Kon may problema ka, gusto mo gid nga buligan ka sang imo maayo nga abyan. Ang pila nagasiling nga indi nila abyan ang Dios kay wala man kuno sing ginhimo ang Dios para sa ila. Ang matuod, indi lang nga madamo sing nahimo ang Dios para sa aton kundi may himuon pa sia para madula ang tanan naton nga problema kag pag-antos subong. Ano ang himuon sang Dios?

Dulaon sang Dios ang tanan nga malaut ukon malain paagi sa pagdula sang ginhalinan sini. Ginpakilala sang Biblia kon sin-o sia: “Ang bug-os nga kalibutan yara sa gahom sang isa nga malauton.” (1 Juan 5:19) Ang “isa nga malauton” amo ang ginatawag ni Jesus nga “manuggahom sini nga kalibutan,” si Satanas nga Yawa. (Juan 12:31) Ang impluwensia ni Satanas sa kalibutan amo ang ginhalinan sang mabudlay nga mga kahimtangan sa duta. Ano ang himuon sang Dios?

Mahulag sa indi madugay si Jehova nga Dios paagi sa iya Anak, si Jesucristo, para “malaglag niya ang isa nga may ikasarang sa pagpahanabo sing kamatayon, nga amo ang Yawa.” (Hebreo 2:14; 1 Juan 3:8) Ang Biblia nagapakita nga nahibaluan mismo sang Yawa nga “malip-ot na lamang ang iya tion” antes sia laglagon. (Bugna 12:12) Dulaon man sang Dios ang tanan nga nagahimo sang malain.—Salmo 37:9; Hulubaton 2:22.

Pagkatapos nga madula ang tanan nga malain sa duta, manghikot ang aton Manunuga para matuman ang iya katuyuan sa mga tawo kag sa duta. Ano ang paabuton naton?

Magapadayon ang kalinong kag seguridad. “Ang mga mahagop magapanubli sang duta, kag mangin malipayon gid sila sa bugana nga paghidait.”—Salmo 37:11.

Bastante na ang masustansia nga pagkaon. “Mangin bugana ang mga uyas sa duta; sa putukputukan sang kabukiran magahapayhapay ini.”—Salmo 72:16.

Komportable nga mga balay kag maayo nga mga trabaho. “Magapatindog sila sing balay kag magapuyo sa sini, kag magatanom sila sing mga ulubasan kag magakaon sang bunga sini. . . . Ang akon mga pinili magakalipay sa binuhatan sang ila kamot.”—Isaias 65:21, 22.

Gusto mo bala makita ini nga mga kahimtangan? Malapit na lang ini maeksperiensiahan sang tanan.

Ang tanan nagabalatian kag nagakapatay subong, pero malapit na lang ini dulaon. Gamiton na sang Dios sa indi madugay ang mga benepisyo sang halad gawad ni Jesus para “ang tanan nga nagatuo sa iya indi malaglag kundi makatigayon sang kabuhi nga wala sing katapusan.” (Juan 3:16) Ano ang mangin resulta?

Wala na sing balatian. “Wala sing pumuluyo nga magasiling: ‘Nagamasakit ako.’ Ang katawhan nga nagapuyo sa duta napatawad na sa ila sala.”—Isaias 33:24.

Wala na sing kamatayon. “Dulaon niya sing dayon ang kamatayon, kag pahiran sang Soberanong Ginuong Jehova ang luha sa tanan nga nawong.”—Isaias 25:8.

Ang mga tawo mabuhi na sing wala katapusan. “Ang dulot nga ginahatag sang Dios amo ang kabuhi nga wala sing katapusan paagi kay Cristo Jesus nga aton Ginuo.”—Roma 6:23.

Banhawon ang mga patay. “May pagkabanhaw sang mga matarong kag mga indi matarong.” (Binuhatan 24:15) Makabenepisyo sila sa regalo sang Dios nga gawad.

Paano ini himuon sang Dios?

Himuon sang Dios ang iya katuyuan sa mga tawo kag sa duta paagi sa gobierno sa langit, kag si Cristo Jesus amo ang ginpili nga Manuggahom. (Salmo 110:1, 2) Amo ini ang gobierno, ukon ginharian, nga gintudlo ni Jesus sa iya mga sumulunod nga ipangamuyo: “Amay namon nga yara sa langit, . . . magkari ang imo Ginharian.”—Mateo 6:9, 10.

Ang Ginharian sang Dios amo ang magagahom sa duta kag dulaon sini ang tanan nga kasakit kag pag-antos. Ang Ginharian amo ang pinakamaayo nga gobierno para sa mga tawo! Amo ini ang rason kon ngaa nanikasog gid si Jesus nga ibantala ang “maayong balita sang Ginharian” sang yari sia sa duta kag ginsugo man niya ang iya mga disipulo nga himuon ini.—Mateo 4:23; 24:14.

Bangod palangga gid ni Jehova nga Dios ang mga tawo nga iya gintuga, ginpromisa niya nga himuon ini tanan. Indi bala gusto mo nga kilalahon sia kag mangin malapit sa iya? Kon himuon mo ini, ano ang mabaton mo? Ipaathag ini sa masunod nga artikulo.