Ang Imo Bala mga Bibig “Huluyason nga Bilidhon”?

● “May bulawan, kag bugana nga mga rubi; apang ang mga bibig sang ihibalo huluyason nga bilidhon,” sulat ni Hari Solomon sang una. (Hulubaton 20:15) Mahal ang bulawan asta subong, kag sang panahon ni Solomon, mahal man ang rubi. Pero, ang aton mga bibig mas bilidhon sangsa sini. Paano? Indi tungod nga matahom ini, kundi sa mga pulong nga nagagua diri.

Ang bilidhon nga mga bibig nagahambal sing mainayuhon kag mahigugmaon. Kag ang “mga bibig sang ihibalo,” nagahambal sing kamatuoran parte sa Dios base sa Biblia. Ining dumaan nga libro puno sing kaalam kag kamatuoran parte sa aton Manunuga kag may maayo gid ini nga mga laygay.—Juan 17:17.

Makapasubo nga madamo nga tawo ang nagahambal sing kabutigan parte sa Dios. Halimbawa, ginabasol sang iban ang Dios sa mga inhustisya kag pag-antos, bisan pa mga tawo ang naghimo sini. Amo gani nga ang Hulubaton 19:3 nagsiling: “May mga tawo nga ginahalitan nila ang ila kaugalingon tungod sang ila kabuangan, kag ang GINOO pa ang ila ginabasol.”—Ang Pulong sang Dios, APD.

Ginapanubo sang iban ang balor sang ila mga bibig paagi sa indi sinsero nga hambal, makahalit nga kutsokutso ukon pasipala pa gani. Para ilaragway ini, ang Hulubaton 26:23 nagsiling: “Ang mga bibig nga mainiton kag ang tagiposoon nga malaut kaangay sang suludlan nga duta nga [nakulapan] sing buay nga pilak.” Pareho sang “pilak” nga nagakulap sa suludlan nga duta, ang “mga bibig nga mainiton,” nga daw nagapakita sing pagkasinsero, mahimo magtabon sa “tagiposoon nga malaut.”—Hulubaton 26:24-26.

Pero, makita sang Dios ini nga kalaut. Nahibaluan niya kon ano gid kita! Gani si Jesucristo nagsiling: “Tinlui anay ang sulod sang kopa kag sang pinggan, agod mangin matinlo man ang gua sini.” (Mateo 23:26) Matuod gid ini! Isa pa, kon matinlo ukon putli ang aton tagipusuon kag puno ini sing espirituwal nga kamatuoran, makita ini sa aton ginahambal. Ang resulta? Ang aton mga bibig mangin “huluyason nga bilidhon,” ilabi na sa panulok sang Dios.

[Retrato sa pahina 19]

Ang mga bibig sang maalam “huluyason nga bilidhon”