Samtang nagadugang ang aton ihibalo sa mga kinaiya sang isa, mas nakilala pa gid naton sia, amo nga nagabakod pa gid ang pag-abyanay. Sing kaanggid, samtang nagadugang ang aton ihibalo sa mga kinaiya ni Jehova, mas nakilala pa gid naton sia, amo nga nagabakod pa gid ang aton pagpakig-abyan sa iya. Sa tanan nga matahom nga kinaiya sang Dios, apat ang nagapanguna: ang iya gahom, kaalam, hustisya, kag gugma.

“O Soberanong Ginuong Jehova! Ikaw ang naghimo sang langit kag sang duta paagi sa imo daku nga gahom.”—JEREMIAS 32:17.

Makita sa mga tinuga ang gahom sang Dios. Halimbawa, kon magtindog ka sa initan, ano ang mabatyagan mo sa imo panit? Ang kainit sang adlaw. Ang matuod, mabatyagan mo ang resulta sang gahom ni Jehova. Daw ano kainit ang adlaw? Sa sentro sini, ang temperatura nagalab-ot sa mga 27,000,000 degrees Fahrenheit (15,000,000°C). Kada segundo, nagapagua ang adlaw sing init nga pareho sa paglupok sang ginatos ka milyon ka nuklear nga bomba.

Pero ang aton adlaw gamay lang kon ikumparar sa minilyon ka bituon sa uniberso. Ang mga sientipiko nagbulubanta nga ang isa sa pinakadaku nga bituon, ang UY Scuti, mas daku sing mga 1,700 ka beses sangsa adlaw. Kon ibulos ang UY Scuti sa adlaw, matabunan sini ang duta asta ang Jupiter. Gani mahimo mahangpan na naton ang ginsiling ni Jeremias nga ginhimo ni Jehova nga Dios ang langit kag duta, pati ang aton uniberso, paagi sa iya daku nga gahom.

 Paano kita nakabenepisyo sa gahom sang Dios? Ang aton kabuhi nagadepende sa mga tinuga sang Dios, pareho sang adlaw kag sang tanan nga tinuga sa duta. Ginagamit man sang Dios ang iya gahom para makabenepisyo ang kada isa sa aton. Paano? Sang unang siglo, ginhatagan sang Dios si Jesus sang gahom nga maghimo sing mga milagro. Aton mabasa: “Ang mga bulag nakakita kag ang mga piang nakalakat, ang mga aruon nag-ayo kag ang mga bungol nakabati, ang mga patay nabanhaw.” (Mateo 11:5) Kamusta subong? “Ginahatagan niya sing kusog ang ginakapoy,” siling sang Biblia, kag nagsiling man ini: “Ang mga nagalaum kay Jehova maulian sing kusog.” (Isaias 40:29, 31) Ang Dios makahatag sing “gahom nga labaw sa kinaandan” para maatubang naton ukon mabatas ang mga kabudlayan kag mga pagtilaw. (2 Corinto 4:7) Makalilipay gid nga mangin suod sa isa ka mahigugmaon nga Dios nga nagagamit sang iya wala tupong nga gahom para sa aton.

“Tuman kadamo sang imo binuhatan, O Jehova! Ginhimo mo ini tanan sa imo kaalam.”—SALMO 104:24.

Samtang nagadamo ang aton nahibaluan sa mga butang nga gintuga sang Dios, mas nagadayaw pa gid kita sa iya kaalam. May isa ka pagtuon nga ginatawag biomimetics, diin ginatun-an sang mga sientipiko ang mga tinuga ni Jehova kag ginailog nila ang mga desinyo sini. Lakip sa sini ang simple nga lente sang kamera asta sa komplikado nga desinyo sang mga eroplano.

Mas makita ang kaalam sang Dios sa desinyo sang lawas sang tawo. Halimbawa, binagbinaga ang pagdaku sang bata. Ang proseso nagasugod sa isa ka napertilisar nga selula, nga nagaunod sang kinahanglanon nga mga impormasyon nga ara sa gene. Ini nga selula nagadamo nga pareho ang hitsura. Pero pagligad sang tion, magadamo ini sing ginatos pero sarisari na nga klase, pareho sang mga selula sa dugo, sa nerve, kag sa tul-an. Dayon amat-amat nga maporma ang mga organo kag manghikot. Sa sulod lang sang siam ka bulan, ang isa ka napertilisar nga selula mangin lapsag na nga may binilyon ka selula. Ang kaalam sa sini nga desinyo nagpahulag sa iban nga mag-ugyon sa ginsiling sang manunulat sang Biblia: “Dayawon ko ikaw kay sa makahalawhaw nga paagi ginhimo ako sing makatilingala.”—Salmo 139:14.

Paano kita nakabenepisyo sa kaalam sang Dios? Nahibaluan sang Manunuga kon paano kita magmalipayon. Bangod sang iya daku nga ihibalo kag paghangop, naghatag sia sing maalam nga mga laygay paagi sa iya Pulong, ang Biblia. Halimbawa, ini nagasiling: “Padayon nga . . . magpinatawaray kamo sing kinabubut-on.” (Colosas 3:13) Maalamon bala ina nga laygay? Huo. Suno sa research, mangin maayo ang tulog kag maganubo ang presyon sang isa nga mapinatawaron. Mahimo maganubo man ang posibilidad nga ma-depress sia kag magbalatian. Ang Dios pareho sa isa ka maalam kag mapinalanggaon nga abyan nga pirme nagahatag sing laygay nga makabulig sa aton. (2 Timoteo 3:16, 17) Indi bala nga gusto mo sini nga klase sang abyan?

“Si Jehova mahigugmaon sa katarungan.”—SALMO 37:28.

