Ang paghikog ginatawag nga “permanente nga solusyon sa temporaryo nga problema.” Bisan pa daw indi mapatihan, ang mabudlay nga kahimtangan—bisan pa ang daw indi mo na makontrol—mahimo temporaryo lang. Ang matuod, mahimo ini magbag-o sing wala ginapaabot.—Tan-awa ang kahon nga  “Nagbag-o ang Ila Kahimtangan.”

Bisan pa indi ina matabo, maayo nga solbaron sing isaisa lang ang problema. “Indi gid kamo magkabalaka tuhoy sa masunod nga adlaw,” siling ni Jesus, “kay ang masunod nga adlaw may kaugalingon nga mga kabalaka. Tuman na para sa tagsa ka adlaw ang kalainan sini.”—Mateo 6:34.

Pero ano abi kon ang imo kahimtangan indi mabag-o? Halimbawa, may malala ka nga balatian. Ukon ano abi kon nasubuan ka bangod sang indi makontrol nga kahimtangan, pareho sang pagbulagay ukon sang pagkapatay sang imo hinigugma?

Bisan pa amo sini, may puede ka mabag-o: ang imo pagtamod sa kahimtangan. Paagi sa pagbaton sang indi mo na mabag-o, mahimo matamod mo na ang mga butang sing mas positibo. (Hulubaton 15:15) Mahimo ka man mangita sang mga paagi nga mabatas ang mga kahimtangan sa baylo nga maghikog. Ano ang resulta? Makontrol mo na ang daw indi makontrol nga kahimtangan.—Job 2:10.

DUMDUMA INI: Indi mo masaka ang bukid sa isa lang ka tikang, pero mahimo mo ini paagi sa amat-amat nga paglakat. Amo man sini kon may problema ka, bisan pa daw bukid pa ini ka dalagku.

KON ANO ANG MAHIMO MO SUBONG: Istoryaha ang iban, mahimo ang isa ka abyan ukon miembro sang pamilya, parte sa imo sitwasyon. Mahimo makabulig sa imo ina nga tawo nga mangin balanse ang imo pagtamod sa sitwasyon.—Hulubaton 11:14.