Magagmay nga mga Mansion sa Istanbul

● Ang mga hawla nga human sa kahoy makita sa madamo nga bahin sang kalibutan. Diri nagakaon ang mga pispis, nagapainit-init, nagahimo sing pugaran, nagasagod sang ila boto, nagapanago sa ila mga kaaway, kag nagapasilong kon malain ang tiempo. Sa Istanbul, ang mga hawla gindesinyo nga daw pareho gid sang matuod nga mga bilding. Ang iban daw mga mansion, moske, ukon mga palasyo. * Ginatawag ini nga mga halapunan sang pating, mansion sang pispis, ukon palasyo sang mga maya.

Ang pinakadaan sini nga mga hawla ginhimo pa sang ika-15 nga siglo kag ginsunod sa arkitektura sang mga Ottoman. Simple lang ang mga desinyo sini pero sang ika-18 nga siglo nangin matahom pa gid ini kag maluho. Ang iban may bulutangan sing pagkaon kag tubig, may mga alagyan, kag may balkonahe pa gani para makalaawlaaw ang mga pispis. Ini nga mga hawla masami nabutang sa kilid sang bilding nga masilakan pirme sang adlaw, nalipdan sa hangin, kag indi malab-ot sang kuring, ido, kag mga tawo. Kon kaisa ginahimo man ini nga mga dekorasyon sa bilding. Ini nga mga hawla makita sa kilid sang mga moske, publiko nga mga ilimnan sang tubig, librarya, taytay, kag balay.

Pero madamo sa sining magagmay nga mga mansion ang nagdaan na, ang iban naman hungod nga ginpangguba sang mga tawo nga wala nagapabalor sini. Nagadiutay na ini nga mga hawla. Pero kon magkadto ka sa Istanbul, kag mahilig ka sa dumaan nga mga arkitektura, tan-awa kon makita mo ining magagmay nga mga mansion sa bulada sang mga bilding. Karon nga nabal-an mo na kon ano ini, maapresyar mo gid ini nga mga mansion sa imo pagbisita sa siudad.

[Nota]