Si Delphine, nga ginsambit sa nagligad nga artikulo, nagpahubog bangod sang iya mga kabalaka. Wala ginapakalain sang Biblia ang pag-inom sing haganhagan, pero nagasiling ini: “Indi ka mangin palainom sing alak.” (Hulubaton 23:20) Ang pagpahubog nagaresulta sa pagbalatian, pagkaguba sang mga kaangtanan, kag kamatayon sang minilyon kada tuig. Mahimo kuntani ini malikawan kon sundon sang mga tawo ang maalam nga laygay sang Biblia.

Ginsunod ini ni Delphine. Nagsiling sia subong: “Narealisar ko nga indi pagpahubog ang solusyon sa akon mga kabalaka. Ginsunod ko ang laygay sang Filipos 4:6, 7, nga nagasiling: ‘Indi kamo magkabalaka sa bisan ano nga butang, kundi . . . ipahibalo sa Dios ang inyo mga pangabay.’ Kada gab-i, kon madamo ako sing ginapensar kag nagakabalaka, ginapangamuyo ko ini kay Jehova. Ginasugid ko ang tanan ko nga ginabatyag sa iya, pati na ang akon kaakig, kasakit, kag pagkadula sing paglaum, kag ginapangabay ko nga makakita ako sing mga paagi nga mangin positibo. Pagkaaga, ginasiguro ko nga malipatan ko ina nga mga balatyagon. Bangod pirme ko ina ginahimo, nakabulig ini sa akon nga magpokus sa kon ano ang ara sa akon kag indi sa mga wala sa akon. Nagdesisyon ako nga indi na gid mag-inom sing makahulubog nga ilimnon. Importante gid ang kalinong nga akon nasapwan, gani indi ko gusto nga madula ini.”

Ang imoralidad amo ang isa sa mga problema nga nagaresulta sa kasakit kag kasubo. Pero mabuligan kita sang mga prinsipio sang Biblia nga malikawan ina paagi sa paglikaw sang pila sa panguna nga kabangdanan sini—halimbawa, pag-flirt kag pornograpiya. “Kahapos lang mag-flirt,” siling sang pamatan-on nga si Samuel. “Kon kaisa wala man ako naluyag sa isa ka babayi, pero kon mabal-an ko nga nanamian sia sa akon—nanamian ako mag-flirt sa iya.” Ginapasibangdan si Samuel nga pirme naga-flirt sa iban—bisan pa indi niya ini intension—ano pa ginatuodtuod na lang niya ini. Pero ginakonsiensia man sia. “Makahalit gid ini,” siling niya, “kay nangin maiyaiyahon ka na.”

Ginbasa ni Samuel ang artikulo para sa mga pamatan-on sa website nga jw.org. Kag ginpamensaran niya ang Hulubaton 20:11, nga nagasiling: “Paagi sa iya mga buhat ginapakita sang bata [ukon, “bata nga lalaki,” footnote] kon bala husto kag matarong ang iya ginahimo.” Paano ina nakabulig kay Samuel? Narealisar niya nga ang iya ginahimo indi husto kag indi matarong. Nagsiling sia: “Natun-an ko nga ang pamatan-on nga naga-flirt sa iban, mangin indi maayo nga bana ukon asawa sa ulihi. Ginapensar ko kon ano ayhan ang batyagon sang akon mangin asawa kon makita niya ako nga naga-flirt sa iban nga babayi. Narealisar ko nga makahalit gid ini nga batasan. Indi buot silingon nga mahapos ini himuon, husto na ini.” Nagbag-o si Samuel. Ang paglikaw niya sa pag-flirt sa iban nakabulig sa iya nga malikawan man ang imoralidad.

Mas daku pa gid ang posibilidad nga makahimo sing imoralidad si Antonio: Naadik sia sa pornograpiya. Bisan palangga niya ang iya asawa, pirme lang sia nagakatentar magtan-aw sini. Nagsiling sia nga nakabulig gid sa iya ang 1 Pedro 5:8. Ini nagasiling: “Hupti ang inyo ikasarang sa paghunahuna sing maayo, mangin mabinantayon! Ang inyo kaaway, ang Yawa, nagaluyong subong sang nagangurob nga leon, nga nagapangita sing tulukbon.” Si Antonio nagsiling: “Bisan diin lang may pornograpiya, kag indi ini dali makuha sa aton pensar. Ina nga bersikulo nagapahanumdom sa akon kon kay sin-o naghalin ina nga mga pagsulay. Natun-an ko nga dumdumon dayon nga ang pornograpiya naghalin sa Yawa. Narealisar ko nga si Jehova lamang ang makabulig agod ‘mahuptan ko ang akon ikasarang sa paghunahuna kag mangin mabinantayon’ para indi mahalitan ang akon hunahuna, tagipusuon, kag ang amon kaangtanan nga mag-asawa.” Nabaton ni Antonio ang kinahanglanon nga bulig, kag nauntatan niya ang iya malain nga batasan. Gani, nalikawan niya ang mas daku nga mga problema.

Maathag nga mabuligan kita sang Biblia nga malikawan ang serioso nga mga problema. Pero ano abi kon may madugay ka na nga mga problema nga wala gihapon masolbar? Tan-awon naton kon paano ang Pulong sang Dios makabulig sa aton.