Si Mabel, nga taga-Argentina, mapisan nga babayi. Nagatrabaho sia bilang physical therapist. Sang 2007, nagsugod sia sa pagbatyag sang sobra nga kakapoy kag kasakit sang ulo adlaw-adlaw. “Madamo na nga doktor ang nakadtuan ko kag gintilawan ang tanan nga sahi sang bulong,” siling niya, “pero wala sing natabo.” Sang ulihi, nagpa-MRI si Mabel kag nasapwan nga may tumor sia sa utok. Sia nagsiling: “Nakibot gid ako! Indi ako makapati nga may amo ako sini nga balatian.

“Pero narealisar ko lang kon daw ano kalala ang kahimtangan ko sang nagpaopera ako. Sang makabugtaw ako sa intensive care, indi ako makahulag. Ang mahimo ko lang amo ang pagtan-aw sa kisame. Antes ako maoperahan, masako gid ako kag independiente. Pero subong, wala gid ako sing mahimo. Gahod lang sang mga aparato, alarm, kag pag-ugayong sang iban nga pasyente ang mabatian ko. Pamatyag ko, puro lang kasakit kag pag-antos ang palibot ko.

“Medyo naulian na ako subong. Makalakat na ako nga wala sing bulig sang iban kag kon kaisa, makagua sa balay nga isahanon. Pero nagalilibat gihapon ako kag maluya pa ang mga maskulo ko.”

Mangin positibo. Ang Hulubaton 17:22 nagasiling: “Ang tagiposoon nga malipayon maayo nga bolong, apang ang espiritu nga boong nagapamala sang mga tul-an.” Naghinumdom si Mabel: “Samtang nagapaayo ako, naeksperiensiahan ko ang mga naagyan sang mga pasyente ko sadto. Masakit katama ang mga ehersisyo nga ginapahimo sa akon, kag kon kaisa, daw gusto ko na mangampo. Ginatinguhaan ko nga dulaon ang negatibo nga paghunahuna sa pensar ko bangod nahibaluan ko nga mangin maayo ang resulta sang akon panikasog.”

Magpokus sa mga butang nga magahatag sa imo sing paglaum. “Natun-an ko sa Biblia kon ngaa nagakatabo ang mga trahedya,” siling ni Mabel. “Pero nahibaluan ko man nga samtang nagaligad ang mga inadlaw, amat-amat kita nga nagahilapit sa tion nga madula na sing bug-os ang kasakit.” *

Tandai nga nagaulikid ang Dios sa aton bilang indibiduwal. (1 Pedro 5:7) Nadumduman ni Mabel kon paano ini nakabulig sa iya: “Sang gindala ako sa operating room, napamatud-an ko ang ginsiling sang Dios sa Isaias 41:10: ‘Dili ka mahadluk, kay ako nagaupud sa imo.’ Nakabatyag ako sing kalinong bangod nahibaluan ko nga nagaulikid si Jehova nga Dios sa akon.”

Nahibaluan mo bala? Ginatudlo sang Biblia nga magaabot ang tion nga indi na magbalatian ang mga tawo.—Isaias 33:24; 35:5, 6.