ANG pispis mahimo makapautaw-utaw sa hangin nga wala nagapamuersa. Isa ka maayo nga halimbawa sini ang wandering albatross. May pakpak ini nga nagalaba sing 3.4 ka metro kag nagabug-at ini sing halos 8.5 ka kilo, kag mahimo ini makalupad sing linibo ka kilometro nga nagagamit sing tuman ka diutay nga enerhiya! Ang sekreto amo ang pagkahuman kag paagi sang paglupad sini.

Binagbinaga: Kon nagalupad ini nga albatros, ginagamit sini ang pinasahi nga lanitlanit nga nagahawid sa pakpak kon maghumlad ini sing bug-os, amo nga makapahuway ang iya mga maskulo. Ang isa pa ka sekreto nga makapautaw-utaw ini sing inoras amo nga kabisado niya ang hangin.

Sa dagat, ang mga albatros sulitsulit nga nagapatimbuok, nagaluyong, kag nagasurip—ang paagi agod indi sila mapalid. Sining karon lang nahibaluan sang mga sientipiko kon paano nila ini ginahimo. Paagi sa paggamit sing moderno nga mga kagamitan, nadiskobrehan nila nga mas madasig ang paglupad sang mga pispis kon magpaayon sa hangin samtang nagatimbuok. “Ang pagtigayon sing kadasig . . . mahapos kag sigesige,” siling sang mga sientipiko. Ano ang resulta? Makalupad ang pispis sing inoras nga wala nagakapaykapay sang iya mga pakpak!

Ini nga ihibalo mahimo makabulig sa mga engineer nga makadesinyo sang mga salakyan sa kahawaan nga indi mahakog sa gatong, kag mahimo pa gani nga wala sing makina.

Ano sa banta mo? Ang paagi bala sang paglupad sang albatros, lakip ang pinasahi nga desinyo sini, resulta sang ebolusyon? Ukon gindesinyo ini?