“Sang may problema kami, ginsugid ini sang akon asawa sa iya mga ginikanan. Nagtawag dayon ang iya tatay agod laygayan ako. Naugot gid ako!”—James. *

“Pirme nagasiling ang akon ugangan nga babayi, ‘Nahidlaw gid ako sa akon bata!’ Nagapanugid sia nga suod gid kuno sila, amo nga daw naghinulsol ako nga napamana ko ang iya bata kay nagalalain gid sia!”—Natasha.

Posible ayhan nga ang problema sa mga ugangan indi mangin problema sang mga mag-asawa?

Ang pag-asawahay nagatukod sing bag-o nga pamilya. Ang Biblia nagasiling nga “bayaan sang lalaki ang iya amay kag ang iya iloy kag magahiusa sa iya asawa” kon mangasawa sia. Amo man sini ang dapat himuon sang babayi. Kon mamana sia, ang Biblia nagasiling nga sila nga duha mangin “isa ka unod.” Isa na sila ka bag-o nga pamilya.—Mateo 19:5.

Dapat mo unahon ang imo tiayon sangsa imo mga ginikanan. “Ang isa ka importante nga butang nga dapat tinguhaan sang mag-asawa amo nga unahon gid ang ila tiayon bisan ano pa ang ila ginahimo,” siling sang manuglaygay sa pag-asawahay nga si John M. Gottman. “Agod magbakod pa ang relasyon ninyo nga mag-asawa, mahimo mo buhinan ang pagpakigsuod sa imo pamilya.” *

Mahimo nga nabudlayan ang iban nga ginikanan sa pagpasibu. Ang isa ka hoben pa nga bana nagsiling: “Sang dalaga pa ang akon asawa, pirme niya ginauna ang luyag sang iya mga ginikanan. Sang mag-asawahay na kami, nakita sang iya nanay nga may iban na sia nga ginauna. Nabudlayan ang iya nanay nga batunon ini.”

Mahimo nga nabudlayan man ang pila ka bag-ong kasal. “Ang imo mga ugangan indi pareho sa mga abyan nga ginapili mo,” siling ni James nga ginsambit kaina. “Daw subong bala nga may nagsiling sa imo, ‘May bag-o ka nga duha ka abyan, sa luyag mo ukon indi.’ Bisan pa daw mabuang ka sa ila, pamilya mo sila!”

Kon nabudlayan kamo nga mag-asawa sa pagpakig-angot sa inyo mga ugangan, magbuligay kamo sa pagsolbar sini. Sunda ang laygay sang Biblia nga ‘pangitaon ang paghidait, kag huptan ini.’—Salmo 34:14.

Agod mabuligan ka sa paghimo sini, binagbinaga ang masunod nga kahimtangan. Ang tagsa ka kahimtangan ginapresentar halin sa pagtamod sang bana ukon sang asawa. Pero, ang mga hangkat naaplikar sa bana ukon asawa, kag ang mga prinsipio nga ginapaathag makabulig sa imo sa pagsolbar sa pila ka hulusayon may kaangtanan sa mga ugangan.

Nagasiling ang imo asawa nga luyag niya kuntani nga mag-ayuhay kamo sang iya nanay. Apang nabudlayan ka makig-angot sa iya nanay.

Tilawi ini: Hambali ninyo nga mag-asawa ang problema kag mangin handa sa pagpaumod. Ang isyu indi ang imo ginabatyag sa imo ugangan, kundi ang imo ginabatyag sa imo asawa—ang tawo nga imo ginpanumpaan nga higugmaon. Sa inyo paghambalanay, magsugtanay kamo sa isa ukon duha ka paagi nga mapauswag mo ang imo relasyon sa iya iloy, kag dayon himua ini. Kon makita sang imo asawa nga nagapanikasog gid ikaw, wala duhaduha nga magadugang ang iya respeto sa imo.—Prinsipio sa Biblia: 1 Corinto 10:24.

Nagasiling ang imo bana nga mas palangga mo ang imo mga ginikanan sangsa iya.

Tilawi ini: Hambali ninyo nga mag-asawa ang problema, kag binagbinaga ini suno sa iya pagtamod. Siempre, indi dapat mangimon ang imo bana kon nagatinguha ka sa pagpakita sing pagtahod sa imo mga ginikanan. (Hulubaton 23:22) Pero dapat makumbinsi mo gid sia, paagi sa imo ginahambal kag ginahimo, nga sia ang una sa imo kabuhi sangsa imo ginikanan. Kon kumbinsido sa sini ang imo bana, indi sia magbatyag nga nagapakigkompetensia sia sa imo mga ginikanan sa pagkuha sang imo atension.—Prinsipio sa Biblia: Efeso 5:33.

Nagapangayo sing laygay ang imo asawa sa iya mga ginikanan sa baylo nga sa imo.

Tilawi ini: Maghambalanay kamo nga mag-asawa, kag magsugtanay kamo kon ano ang dapat kag indi dapat. Mangin rasonable. Sayop bala pirme nga magpakighambal sa ginikanan tuhoy sa isa ka problema? San-o ini nagakaigo? Kon nagaugyunay kamo sa kon ano ang dapat kag indi dapat, indi ini mangin problema.—Prinsipio sa Biblia: Filipos 4:5.