Mabakod nga Pasalig Halin sa Pinakagamay nga Letra sang Hebreo
Makasalig bala kita nga matuman ang tanan nga ginpromisa sang Dios? Kumbinsido si Jesus sa sini, kag ang iya mga panudlo nagpabakod sa pagtuo sang iya mga tagpalamati. Binagbinaga ang iya ilustrasyon sa iya Sermon sa Bukid, nga narekord sa Mateo 5:18: “Sa pagkamatuod nagasiling ako sa inyo, bisan pa madula ang langit kag duta, wala sing bisan pinakagamay nga letra ukon bisan isa ka bahin sang letra sang Kasuguan nga madula tubtob ang tanan matuman.”
Ang pinakagamay nga letra sa Hebreo nga alpabeto amo ang י (yod), nga amo ang una nga letra sang Tetragrammaton, ang balaan nga ngalan sang Dios nga Jehova. * Magluwas sa mga tinaga kag mga letra sa Kasuguan sang Dios, importante gid sa mga escriba kag mga Fariseo ang “isa ka bahin sang letra.”
Si Jesus nagsiling nga posible pa madula ang langit kag ang duta sangsa indi matuman ang pinakagamay nga detalye sang Kasuguan. Pero ginapasalig kita sang Biblia nga magapabilin sa wala sing katubtuban ang literal nga langit kag duta. (Salmo 78:69) Gani ginapakita sini nga matuman gid bisan ang pinakagamay nga detalye sang Kasuguan.
Importante bala kay Jehova nga Dios ang gamay nga mga detalye? Huo. Binagbinaga ini: Ang mga Israelinhon sang una ginsilingan nga indi nila pagbalion ang tul-an sang kordero sang Paskua. (Exodo 12:46) Mahimo nga gamay lang ini nga detalye. Naintiendihan bala nila kon ngaa indi nila dapat pagbalion ang mga tul-an sini? Mahimo nga wala. Pero nahibaluan ni Jehova nga Dios nga ini nga detalye isa ka tagna nga matuman sa Mesias, nga wala sing bisan isa ka tul-an niya nga mabali kon patyon na sia sa usok sang pag-antos.—Salmo 34:20; Juan 19:31-33, 36.
Ano ang matun-an naton sa ginsiling ni Jesus? Makasalig man kita nga ang tanan nga ginpromisa ni Jehova nga Dios matuman, asta sa pinakagamay nga detalye. Mabakod gid ini nga pasalig halin sa pinakagamay nga letra sang Hebreo!
^ par. 3 Ang pinakagamay nga letra sa Griego nga alpabeto amo ang iota kag pareho ini sa Hebreo nga י (yod). Ang Kasuguan nga ginhatag kay Moises orihinal nga ginsulat kag ginkopya sa Hebreo, gani mahimo gid nga ang ginpatuhuyan ni Jesus amo ang Hebreo nga letra.
Basi Manamian Ka Man
SABAT SA MGA PAMANGKOT SA BIBLIA
Paghidait sa Duta—Paano?
Hibalua ang promisa sang Dios nga paghidait sa kalibutan paagi sa iya Ginharian.
SABAT SA MGA PAMANGKOT SA BIBLIA
Sin-o si Jehova?
Sia bala ang Dios sang isa lang ka grupo sang mga tawo, pareho sang mga Israelinhon?
BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)
Ano ang Ginsaad sang Biblia nga Matabo sa Palaabuton?
Mahimo nga makibot ka sa matahom nga paglaum sa sini.
