Ang Pagtamod sang Biblia

Nagahisantuanay Bala ang Pagtuo kag Pangatarungan?

“ANG pagtuo kabaliskaran sang pangatarungan,” siling sang British nga philosopher nga si A. C. Grayling. Amo man sini ang madugay na nga ginapatihan sang madamo nga manunulat kag philosopher. Para sa ila, indi magsantuanay ang pagtuo kag pangatarungan.

Matuod, may pila ka panudlo ang relihion nga indi rasonable. Pero binagbinaga ini: Madamo sang panudlo sa siensia nga ginapatihan gid sang mga tawo ang napamatud-an sang ulihi nga sala. Buot bala silingon nga ang tanan nga ginatudlo sang siensia sala ukon wala sing basihan? Indi. Kon amo, dapat amo man sini ang pagtamod mo sa relihion. Ang matuod nga pagtuo nga ginasiling sang Biblia nabase gid sa ihibalo kag may basihan nga pangatarungan. Samtang ginabinagbinag mo kon ano gid ang matuod nga pagtuo, tan-awa kon paano ini nagahisanto sa pangatarungan.

Pagtuo nga Nabase sa Pangatarungan

Halimbawa suno sa Biblia, para mangin “kalahamut-an sa Dios” ang imo pagsimba, dapat mangin “isa [ini] ka sagrado nga pag-alagad lakip ang [imo] ikasarang sa pagpangatarungan.” Buot silingon, dapat “maalamon [ang imo] pagsimba” sa Dios. (Roma 12:1, Mga Balaan nga Kasulatan, MBK) Gani, ang pagtuo nga ginasiling sang Biblia indi bulag nga pagtuo, subong ginasiling sang iban. Sa baylo ginpanumduman mo ini sing maayo base sa masaligan nga mga impormasyon, amo nga nagsalig ka sa Dios kag sa iya Pulong.

Siempre para makapangatarungan ka sing maayo, kinahanglan mo ang sibu kag masaligan nga impormasyon. Bisan ang pinakamaayo nga computer program nga gindesinyo base sa masaligan nga mga prinsipio sang lohika, mahimo magsala kon indi eksakto ang ipasulod mo nga mga impormasyon. Sing kaanggid, ang imo pagtuo nagadepende sa imo nabatian kag kon daw ano ka masaligan ang mga impormasyon nga imo natun-an. Amo gani nga ang Biblia nagasiling, “ang pagtuo nagasunod sa butang nga nabatian.”—Roma 10:17.

Gani, importante gid sa pagtuo ang “sibu nga ihibalo tuhoy sa kamatuoran.” (1 Timoteo 2:4) “Ang kamatuoran” lang, siling sang Biblia, ang “magahilway sa inyo” sa nagapatalang nga mga panudlo sang siensia ukon relihion. (Juan 8:32) Ang Biblia nagapaandam nga indi ka magtuo “sa tagsa ka polong.” (Hulubaton 14:15) Kundi nagasiling ini nga “pat-ura ninyo ang tanan nga butang” ukon tilawan anay ang imo mga nabatian antes mo ini patihan. (1 Tesalonica 5:21) Ngaa dapat mo usisaon ukon tilawan ang imo ginapatihan? Kay ang pagtuo nga nabase sa sala nga pagpati, wala sing pulos. Ang pila ka tawo sa dumaan nga siudad sang Berea nangin maayo nga halimbawa sa kon paano nila natigayon ang husto nga pagtuo. Bisan pa gusto nila nga patihan ang ginatudlo sang Cristiano nga mga misyonero sa ila, “ginausisa [gid nila] sing maayo ang Kasulatan sa adlaw-adlaw kon bala matuod gid ini.”—Binuhatan 17:11.

Paano Mo Patubuon ang Imo Pagtuo sa Biblia?

Ano abi kon indi ka sigurado nga masaligan gid man ang Biblia? Paano mo patubuon ang imo pagsalig sa ginhalinan sang sibu nga ihibalo? Ti, paano nagatubo ang imo pagsalig sa iban? Siempre, ginakilala mo sila kag ginapanilagan  sing maayo. Amo man sina ang dapat mo nga himuon sa Biblia. *

Suno sa Biblia, ang matuod nga pagtuo amo “ang masaligan nga pagpaabot sa mga butang nga ginalauman, ang maathag nga pagpasundayag sang mga katunayan bisan indi makita.” (Hebreo 11:1) Maathag nga ginbase sang tawo nga may matuod nga pagtuo ang iya ginapatihan sa masaligan nga impormasyon nga ginbinagbinag niya sing maayo. Bangod sini, bisan ang mga butang nga indi gid naton makita ginapatihan naton nga matuod.

Pero ano abi kon ang imo natun-an daw wala gid nagahisanto sa pila ka butang nga imo na ginapatihan? Pabay-an mo na lang bala ini? Siempre indi. Kinahanglan binagbinagon mo ang mga pamatuod kon ngaa wala ini nagahisanto sa imo ginapatihan. Suno sa Biblia, nagpromisa ang Dios nga hatagan niya sing ihibalo, paghangop, kag pagbinagbinag ang sinsero nga mga tawo nga nagausisa sa kamatuoran.—Hulubaton 2:1-12.

Ini nga sahi sang pagtuo nga nabase sa ginatudlo sang Biblia nagahisanto gid sa pangatarungan. Ano ang klase sang imo pagtuo? “Napanubli” lang sang kalabanan ang ila ginapatihan kag wala gid nila ini gin-usisa bisan wala ini sing basihan. Pero indi sala kon usisaon mo ang imo mga ginapatihan para ‘mapamatud-an sa imo kaugalingon’ nga ang imo panghunahuna nagahisanto sa Pulong sang Dios. (Roma 12:2) Ang Biblia nagsiling nga “tilawi ang mga mensahe agod makita kon bala naggikan gid ini sa [Dios].” (1 Juan 4:1) Kon himuon mo ini, mahimo ka “magpangapin sa atubangan sang tanan nga nagapangayo sa [imo] sang pangatarungan tuhoy sa paglaum nga yara sa [imo].”—1 Pedro 3:15.

[Nota]

NAMANGKOT KA BALA?

● Nagasiling bala ang Biblia nga indi dapat paggamiton ang ikasarang sa pagpangatarungan?—Roma 12:1, 2.

● Ano nga sahi sang ihibalo ang kinahanglan para sa matuod nga pagtuo?—1 Timoteo 2:4.

● Ano ang matun-an naton sa kahulugan sang pagtuo nga mabasa sa Biblia?—Hebreo 11:1.

[Blurb sa pahina 29]

Ginapadyaan sang Dios ang sinsero nga nagapangita sang kamatuoran