Importante ang una nga 60 ka minuto sang bag-ong bun-ag nga lapsag. Ngaa? Kay ang pagpatupad sang lapsag sa iya iloy sini nga tion, may maayo nga epekto sa iya pagdaku. *

Ngaa ginaatipan gid sang iloy ang iya lapsag? Si propesor Jeannette Crenshaw nagpaathag sa The Journal of Perinatal Education nga ang pagdamo sang hormone nga oxytocin “nagapukaw sang balatyagon sang iloy pagkatapos magbata samtang ginatandog niya, ginahimutaran, kag ginapatiti ang iya lapsag.” May isa pa ka hormone nga ginapagua sini nga tion nga “nagabulig sa iloy nga palanggaon ang iya lapsag” kag makigkomunikar sa iya. Ngaa importante gid ini?

Ang pagkasuod sang mag-iloy gindesinyo sang mahigugmaon naton nga Manunuga, si Jehova nga Dios. * Gindayaw ni Hari David ang Dios kay ‘ginpagua sia sa tiyan sang iya iloy’ kag nabatyagan niya ang hakos kag pag-atipan sang iya iloy. Nangamuyo sia: “Gintugyan ako sa imo halin sa akon pagkabun-ag; halin pa sa tiyan sang akon iloy, ikaw na ang akon Dios.”—Salmo 22:9, 10.

BINAGBINAGA: Kon gintuga sang Dios ining komplikado nga desinyo para maatipan gid sang iloy ang iya lapsag, indi bala nga maathag nga nabalaka gid sia sa aton, kay “mga anak kita sang Dios”?—Binuhatan 17:29.

Si Jesucristo, nga mas nakakilala gid sa Manunuga, nagsiling: “Indi bala ang duha ka maya ginabaligya sa isa ka sensilyo nga diutay sing balor? Apang, wala sing isa sa ila nga mahulog sa duta nga indi mahibaluan sang inyo Amay. Bisan ang buhok sa inyo ulo naisip niya tanan. Gani, indi kamo magkahadlok, mas importante pa kamo sangsa madamo nga maya.”—Mateo 10:29-31.

Pila lang sa aton ang nagasapak sa magagmay nga pispis nga makita naton, kag indi gani kita makatalupangod kon may isa sa ila nga mahulog sa duta. Pero nakita sang aton Amay sa langit ang kada isa sa ila! Ang mga pispis, bisan ang madamo nga pispis, indi makatumbas sa balor sang isa ka tawo. Gani maathag ang leksion: ‘Indi ka dapat  mahadlok’ nga basi indi ka pagtalupangdon sang Dios, kay ang matuod, interesado gid sia imo!

Ang Biblia nagapasalig sa aton

• “Makita sang mga mata ni Jehova ang tanan nga lugar, ginatan-aw niya ang malain kag ang maayo.”—HULUBATON 15:3.

• “Ang mga mata ni Jehova nagatulok sa mga matarong, kag ang iya mga dulunggan nagapamati sa ila pagpangayo sing bulig.”—SALMO 34:15.

• “Magakalipay gid ako sa imo mainunungon nga gugma, kay nakita mo ang akon kalisdanan; nahibaluan mo ang akon tuman nga kasakit.”—SALMO 31:7.

May epekto bala sa aton kon mahibaluan naton nga ang Dios nagaulikid gid kag nagakabalaka sa aton? Huo, suno kay Hannah, * nga taga-England:

“Madamo nga beses nga nagbatyag ako nga indi ako palangga ni Jehova kag wala niya ginasabat ang akon mga pangamuyo. Abi ko kulang ako sing pagtuo sa iya. Pamatyag ko ginasilutan ako ukon wala ginasapak kay indi ako importante. Pamatyag ko wala nagaulikid ang Dios sa akon.”

Pero wala na ginaduhaduhaan ni Hannah ang atension kag pagpalangga ni Jehova. Ngaa? “Amat-amat lang ini nga natabo,” paathag niya. “Nadumduman ko ang isa ka pamulongpulong pila ka tuig na ang nagligad parte sa halad ni Jesus kag nagpahulag gid ini sa akon, kay ginbuligan ako sini nga indi magduhaduha sa gugma ni Jehova. Kag kon ginasabat gani ang akon mga pangamuyo, nagahibi ako, kay narealisar ko nga palangga gali ako ni Jehova. Bangod man sa pagtuon sa Biblia kag pagtambong sa Cristianong mga miting, mas nakilala ko si Jehova, ang iya personalidad, kag ang iya ginabatyag sa aton. Nangin maathag gid sa akon ang pagsakdag kag pagpalangga ni Jehova sa aton tanan kag gusto gid niya nga atipanon ang kada isa sa aton.”

Makapalig-on gid ang ginsiling ni Hannah. Pero paano naton masiguro nga nahangpan kita sang Dios kag nahibaluan niya ang aton ginabatyag? Sabton ini sa masunod nga artikulo.