“Sa pagkamatuud, ang Dios indi maghimo sing pagkamalaut.”—Job 34:12.

ANG GINASILING SANG MGA TAWO

Nagasiling ang iban nga pagbuot sang Dios ang tanan nga nagakatabo. Gani nagapati sila nga ang Dios ang nagapaantos sa aton. Halimbawa, kon may kalamidad nga matabo ginahunahuna nila nga ginasilutan sang Dios ang mga nakasala.

ANG GINASILING SANG BIBLIA

Maathag nga ginatudlo sang Biblia nga wala kita ginapaantos sang Dios. Halimbawa, nagasiling ang Biblia nga kon may pagtilaw sa aton, sala nga magsiling: “Ginatilawan ako sang Dios.” Ngaa? Bangod “ang Dios indi matilawan sa malaut nga mga butang kag wala man sia nagatilaw kay bisan sin-o.” (Santiago 1:13) Kon sa aton pa, indi ang Dios ang nagatilaw ukon nagapaantos sa tawo. Malaut nga himuon ini, apang “ang Dios indi maghimo sing pagkamalaut.”—Job 34:12.

Kon indi ang Dios, sin-o ukon ano gali ang nagapaantos sa aton? Makapasubo nga ang mga tawo masami nga ginabiktima sang iban nga indi perpekto nga tawo. (Manugwali 8:9) Dugang pa, mahimo matabo sa aton ang mga kalamidad bangod sang mga “kahigayonan”—buot silingon, yara ang isa sa sala nga lugar sa sala nga tion. (Manugwali 9:11) Ginatudlo sang Biblia nga “ang manuggahom sini nga kalibutan,” nga si Satanas nga Yawa, amo ang kabangdanan kon ngaa nagaantos ang mga tawo, kay “ang bug-os nga kalibutan yara sa gahom sang isa nga malauton.” (Juan 12:31; 1 Juan 5:19) Indi ang Dios kundi si Satanas ang nagapaantos sa mga tawo.

“Sa tanan nila nga kapipit-an ginpiotan sia.”—Isaias 63:9.

ANG GINASILING SANG MGA TAWO

Ginahunahuna sang iban nga wala nagasapak ang Dios kon ginatilawan kita. Halimbawa, suno sa isa ka manunulat, ang Dios “daw wala sing kaluoy sa aton pag-antos.” Nagapangatarungan ini nga manunulat nga kon may Dios gid man, ginatan-aw lang niya ang mga tawo nga “wala sing pag-ulikid kag kaluoy.”

ANG GINASILING SANG BIBLIA

Sa baylo nga ilaragway ang Dios nga wala sing kaluoy kag pag-ulikid, ginatudlo sang Biblia nga nasubuan gid ang Dios sa aton pag-antos—kag sa indi madugay dulaon na niya ini. Binagbinaga ang tatlo ka kamatuoran nga makita sa Biblia.

Nahibaluan sang Dios nga nagaantos kita. Halin pa sang una, nakita na ni Jehova * nga nagaantos ang mga tawo kay “ang iya mga mata nagatan-aw” sa tanan nga butang. (Salmo 11:4; 56:8) Halimbawa, sang ginapigos ang iya mga sumilimba sang dumaan nga tion, nagsiling ang Dios: “Nakita ko ang kapipit-an sang akon katawohan.” Pero diutay lang bala ang iya nahibaluan sa ila pag-antos? Indi, kay nagsiling pa sia: “Nahibaloan ko ang ila mga kasubu.” (Exodo 3:7) Madamo nga tawo ang nalugpayan nga nahibaluan sang Dios ang aton pag-antos, bisan ang mga pagtilaw nga mahimo wala mahibaluan ukon mahangpan sang iban.—Salmo 31:7; Hulubaton 14:10.

Nasubuan ang Dios kon nagaantos kita. Indi lang nahibaluan sang Dios ang aton pag-antos kundi nasubuan man sia. Halimbawa, natublag gid ang Dios sang ginatilawan ang iya mga alagad sadto anay. “Sa tanan nila nga kapipit-an ginpiotan sia,” siling sang Biblia. (Isaias 63:9) Bisan pa labaw gid ang Dios sa tawo, nahanuklog sia sa mga nagaantos—nga subong bala nga sia mismo ang nasakitan! Sa pagkamatuod, “si Jehova mapinalanggaon gid kag maluluy-on.” (Santiago 5:11) Dugang pa, ginabuligan man kita ni Jehova nga mabatas ang aton ginaantos.—Filipos 4:12, 13.

Tapuson sang Dios ang tanan nga pag-antos sang tawo. Suno sa Biblia, tapuson sang Dios ang pag-antos sang tanan nga tawo sa duta. Paagi sa iya langitnon nga Ginharian, himuon ni Jehova nga mangin maayo ang kahimtangan sang mga tawo. Tuhoy sa sina nga tion, nagasaad ang Biblia nga “pahiran [sang Dios] ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa. Ang mga butang sang una nagtaliwan na.” (Bugna 21:4) Ano naman ang matabo sa mga napatay? Banhawon sila sang Dios diri sa duta agod magkabuhi man sila nga wala nagaantos. (Juan 5:28, 29) Maapektuhan pa bala ang isa sang iya masakit nga nagligad? Indi na, kay si Jehova nagsaad: “Ang una nga mga butang indi na pagdumdumon, ukon mag-abut sa painoino.”—Isaias 65:17. *