NAGLALAIN ka na bala nga daw indi mo na gusto mabuhi? Siguro naintiendihan mo ang ginbatyag ni Adriana. Nag-antos sia bangod sang tuman nga pagkabalaka kag kasubo, kag nagbatyag nga wala na sia sing paglaum. Natalupangdan sang mga doktor nga may clinical depression sia, ukon ang sobra kag malawig nga pagpangasubo bangod sang indi bal-anon nga mga rason.

Pareho man sini ang ginbatyag ni Kaoru, nga taga-Japan, nga nag-atipan sang iya tigulang na nga mga ginikanan. “Sadto nga tion, daw indi ko masarangan ang akon trabaho sa ulubrahan,” paathag niya. “Wala na ako gana magkaon kag indi na ako makatulog sing maayo. Sa pensar ko, mangin tawhay lang kon patay na ako.”

Si Ojebode, nga taga-Nigeria, nagsiling, “Pirme lang ako masubo kag nagahibi, gani nangita ako sing paagi para tapuson ang akon kabuhi.” Maayo lang kay si Ojebode, si Kaoru, kag si Adriana wala naghikog. Pero kada tuig, ginatos ka libo ang nagahikog.

Mga lalaki ang kalabanan nga nagahikog, kag madamo sa ila ang nahuya nga magpabulig. Si Jesus nagsiling nga ang mga masakiton nagakinahanglan sing manugbulong. (Lucas 5:31) Gani kon nagapamensar ka man nga maghikog, indi ka dapat mahuya nga magpabulig para mabatuan mo ini. Natalupangdan sang madamo nga maayo gid kon magpakonsulta kag mangayo sing bulig sang doktor kon gina-depress sila. Amo sini ang ginhimo ni Ojebode, ni Kaoru, kag ni Adriana kag subong nag-ayoayo na ang ila pamatyag.

Para mabulong ang depresyon, mahimo resetahan kag istoryahon sang doktor ang pasyente, depende sa kon ano ang kinahanglanon. Kinahanglan man niya ang suporta kag pag-ulikid sang iya pamilya kag mga abyan. Kag puede gid nga mangin suod nga abyan sang isa si Jehova nga Dios, nga nagahatag sing nagakaigo nga bulig paagi sa iya Pulong, ang Biblia.

Ang mga may depresyon masami nagakinahanglan sang malawig nga pagpabulong kag pagbag-o sang ila pagkabuhi. Kon may depresyon ka, maumpawan ka gid kon mabal-an mo nga may maayo kita nga palaabuton. Amo sini ang ginabatyag ni Ojebode. Siling niya, “Ginapaabot ko gid ang katumanan sang tagna sa Isaias 33:24 nga sa ulihi, wala na sing magasiling ‘Nagamasakit ako.’” Pareho ni Ojebode, mapaumpawan ka sang makalilipay nga promisa sang Dios nga “bag-o nga duta,” sa diin wala na sing “kasakit.” (Bugna 21:1, 4) Upod man sa sina nga promisa ang pagdula sing tanan nga kasakit nga resulta sang aton mga ginapamensar kag ginabatyag. Ang imo ginabatyag nga grabe nga kasubo ukon kasakit madula na sing permanente, “indi na [ini] pagdumdumon, ukon magpabilin sa [imo] tagipusuon.”—Isaias 65:17.