Pirme matarong ang ginahimo sang Dios. Amo kon ngaa “imposible nga ang matuod nga Dios maghimo sing malaut, nga ang Labing Gamhanan maghimo sing sayop!” (Job 34:10) Matarong ang iya mga paghukom, pareho sang ginsiling sang salmista kay Jehova: “Hukman mo sing matarong ang mga katawhan.” (Salmo 67:4) Bangod “si Jehova nagatan-aw sa tagipusuon,” indi sia madaya sang pagpakunokuno kay nahibaluan gid niya ang kamatuoran kag makahukom sia sing husto. (1 Samuel 16:7) Dugang pa, nahibaluan sang Dios ang tanan nga inhustisya kag korapsion sa duta, kag nagpromisa sia nga sa indi madugay “ang mga malauton utdon sa duta.”—Hulubaton 2:22.

Pero ang Dios indi mapintas nga hukom nga gusto lang magsilot. Nagapakita sia sing kaluoy kon kinahanglanon. Ang Biblia nagasiling: “Si Jehova maluluy-on kag mainawaon,” bisan pa sa mga malauton kon maghinulsol sila. Indi bala nga matuod gid ini nga hustisya?—Salmo 103:8; 2 Pedro 3:9.

Paano kita nakabenepisyo sa hustisya sang Dios? Si apostol Pedro nagsiling: “Ang Dios wala sing ginapasulabi, apang sa tagsa ka pungsod, nahamuot sia sa tawo nga nagakahadlok sa iya kag nagahimo sing matarong.” (Binuhatan 10:34, 35) Nakabenepisyo kita sa hustisya sang Dios kay wala sia sing ginapasulabi ukon ginapaboran. Mahimo niya kita batunon kag mangin mga sumilimba niya bisan ano man ang aton rasa, nasyonalidad, edukasyon, ukon kahimtangan sa pangabuhi.

Bangod gusto sang Dios nga maintiendihan naton kag makabenepisyo kita sa iya hustisya, ginhatagan niya kita sing konsiensia. Ginalaragway sang Kasulatan ang konsiensia bilang isa ka ‘kasuguan nga nasulat sa aton tagipusuon,’ nga ‘nagapahibalo’ kon bala husto ukon indi ang aton ginahimo. (Roma 2:15) Paano kita nakabenepisyo? Kon nahanas sing maayo ang aton konsiensia, magapahulag ini sa aton nga likawan ang makahalalit ukon sala nga mga buhat, kag maghinulsol kag magbag-o kon  makasala kita. Gani, kon nahangpan naton ang hustisya sang Dios, mabuligan kita sini kag mangin suod pa kita sa iya!

“Ang Dios gugma.”—1 JUAN 4:8.

May gahom, kaalam, kag hustisya ang Dios, pero ang Biblia wala magsiling nga ang Dios gahom, kaalam ukon hustisya. Nagasiling ini nga sia ang gugma. Ngaa? Ang gahom sang Dios amo ang ginagamit niya para manghikot kag ginatuytuyan sia sang iya hustisya kag kaalam nga himuon ini. Pero ang gugma amo ang rason kon ngaa nagapanghikot sia. Ginahimo niya ang tanan bangod sa gugma.

Bisan pa nga wala sing kulang kay Jehova, ginpahulag sia sang iya gugma nga magtuga sang maalam nga mga tinuga, sa langit kag sa duta, para mabaton nila ang iya pagpalangga kag pag-atipan. Ginhanda niya sing maayo ang duta para istaran sang mga tawo nga gintuga niya. Kag padayon nga ginapakita niya ang iya gugma sa ila kay “ginapabutlak niya ang iya adlaw sa mga malauton kag sa mga maayo. Ginahatagan niya sing ulan ang mga matarong kag mga indi matarong.”—Mateo 5:45.

Dugang pa, “si Jehova mapinalanggaon gid kag maluluy-on.” (Santiago 5:11) Ginapalangga niya ang mga nagatinguha nga makilala sia kag nagapalapit sa iya. Ginatamod niya sila bilang mga indibiduwal. Ang matuod, “nagaulikid sia sa [imo].”—1 Pedro 5:7.

Paano kita nakabenepisyo sa gugma sang Dios? Nanamian kita sa katahom sang pagtunod sang adlaw. Nalipay kita kon mabatian naton ang kadlaw sang lapsag. Ginapabaloran gid naton ang pagpalangga sang suod nga miembro sang aton pamilya. Indi gid man ini tuman ka kinahanglanon, pero nagapahalipay gid ini sa aton.

Nagabenepisyo pa gid kita sa isa pa ka paagi nga ginapakita sang Dios ang iya gugma: ang pangamuyo. Ang Biblia nagasiling: “Indi kamo magkabalaka sa bisan ano nga butang, kundi sa tanan nga butang paagi sa pangamuyo kag pag-ampo nga may pagpasalamat, ipahibalo sa Dios ang inyo mga pangabay.” Pareho sa mapinalanggaon nga amay, gusto niya nga mangayo kita sing bulig sa iya, ilabi na ang mga ginakabalak-an gid naton. Kay bangod sang masinakripisyuhon nga gugma ni Jehova, nagpromisa sia nga hatagan niya kita sang “paghidait sang Dios nga labaw sa tanan nga paghangop.”—Filipos 4:6, 7.

Nabinagbinag naton sing makadali ang panguna nga mga kinaiya sang Dios, pareho sang iya gugma, kaalam, hustisya, kag gahom. Nakabulig bala ini sa imo nga makilala ang Dios? Para makilala pa gid naton sia, ginaagda ka namon nga hibaluon ang iya nahimo kag pagahimuon pa para sa aton.