagaagi sila sa matag-as nga mga kabukiran kag mga pil-as pakadto sa iban nga bahin sang isla. Mabudlay diri magpatindog sing mga balay kay ang tanan nga materyales ginahakot sang baruto. Antes sugdan ang pagpatindog, ang mga materyales dapat nahakot na tanan halin sa isa ka gamay nga pantalan.

Ang Una nga mga Pumuluyo

Ang pinakadaan nga narekord nga kasaysayan sang Faeroe Islands ginsulat sang isa ka monghe nga taga-Ireland sang 825 C.E. Suno sa iya, mga isa ka gatos ka tuig antes sia nag-abot, may mga taga-Ireland na nga mga monghe nga nag-istar sa sini nga mga isla. Pero ginabulubanta nga ang komunidad diri nagsugod sang umpisa sang ikasiam nga siglo sang nag-abot si Grímur Kamban halin sa Norway.

 Pagpangisda ang palangabuhian sang mga pumuluyo sadto, pero nagsagod man sila sing mga karnero. Sa Faeroese, ang ngalan nga Føroyar (Faeroe Islands) nagakahulugan sing “Isla sang mga Karnero,” kag asta subong may nagasagod gihapon sang mga karnero didto. Ang de-lana halin sa balahibo sang karnero amo ang proteksion nila sa hangin, ulan, kag tugnaw. Ginasiling pa gani nila nga ‘ang de-lana amo ang bulawan sang taga-Faeroe.’

Asta subong, mas madamo ang karnero sangsa mga tawo sa sini nga mga isla. Dinumaan gihapon ang ila paagi sa pag-ihaw sang karnero kay ginapakabit nila ang karne sa mga payag para mag-uga ini sa hangin. Nagapanamit ini sa karne, amo kon ngaa pinasahi gid ini.

Bangod gamay lang kag malayo ang Faeroe, ang mga pumuluyo sini may mabakod nga kaangtanan sa isa kag isa, kay nagabuligay sila para mabuhi. Ini nga kinaiya makita gihapon bisan pa ginpahapos sang moderno nga transportasyon kag komunikasyon ang pagpakig-angot sa iban nga mga isla.

Ginsugpon sang mga Tanel

Ang una nga tanel sa Faeroe ginbuksan sang 1963. Nagaagi ini sa idalom sang bukid sa pinakabagatnan nga isla sang Suðuroy, kag ginasugpon sini ang duha ka baryo. Para mahimo ang tanel, dungan nga ginkutkot, ginbarinahan, kag ginpalukpan sang dinamita ang magtimbang nga bahin sang bukid.

Ang isa ka tanel nga ginhimo sining karon lang may kadalumon nga mga 150 metros sa idalom sang dagat kag ginasugpon sini ang duha ka mas dalagku nga mga isla. Para mahimo ini, naggamit sila sing 5 metros nga barina para mabuhuan ang dalagku nga mga bato. Ginapalukpan nila dayon sing dinamita ang punta sang buho kag pagkatapos sini, ginapanguha nila ang dalagku nga mga bato para may 5 metros na sila nga buho. Sulitsulit nila ini nga ginahimo asta naglab-ot sing mga 6 kilometros ang tanel. Ginbuksan ini sang Abril 29, 2006.

Bisan pa diutay lang ang pumuluyo sang Faeroe Islands, may 18 ini ka tanel. Ang duha sini nagaagi sa idalom sang dagat kag ginasugpon sini ang mga isla. Ang gobierno nagplano nga magtukod sing duha pa ka tanel nga magasugpon sa mayor nga mga isla. Ang isa sini, ginalauman nga matapos sa 2012. Nagalaba ini sing 11.9 kilometros kag amo ang mangin isa sa pinakamalaba nga tanel sa kalibutan nga nagaagi sa idalom sang dagat.

Isa Pa ka Pinasahi nga Kaangtanan

May isa pa ka grupo sa Faeroe Islands nga ginahiusa sang ila mabakod nga kaangtanan sa Dios. Sila amo ang mga Saksi ni Jehova. Ang una nga mga Saksi diri amo ang duha ka babayi halin sa Denmark. Nag-abot sila sang 1935, kag sang tingadlaw nagpamalaybalay sila para isugid ang mensahe sang Biblia parte sa Ginharian sang Dios. Sang ulihi, ginbaton sang pila ka pumuluyo ang ila makapabakod nga mensahe kag nangin kaupod man nila sa pagwali.—Mateo 24:14.

Sa karon, mga isa ka gatos na ka Saksi ang nagatipon sa ila apat ka Kingdom Hall sa sini nga mga isla. Mapisan gid sila sa pagwali labi na subong kay may maayo na nga mga dalan kag mga tanel nga nagasugpon sa sining matahom nga mga isla sa North Atlantic.

[Retrato sa pahina 17]

Ini nga tanel may kadalumon nga mga 150 metros sa idalom sang dagat kag ginasugpon sini ang duha ka mas dalagku nga mga isla