Sang maaksidente ang isa ka oil platform sang Abril 2010, madamo nga langis kag gas ang naula sa dagat sing sigesige sa sulod sang halos tatlo ka bulan. Suno sa pagtuon sang isa ka grupo sang mga researcher, pagligad sang duha ka bulan kag tunga, ang iban nga mga kemikal wala na—ginkaon kuno ini sang mga bakterya nga makatunaw sang me­thane. Pero para sa iban nga eksperto, ang langis naglugdang lang.

Suno sa isa ka surbe, 59 porsiento sang mga Ruso nga nagaedad sing 18 asta 35 ang nagapati nga “para magmadinalag-on, dapat mo kalimtan kon kaisa ang imo mga prinsipio,” report sang pamantalaan nga Rossiiskaya Gazeta.

Ang pila sa pinakadugay na nga mga kayan nga nasapwan (pareho sang piktyur sa ibabaw) nagapakita nga mahimo ang mga pumuluyo sa aminhan sang Peru nagahimo na sing popcorn kag harina sang mais mga 3,000 ka tuig na ang nagligad.

Si Lucio Soravito De Franceschi nga Katoliko nga obispo sang Adria-Rovigo, nagapati nga mas epektibo ang pagwali “kon istoryahon gid ang mga indibiduwal” sa ila mga balay. “Ang amon hilikuton dapat indi lang pagpatunog sang mga lingganay sa simbahan kundi pagpatunog man sang mga doorbell sa mga puluy-an,” siling niya.

Ang sungay sang rhinoceros nga ginagamit nga bulong ilegal nga ginabaligya sa bili nga naglab-ot na sa $65,000 (U.S.) kada kilo. Sang 2011, sa South Africa lang, 448 ka rhino ang ginpatay sang ilegal nga mga mangangayam. Ang mga museo kag mga subastahan sa Europa ginasulod man sang mga gang nga nagapangita sang mga sungay. Bisan ang mga rhino sa zoo sa Europa ginapatihan man nga ara sa katalagman.