Ang Pagtamod sang Biblia

Dapat Mo Bala Bayaran ang Relihioso nga mga Serbisyo?

SA MADAMO nga lugar, ang mga lider sang nagapangangkon nga Cristiano kag indi Cristiano nga mga relihion nagapabayad sa ila mga serbisyo. Nalakip sa sini nga mga serbisyo ang kasal, bunyag, ukon lubong. Mahimo nga ginatos, ukon linibo pa gani ka dolyar, ang ginabayad para sa sini.

Ang pila ka klero ginasuelduhan sang gobierno para sa mga seremonya kag mga misa kag sa mga pangamuyo antes umpisahan ang adlaw-adlaw nga sesyon sang mga mamalidha. Mahimo nga nagapasalamat gid ang mga tawo sa sini nga mga serbisyo, kag kinahanglan man sang mga simbahan ang kuarta para sa ila mga balayran. Pero nabase bala sa Biblia ang pagpabayad sang mga relihion sa sini nga mga serbisyo ukon ang pagpabatyag sa mga tawo nga obligado sila magbayad?

“Isa ka Balay nga Balaligyaan”?

Sang ari si Jesucristo sa duta, gingamit sang Judiyo nga mga lider sang relihion kag sang iban pa ang relihioso nga mga okasyon subong kahigayunan nga makaganar, ilabi na gid kon Paskua. Ugyon bala si Jesus sa ila ginhimo? Indi gid! Ginasugiran kita sang Biblia nga “gin-ula niya ang mga sensilyo sang mga manugbaylo sing kuarta kag ginpamaliskad ang ila mga lamesa.” Nagsiling sia: “Untati ninyo ang paghimo sa balay sang akon Amay nga isa ka balay nga balaligyaan!”—Juan 2:14-16.

Pareho man sa sini ang natabo sang nagkabuhi ang propeta nga si Miqueas sang ikawalo nga siglo B.C.E. Suno sa Biblia, ang mga lider sang relihion sa Israel ‘naugot sa hustisya,’ kag ang mga saserdote ‘nagapanudlo tungod lang kay ginabayaran sila.’ Ginasuportahan kuno sila sang Dios, nga nagasiling: “Kaupod namon ang GINOO.” (Miqueas 3:9, 11, APD) Pero wala sila ginasuportahan ni Jehova nga Dios. Sa baylo, ginakangil-aran niya ang ila ginahimo kag ginbuyagyag niya ini paagi sa iya propeta.

Subong, madamo nga lider sang relihion ang nagahimo man sining sakon nga buhat, nga ginahimo ang ila mga simbahan nga mga “balay nga balaligyaan.” Ang matuod, madamo nga relihioso nga mga organisasyon ang may mga negosyo. Daku ang ila ginakita sa pagbaligya sing mga imahen kag iban pa nga mga kagamitan sa pagsimba. *—1 Juan 5:21.

“Nagbaton Kamo nga Wala sing Bayad, Ihatag Ninyo nga Wala sing Bayad”

Sang ginsugo ni Jesus ang iya mga apostoles nga magwali sing maayong balita, mag-ayo sang mga nagabalatian, kag magbanhaw sang mga patay, sia  nagsiling: “Nagbaton kamo nga wala sing bayad, ihatag ninyo nga wala sing bayad.” (Mateo 10:7, 8) Ang matuod nga mga sumilimba ni Jesus wala nagapabayad sa ila mga serbisyo. Dugang pa, isa gid ka maayo nga halimbawa si Jesus kay wala man sia nagpabayad sa iya serbisyo sa iban.

Ginsunod man ni apostol Pablo si Jesus paagi sa paghimo sang iya ministeryo nga “wala sing bayad.” (1 Corinto 9:18) Sang kinahanglan niya ang kuarta, nag-obra sia subong manughimo sing tolda. (Binuhatan 18:1-3) Gani, nakasiling sia parte sa iya kaugalingon kag sa iya kaupod nga mga misyonero: “Indi kita manuglibod sing pulong sang Dios subong sang madamo nga tawo.” (2 Corinto 2:17) Pero paano kon nagakinahanglan sing pundo ang kongregasyon, halimbawa para ibakal ukon iarkila sa ila tilipunan?

“Ginahigugma sang Dios ang Nagahatag sing Malipayon”

Ang mga Saksi ni Jehova nagatipon sing pundo paagi sa boluntaryo nga mga donasyon. Ginasunod nila ini nga prinsipio: “Maghimo ang kada isa suno sa ginpamat-od niya sa iya tagipusuon, indi sing paganot ukon ginapilit, kay ginahigugma sang Dios ang nagahatag sing malipayon.” (2 Corinto 9:7) Bangod sini, ang mga Saksi wala nagapabayad sa ila mga balasahon ukon mga serbisyo, pareho sang kasal, bawtismo, ukon lubong. Wala man sila sing ikapulo ukon nagapangolekta sing kuarta sa ila mga pagtilipon. Ang bisan sin-o nga gusto mag-amot para sa ila bug-os kalibutan nga pagwali mahimo maghulog sa mga kahon para sa donasyon nga ara sa ila mga tilipunan.

Sa bug-os nga kalibutan, ginagastuhan sang mga Saksi ni Jehova ang ila mga Kingdom Hall, Assembly Hall, sanga talatapan, kag mga imprintahan, lakip ang pagbulig sa mga naapektuhan sang kalamidad, paagi sa boluntaryo nga mga amot. Ang iban, pareho sa imol nga balo nga gindayaw ni Jesus, diutay lang ang maamot. (Lucas 21:2) Ang iban naman makahatag sing dakudaku. Bisan ano man ang kahimtangan, ang mga nagasunod sa prinsipio sang Biblia kag nagaamot suno sa ila masarangan, nakabaton sing pagpakamaayo sang Dios, kag nakabatyag sing pagkakontento kag matuod nga kalipay.—Binuhatan 20:35; 2 Corinto 8:12.

[Nota]

NAMANGKOT KA BALA?

● Ano ang ginsiling ni Jesus sa mga naganegosyo sa templo?—Juan 2:14-16.

● Nagpabayad bala ang Cristiano nga si Pablo sa iya relihioso nga mga serbisyo?—2 Corinto 2:17.

● Ano nga sahi sang paghatag ang nagapahamuot kay Jehova? —2 Corinto 9:7.

[Blurb sa pahina 23]

“Untati ninyo ang paghimo sa balay sang akon Amay nga isa ka balay nga balaligyaan!” —Juan 2:14-16