Pagbantay sa Kalibutan

“Sobra katunga sa mga Ruso ang nagasiling nga ang paghamham sa mga opisyales amo ang pinakamaayo nga paagi para ‘solbaron ang mga problema.’”—REUTERS NEWS SERVICE, RUSSIA.

“Suno sa isa ka surbe, 17.5 porsiento sang adulto nga mga Intsik ang may balatian sa pamensaron . . . Mas daku ang tsansa sang mga babayi nga magproblema sa pamensaron sangsa mga lalaki.”—CHINA DAILY, CHINA.

“Mga 28% sang tanan nga mga aksidente sa salakyan sa U.S.—ukon 1.6 milyones kada tuig—natabo bangod ang mga drayber nagagamit sang cell phone ukon nagapadala/nagabasa sang text, suno sa National Safety Council.”—UC BERKELEY WELLNESS LETTER, U.S.A.

“Makahuluya nga Kasaysayan”

“Ginapakita sang Report of the Commission to Inquire Into Child Abuse ang makahuluya nga kasaysayan sang Ireland,” siling sang The Irish Times. Suno sa sini nga pamantalaan, ginapakita sang report ang pag-abuso sa mga kabataan sa Katoliko nga mga institusyon, halin sa “pagsakit sa mga kabataan nga kutuhon” asta sa sigesige nga pagmolestia sa ila. Wala ini ginsapak sang una bangod sa sala nga pagtahod sa “bug-os nga awtoridad sang Katoliko nga Simbahan,” siling sang pamantalaan. “Makahuluya ang Gobierno kag Simbahan,” amo ini ang headline sa Times, nga ginsiling sang isa nga nagasimpatiya sa mga biktima.

Tubig sa Bulan

Sang ginpabunggo sang mga sientipiko ang isa ka rocket sa bulan, nagsiling sila nga may nakita sila nga tubig sa yab-ok nga nagtap-ok. Gin-usisa ini paagi sa mga spectrometer, mga instrumento nga nagaanalisar sang mga elemento sa isa ka butang paagi sa pagseparar sang mga wavelength of light nga gina-absorb ukon ginapagua sini. “Madamo kita sing matun-an sa aton bulan, kag paagi sini, madamo man kita sing matun-an sa aton solar system,” siling ni Michael Wargo, chief lunar scientist sang NASA headquarters sa Washington, D.C. Sining karon lang, ginpakita man sang isa ka instrumento nga may minilyon ka tonelada sang tubig sa north pole sang bulan.

Bulawan sa Vending Machine

Sa pila ka kadutaan, puede na makakuha sing bulawan sa mga vending machine. Halimbawa, may ginbutang nga vending machine sa isa ka hotel sa Abu Dhabi, United Arab Emirates. Makakuha ka diri sing 320 ka produkto, pati na sing bulawan nga 10 gramos kag bulawan nga sensilyo. Paagi sa kompyuter nga nakakonekta sa international market, mabal-an ang pagbulubag-o sang presyo sang bulawan kada 10 minutos. Sang primero, ang kuarta lang sang Abu Dhabi ang ginabaton sang vending machine, pero ginaplanuhan nga sa ulihi puede na magamit ang mga credit card. Diri ginbutang ang vending machine “kay mabakal diri ang bulawan,” suno sa Reuters.