Sing kaanggid, may isa ka mabaskog nga “bagyo” nga magaabot, nga gintawag ni Jesus nga “dakung kapipit-an.” (Mateo 24:21) Wala sa aton ang makalikaw sa sini nga kapipit-an. Pero may mahimo kita para maluwas sa sini. Ano?

Sa iya Sermon sa Bukid, ginsugid ni Jesus kon ano ang aton himuon: “Gani, padayon ninyo nga unahon ang pagpangita sa Ginharian kag sa pagkamatarong sang Dios.” (Mateo 6:33) Paano naton ina mahimo?

Unaha ang pagpangita sa Ginharian sang Dios. Buot silingon, dapat ang Ginharian sang Dios amo ang pinakaimportante sa aton kabuhi. (Mateo 6:25, 32, 33) Ngaa? Bangod ang problema sang katawhan indi masolbar sang mga tawo lang. Ang Ginharian sang Dios gid lang ang makasarang sina.

Pangitaa ang iya pagkamatarong. Dapat himuon gid naton ang aton bug-os nga masarangan nga magkabuhi suno sa matarong nga mga kasuguan kag mga prinsipio sang Dios. Ngaa? Kay kon balewalaon naton ini kag magpagusto lang sa pagdesisyon, mangin malain gid ang resulta. (Hulubaton 16:25) Pero kon magkabuhi kita suno sa ginapatuman sang Dios, mapalipay naton sia kag mangin mas malipayon man kita.—Isaias 48:17, 18.

Padayon nga unaha ang pagpangita sa Ginharian sang Dios kag sa iya pagkamatarong. Nagpaandam si Jesus nga ang pila mahimo mawili sa pagpangita sang madamo nga kuarta kay abi nila  makahatag gid ini sing seguridad. Ang iban naman mahimo mabalaka sing sobra sa ila pagkabuhi amo nga wala na sila sing tion sa pagpangita sa Ginharian sang Dios.—Mateo 6:19-21, 25-32.

Pero nagpromisa si Jesus nga ang mga nagasuporta sang Ginharian sang Dios pagahatagan sang ila kinahanglanon subong kag sang madamo pa nga pagpakamaayo sa palaabuton.—Mateo 6:33.

Bisan pa gin-una sang mga disipulo ni Jesus sang unang siglo ang Ginharian sang Dios kag ang iya pagkamatarong, wala nadula ang tanan nga kasakit kag pag-antos sa ila tion. Pero naproteksionan sila. Paano?

Bangod ginsunod nila ang matarong nga mga talaksan sang Dios, wala nila naeksperiensiahan ang kabudlayan nga gin-antos sang mga wala nagtuman sa Dios. Ang ila mabakod nga pagtuo nga magakari ang Ginharian nagbulig sa ila nga mabatas ang pinakamabudlay nga mga problema sa kabuhi. Kag ginhatagan sila sang Dios sang “gahom nga labaw sa kinaandan” para makabatas.—2 Corinto 4:7-9.

Ginsunod gid sang mga Cristiano sang unang siglo ang sugo ni Jesus nga unahon ang Ginharian. Ginbantala nila ang maayong balita sang Ginharian asta sa malab-utan nila. (Colosas 1:23) May nagahimo bala sing pareho sina subong?

Huo! Nabal-an sang mga Saksi ni Jehova nga malip-ot na lang ang tion antes tapuson sang Ginharian sang Dios ining sistema sang mga butang. Gani ginahimo nila ang ila bug-os nga masarangan nga tumanon ang ginsugo ni Jesus: “Ining maayong balita sang Ginharian ibantala sa bug-os nga duta subong panaksi sa tanan nga pungsod, kag dayon magaabot ang katapusan.”—Mateo 24:14.

Ano ang imo himuon sa tapos mo mabatian ang maayong balita? Ginapalig-on ka namon nga ilugon ang mga pumuluyo sa siudad sang Berea sa Macedonia sang unang siglo. Sang mabatian nila kay apostol Pablo ang maayong balita sang Ginharian, “nalangkag gid” sila sa pagbaton sini. Dayon, ‘gin-usisa nila sing maayo ang Kasulatan’ para masigurado nga nabase sa Kasulatan ang ila nabatian, kag gin-aplikar nila ang ila natun-an.—Binuhatan 17:11, 12.

Puede mo man ini himuon. Paagi sa pag-una sa pagpangita sa Ginharian sang Dios kag sang iya pagkamatarong, maproteksionan ka subong kag maeksperiensiahan mo ang wala sing katapusan nga paghidait kag seguridad sa palaabuton.