ANG gastric brooding nga paka sang Australia, nga napapas na kuno sang 2002, may pinasahi nga paagi sa pagmuad. Ginatulon sang bayi ang iya pertilisado nga mga itlog kag gina- incubate ini sa iya tiyan sa sulod sang mga anom ka semana. Sa ulihi, ang mga itlog mangin paka kag magagua sa iya baba.

Para indi matunaw ang mga itlog sa iya tiyan, indi sia dapat magkaon kag indi man magpatubas sang acid sa iya tiyan. Maathag nga nagapatubas sang kemikal ang mga itlog kag ang naboto na para punggan ang pagpatubas sang acid.

Ang paka magapangitlog sing mga duha ka dosena. Kon ipagua na niya ini, katumbas ini sang halos 40 porsiento sang iya kabug-aton. Daw pareho ini sa isa ka babayi nga nagabug-at sing 68 kilos kag nagabusong sing 24 ka lapsag nga nagabug-at sing 1.8 kilo ang kada isa! Ginapahitad sang mga boto ang tiyan sang paka asta nga maipit ang iya baga amo nga sa panit na lang sia nagaginhawa.

Masami nga nagagua ang mga boto pagligad sang pila ka adlaw kon handa na sila. Pero kon makabatyag sang peligro ang paka, iluad na niya ini. Isa ka bes, naobserbahan sang mga researcher ang isa ka paka nga nagbuga paibabaw sang anom ka boto sing halos isa ka metro.

Ginasiling sang iban nga ang sistema sang pagmuad sang gastric brooding nga paka bahin sang ebolusyon. Kon matuod ini, daku katama nga pagbag-o ang kinahanglan sini himuon sa iya lawas kag paggawi sa isa lang ka tion. “Imposible nga amat-amat ang pagbag-o sang sistema sang pagmuad sini,” sulat sang sientipiko kag ebolusyonista nga si Michael J. Tyler. “Ini nga paagi mahimo magmadinalag-on ukon indi.” Ang makatarunganon nga paathag siling ni Tyler, amo “ang gulpiada nga pagbag-o.” Ang pila nagasiling nga ini nga pagbag-o ginatawag nga pagtuga. *

Ano sa banta mo? Ang sistema bala sang pagmuad sang gastric brooding nga paka resulta sang ebolusyon? Ukon gindesinyo ini?