GINATINGUHAAN sang mga sientipiko nga mapauswag ang ikasarang sang mga kagamitan nga nagatipon sang kasanag halin sa adlaw para indi lang kita magsalig sa petrolyo. “Ang solusyon sa sini nga problema,” siling sang isa ka sientipiko, “mahimo nga . . . nagalupadlupad lang sa atubangan naton.”

Binagbinaga: Para indi sila matugnawan kon tigtulugnaw, ginahumlad sang mga alibangbang ang ila pakpak para mainitan. Ang pakpak sang pila ka sahi sang swallowtail maayo gid magtipon sang kasanag halin sa adlaw. Indi lamang ini bangod sang masili nga kolor sini kundi bangod sang tuman ka gagmay kag nagasampawanay nga himbis sa ila pakpak. Ang mga himbis naman may nagaraya nga buhobuho nga ang korte daw balay sang putyukan. Ang sa igutlan sini may nagasuli nga korte-V nga nagagiya sang kasanag pasulod sa buhobuho. Ining tumalagsahon nga desinyo nagatipon sang kasanag, amo nga puerte ka itom ang mga pakpak sini kag mainitan sing maayo ang alibangbang.

“Ang pakpak sang alibangbang mahimo isa sa pinakamasibod nga desinyo sa kinaugali,” siling sang Science Daily, “amo nga ginatinguhaan gid sang mga researcher nga ilugon ini paagi sa paghimo sang bag-o nga teknolohiya nga makapatubas sang doble nga kadamuon sang hydrogen gas. Ining wala sing polusyon nga gatong nga halin sa tubig kag adlaw ginalauman nga gamiton sa ulihi.” Puede man ini magamit sa mga optical instrument kag solar cell.

Ano sa banta mo? Ang nagatipon bala sing kasanag nga pakpak sang alibangbang resulta sang ebolusyon? Ukon gindesinyo ini?