ANG ginauyatan ni Jordan nga tahal, nga barko ang korte, ordinaryo lang. Pero, isa ini sa iya pinakahamili nga gamit. Si Jordan nagsiling, “Ginhatag ini sa akon ni Russell, ang may edad na nga abyan sang amon pamilya, sang bata pa ako.” Sang napatay si Russell, nahibaluan ni Jordan ang importante nga papel ni Russell sa kabuhi sang iya lolo kag mga ginikanan, kay ginpabakod niya sila sa mabudlay nga mga kahimtangan. “Bangod mas nakilala ko si Russell,” siling ni Jordan, “mas ginapabaloran ko ining gamay nga regalo subong.”

Pareho sa ginapakita sang halimbawa ni Jordan, ang regalo mahimo gamay lang ukon wala sing balor para sa iban. Pero mahimo ginaapresyar gid ini sang nakabaton, kag ginakabig ini nga hamili ukon tama kamahal. Ginlaragway sang Biblia ang isa ka regalo nga tama kamahal: “Ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tanan nga nagatuo sa iya indi malaglag kundi makatigayon sang kabuhi nga wala sing katapusan.”—Juan 3:16.

May mas malahalon pa bala nga regalo sangsa regalo nga makahatag sang kabuhi nga wala sing katapusan sa magabaton sini? Mahimo wala ini ginapabaloran sang iban, pero para sa matuod nga mga Cristiano, “tuman kamahal” ini nga regalo. (Salmo 49:8; 1 Pedro 1:18, 19) Pero ngaa ginhatag sang Dios ang kabuhi sang iya Anak bilang regalo sa kalibutan?

Ginpaathag ini ni apostol Pablo paagi sa pagsiling: “Paagi sa isa ka tawo nagsulod ang sala sa kalibutan kag ang kamatayon paagi sa sala, kag naglapnag ang kamatayon sa tanan nga tawo.” (Roma 5:12) Ang una nga tawo nga si Adan nakasala kay hungod niya nga ginlapas ang Dios, gani nag-antos sia sa silot nga kamatayon. Bangod kay Adan, mapatay ang tanan niya nga kaliwatan—ang tanan nga tawo.

“Ang bayad sa sala amo ang kamatayon, apang ang dulot nga ginahatag sang Dios amo ang kabuhi  nga wala sing katapusan paagi kay Cristo Jesus nga aton Ginuo.” (Roma 6:23) Para hilwayon ang katawhan sa silot nga kamatayon, ginpadala sang Dios sa duta ang iya Anak, si Jesucristo, agod ihalad ang iya perpekto nga kabuhi para sa kalibutan. Paagi sa sini nga halad, nga ginatawag “gawad,” ang tanan nga nagatuo kay Jesus makabaton sang kabuhi nga wala sing katapusan.—Roma 3:24.

Si Pablo nagsiling parte sa tanan nga pagpakamaayo sang Dios sa iya mga sumilimba paagi kay Jesucristo: “Pasalamatan naton ang Dios bangod sa iya indi malaragway kag wala sing bayad nga dulot.” (2 Corinto 9:15) Dalayawon gid ang gawad amo nga indi naton ini malaragway sing bug-os. Pero ngaa mas dalayawon ang gawad kon ikumparar sa tanan nga regalo sang Dios sa katawhan? Ngaa pinasahi gid ini nga regalo sang Dios? * Kag ano ang dapat naton himuon bangod sini? Ginaagda ka namon nga basahon ang mga sabat sang Biblia sa sini nga mga pamangkot sa masunod nga duha ka artikulo.