Ngaa ang duha ka tawo nga nanumpa nga maghigugmaanay wala na nagabugnuhanay sing inoras ukon inadlaw pa gani? ‘Maayo na lang ’na kay wala kami nagaaway,’ siling nila sa ila kaugalingon. Pero may problema gihapon kag indi sila malipayon.

Pagbalos. Wala ginabugno sang iban ang ila tiayon para makabalos. Halimbawa, may ginplano ang bana nga wala niya anay ginkonsulta ang iya asawa. Sang mahibaluan ini sang asawa, naakig sia kag ginsilingan ang iya bana nga wala ini sing pasunaid. Nagsabat ang bana nga tama sia ka sensitive. Akig nga naglakat ang asawa kag wala na nag-istorya. Daw subong bala nga nagsiling sia, “Ginpalain mo ang buot ko, mabalos man ’ko.”

Para makuha ang gusto. Ang iban naman wala nagapamugno para makuha ang ila gusto. Halimbawa, nagaplano ang mag-asawa nga magbakasyon. Gusto sang asawa nga updon ang iya mga ginikanan. Pero indi gusto ang bana. “Ako ang ginpakaslan mo indi ang imo ginikanan,” siling niya. Wala na niya dayon ginbugno ang iya asawa kag ginalikawan para masunod ang iya gusto.

Ang paghipos sing makadali makapakalma sa mag-asawa kon daw indi na nila mapunggan ang ila kaugalingon. Ini nga sahi sang paghipos makabulig. Ang Biblia nagsiling nga may “tion sa paghipus.” (Manugwali 3:7) Pero kon himuon nila ini para magbalos ukon makuha ang gusto, magalala lang ang problema kag madula nila ang respeto sa isa kag isa. Paano mo ini malikawan?

Una, dapat mo dumdumon nga ang paghipos indi makasolbar sang inyo problema. Matuod, makabalos ka ukon makuha mo ang imo gusto kon maghipos ka. Pero gusto mo bala nga indi na gid kamo mag-istoryahanay sang isa nga ginpromisahan mo nga palanggaon? May mas maayo nga paagi para masolbar ang mga problema.

Mangin mahinantupon. Ang Biblia nagsiling nga ang gugma ‘indi maakigon.’ (1 Corinto 13:4, 5) Gani indi dayon maakig kon hambalan ka nga “Wala ka gid nagapamati” ukon “Pirme ka lang leyt.” Sa baylo hibalua kon ano gid ang iya buot silingon. Halimbawa, ang komento nga “Wala ka gid nagapamati” mahimo magakahulugan nga “Daw wala mo ginaserioso ang ginhambal ko.”—Prinsipio sa Biblia: Hulubaton 14:29.

Hinaya ang Imo Tingog. Sa masami nagalala ang pagbaisay kon maglawig ini. Pero may mahimo ka para indi ini maglala. Ang libro nga Fighting for Your Marriage nagsiling: “Sa masami, ang paghambal sing mahinay kag pagpamati sa ginahambal sang imo tiayon makabulig para mag-ugdaw ang tension kag indi ini maglala.”—Prinsipio sa Biblia: Hulubaton 26:20.

Pamensara nga duha na kamo. Ang Biblia nagsiling: “Padayon nga pangitaon sang kada isa, indi ang iya kaugalingon nga kaayuhan, kundi ang iya sang iban nga tawo.” (1 Corinto 10:24) Kabiga ang imo tiayon nga teammate mo sa baylo nga kontra, para malikawan mo nga awayon sia, baison, kag indi pagbugnuhon.—Prinsipio sa Biblia: Manugwali 7:9.

Ang indi pagbugno sa imo tiayon wala nahisanto sa ginatudlo sang Biblia: “Ang kada isa sa inyo maghigugma man sang iya asawa subong sang paghigugma niya sa iya kaugalingon; kag ang asawa dapat may tudok nga pagtahod sa iya bana.” (Efeso 5:33) Gani tinguhai gid ninyo nga likawan ang indi pagbugnuhanay.