Kalan-an sang mga Insekto

● Gusto gid sang mga insekto ang pagkaon nga mahapos pangitaon kag madamo sing kalori. Makuha nila ini sa mga bulak. Pareho sa mga kalan-an, ginaganyat man sang mga bulak ang mga insekto paagi sa ila masili nga kolor. Kon maghapon na sila sa mga bulak, makakaon sila sing polen ukon makasuyop sing nektar.

Kon aga, mahinay maghulag ang mga insekto. Gani, ining mabugnaw sing dugo nga mga tinuga kinahanglan magpainit para magpagsik. Madamo nga bulak ang wala lang nagahatag sing masustansia nga pagkaon sa mga insekto kundi sing lugar man para makapainit-init sila sa adlaw. Tan-awon naton ang isa ka halimbawa.

Ang oxeye nga daisy nagatubo sa Europa kag North America. Daw kinaandan lang ini nga bulak, pero magadayaw ka kon usisaon mo ang nagakatabo diri. Ini nga daisy maayo gid nga lugar kon aga para sa mga insekto. Ginasuyop sang puti nga mga sipad sini ang init sang adlaw, kag ang dalag nga bahin sa tunga sini maayo gid nga palahuwayan sang mga insekto para masilakan sila kag magpagsik liwat. *

Para manamian pa gid ang mga insekto, ang tunga nga bahin sang daisy puno sing polen kag nektar. Masustansia gid ini nga pagkaon nga ginaamag sang madamo nga insekto. Wala na sing pangitaon pa ang isa ka insekto nga gusto magpainit-init sa adlaw kag magkaon sing manamit nga pagkaon.

Madamo nga sahi sang insekto ang nagahapon sa oxeye nga mga daisy sa bilog nga adlaw. Mahimo makakita ka sing mga bagangan, sarisari sing kolor nga mga alibangbang, mga shield bug, sirumsirom, kag lainlain nga klase sang langaw. Siempre, kon indi mo pag-usisaon, indi mo matalupangdan dayon ining matahom nga “mga kalan-an” sang mga insekto.

Kon makakadto ka liwat sa mga kaumhan, tilawi nga himutaran ining daw indi salapakon nga mga daisy. Kon himuon mo ini, magadugang pa gid ang imo apresasyon sa Manunuga nga nagdesinyo sini tanan.

[Nota]