Nahibaluan sang Biblia nga ang kabuhi sang tawo “malip-ot sing mga adlaw, kag puno sang kagamo.” (Job 14:1) Subong, madamo nga kalamidad ang nagakatabo sa mga tawo. Pero may pila nga daw nawad-an na sing paglaum, nga daw wala na sing buwas, wala na sing maayo pa nga palaabuton. Amo man bala sina ang imo ginabatyag? Kon amo, saligi nga nagahatag sang matuod nga paglaum ang Biblia, indi lang para sa imo kundi sa tanan nga katawhan. Halimbawa:

• Ginatudlo sang Biblia nga luyag ni Jehova nga Dios nga mangin maayo ang aton kahimtangan.—Genesis 1:28.

• Ginpromisa ni Jehova nga Dios nga mangin paraiso ang aton duta.—Isaias 65:21-25.

• Matuod gid ang katumanan sini nga promisa. Ang Bugna 21:3, 4 nagasiling:

  “Ang tolda sang Dios yara sa mga tawo, kag magapuyo sia kaupod nila, kag sila mangin iya mga katawhan. Kag ang Dios mismo mangin kaupod nila. Kag pahiran niya ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa. Ang mga butang sang una nagtaliwan na.”

Matuod gid ini nga paglaum. Gintuyo gid ni Jehova nga Dios nga mangin matuod ini, kag may ara sia sing gahom kag handum nga himuon ini. Masaligan gid ang pasalig sang Biblia, kag nagahatag ini sa aton sing makapakumbinsi nga sabat sa pamangkot nga “Ngaa indi dapat mangampo?”

DUMDUMA INI: Bisan pa ang imo emosyon daw baruto nga ginahampangan sang mga balod, ang mensahe sang paglaum sa Biblia mangin pareho sang pundo nga nagapugong sa sini.

KON ANO ANG MAHIMO MO SUBONG: Hibalua ang matuod nga paglaum nga ginatudlo sang Biblia. Nalipay ang mga Saksi ni Jehova nga buligan ka. Makontak mo sila sa inyo lugar ukon mangita sang mapuslanon nga impormasyon sa ila Web site nga jw.org/hil. *