Pagbantay sa Kalibutan

Gusto mabal-an sang mga researcher sa Canada kon ano ang epekto sang pornograpiya sa mga lalaki. “Ginsugdan namon ini sa pagpangita sang beintehon nga mga lalaki nga wala pa gid nakatan-aw sang pornograpiya,” siling sang isa ka manug-research, pero “wala gid kami sing may nakita.”—UNIVERSITY OF MONTREAL, CANADA.

Ang pinakamataas nga bilding sa bilog nga kalibutan, ang Burj Khalifa, gin-inagurahan sa Dubai sang Enero. Ini nga bilding may kataason nga 828 metros, may sobra 160 ka floor, kag makita bisan sa 95 kilometros nga kalayuon.—GULF NEWS, UNITED ARAB EMIRATES.

“Ang ginbag-o nga Judaismo wala sing pulos kay nagasunod man lang ini sa kon ano ang uso. Sining karon lang, ang ila misa may pangamuyo para sa mga tawo nga nagpa-sex change.”—THE NEW YORK TIMES MAGAZINE, U.S.A.

Kabataan nga Indi Makakomunikar

Kon ikumparar sa mga ginikanan sang una, ang mga ginikanan subong wala na gawa nagaistorya sa ila mga kabataan kon nagakaon ukon nagabasa sa ila antes magtulog. “Ang mga kabataan nga maeskwela sa elementarya daw pareho lang sa bata nga isa ka tuig kag tunga kon maghambal, kag nagadamo ang indi pa makahibalo maghimo bisan sang simple lang nga sentence,” siling sang The Times sang London. Sa Britanya, “18 porsiento sang mga kabataan nga nagaedad 5 ka tuig (sobra sa 100,000) ang indi pa makahambal sa kapasidad sang 5 ka tuig nga bata.” Gani, ang mga kabataan nga indi makaintiende sang simple nga instruksion ukon indi kabalo maghambal sang ila gusto daw “mga foreigner sa ila classroom” ukon wala sing hinalung-ong sa nagakatabo.

Mga Simbahan sa Ireland—Wala sing Pari?

“Makita naton subong ang katapusan sang pagdumala sang mga klero sa Katoliko nga Simbahan,” suno sa The Irish Times. Sang nagligad nga 50 ka tuig, ang Ireland amo ang may pinakamadamo nga pari. Subong, nagaedad na ang ila mga klero. Kon magretiro sila sa edad nga 75, madulaan na sing pari ang iban nga simbahan. Ang iban nagsiling nga ang rason gid sini amo ang pagdumili sa artipisyal nga kontrasepsion, nga ginpagua sang 1968 nga opisyal nga sulat sang papa nga Humanae Vitae. Ini nga sulat, siling sang Times, amo ang rason kon ngaa “ginkwestyon sang mga tawo ang panudlo sang Simbahan,” kag sang ulihi “amat-amat nga nadula ang pagsalig sa pagdumalahan sini.”

Nagahulag ang Magnetic North

Sang madiskobrehan ang magnetic North Pole sang 1831, ara ini sa naaminhan nga Canada, nga “mga 2,750 kilometros halin sa geographic North Pole,” siling sang pamantalaan sa Pransia nga Le Figaro. Sugod sang 1989, ang magnetic north nagapalapit sing mga 5 asta 15 kilometros sa geographic pole kada tuig. Suno sa Paris Institute of Global Physics, ang magnetic pole nagahulag subong sing “mga 55 kilometros kada tuig.” Sang 2007, mga 550 kilometros na lang ang kalayuon sini sa geographic pole. Sa amo sini nga kadasigon, sa tuig 2020, ang aurora borealis, ukon naaminhan nga kapawa, nga nagaupod sa magnetic north, “mas kitaon na sa Siberia sangsa Canada,” siling sang pamantalaan.