Daw Indi Mabaton

Si Nicolle mapagros nga bata. Pero isa ka gab-i, nagsakit ang iya ulo. Gani gindala sia sang iya mga ginikanan sa ospital. Pagkadason nga gab-i, samtang ginaobserbahan pa sia, gin-atake sia sa tagipusuon. Nahibaluan nga may pinasahi sia nga impeksion halin sa bakterya nga naglapta sa iya baga, kidney, kag tagipusuon. Pagligad lang sang duha ka adlaw, napatay si Nicolle. Tatlo pa lang sia ka tuig.

TAMA gid kasakit nga madulaan sang isa ka pinalangga. Mahimo nga daw indi mo gid ini mabaton. “Nahidlaw gid ako kay Nicolle,” siling sang iya iloy nga si Isabelle. “Nahidlaw ako sa iya mga kupo, baho, kag pagpaangga. Na-miss ko man nga ginahatagan niya ako sing bulak adlaw-adlaw. Pirme ko ginapamensar si Nicolle.”

Napatyan ka man bala sang isa ka pinalangga—imo bata, bana, asawa, utod, ginikanan, ukon suod nga abyan? Kon amo, paano mo ini atubangon?