1. Ano ang dapat naton tanan himuon?

KON nagamasakit ka ukon nakapoy, madalagan ka bala sa isa ka palumba nga nabal-an mo nga mabudlay? Mahimo nga indi gid. Pero nagsiling si apostol Pablo nga ang tanan nga matuod nga mga Cristiano nagadalagan sa isa ka palumba. (Heb. 12:1) Kag tanan kita, bata man ukon tigulang, mabaskog ukon nakapoy, dapat magbatas asta sa katapusan kon gusto naton mabaton ang padya nga ihatag ni Jehova sa aton.—Mat. 24:13.

2. Suno sa 2 Timoteo 4:7, 8, ngaa nakahatag sang laygay si Pablo?

² Nakahatag sang laygay si Pablo bangod madinalag-on niya nga ‘natapos ang dalaganon.’ (Basaha ang 2 Timoteo 4:7, 8.) Pero ano ang palumba nga ginpatuhuyan ni Pablo?

3. Ano ang palumba nga ginpatuhuyan ni Pablo?

³ Gingamit kon kaisa ni Pablo nga halimbawa ang ginahimo sa mga hampang sa Gresya sang una para magtudlo sang importante nga mga leksion. (1 Cor. 9:25-27; 2 Tim. 2:5) Pila ka beses niya nga ginpaanggid ang kabuhi sang mga Cristiano sa pagdalagan sa isa ka palumba. (1 Cor. 9:24; Gal. 2:2; Fil. 2:16) Nagasugod sa pagdalagan sa sini nga “palumba” ang isa kon magdedikar sia kay Jehova kag magpabawtismo. (1 Ped. 3:21) Matapos niya ini nga palumba kon hatagan na sia ni Jehova sang padya nga kabuhi nga wala sing katapusan.—Mat. 25:31-34, 46; 2 Tim. 4:8.

4. Ano ang binagbinagon naton sa sini nga artikulo?

⁴ Ngaa pareho sa marathon ang kabuhi sang Cristiano? May pila ka butang nga magkapareho sa sini. Binagbinagon naton ang tatlo. Una, dapat naton sundon ang husto nga dalan; ikaduha, dapat kita magpokus sa finish line; kag ikatlo, dapat kita magpadayon sa pagdalagan bisan may kabudlayan.

5. Ano ang dalanon nga dapat naton sundon, kag ngaa?

⁵ Para magdaug sa aktual nga palumba, dapat mag-agi ang mga nagadalagan sa isa ka espesipiko nga dalan. Gani kon gusto naton mabaton ang padya nga kabuhi nga wala sing katapusan, dapat naton sundon ang dalanon, ukon paagi sang pagkabuhi, para sa mga Cristiano. (Binu. 20:24; 1 Ped. 2:21) Pero indi gusto ni Satanas kag sang mga nagailog sa iya nga sundon naton ini nga dalanon. Gusto nila nga ‘magpadayon kita sa pagdalagan upod sa ila.’ (1 Ped. 4:4) Ginahikayan nila ang aton paagi sang pagkabuhi kag nagasiling sila nga mas maayo ang sa ila kay may kahilwayan sila. Pero indi ini matuod.—2 Ped. 2:19.

6. Ano ang matun-an mo kay Brian?

⁶ Ang tanan nga nagakabuhi pareho sang mga naimpluwensiahan sang kalibutan ni Satanas makamarasmas sa ulihi nga indi sila hilway, kundi mga ulipon gali sila. (Roma 6:16) Binagbinaga ang natabo kay Brian. Ginpalig-on sia sang iya mga ginikanan nga sundon ang paagi sang pagkabuhi para sa mga Cristiano. Pero sang magtin-edyer sia, nagduhaduha sia kon bala makalilipay gid ini nga paagi sang pagkabuhi. Nagdesisyon sia nga magkabuhi pareho sang mga nagasunod sa panghunahuna sang kalibutan ni Satanas. “Wala ko gid ginpaabot nga maadik ako sang makapagusto na ako,” siling niya. “Sang ulihi, nangin adik ako sa droga kag alkohol kag nangin imoral. Sa sulod sang pila ka tuig, gintilawan ko ang mas maisog nga mga droga kag nangin adik ako sa sini. Para masuportahan ko ang akon nagalala nga bisyo, nagbaligya ako sang droga.” Sang ulihi, nagdesisyon si Brian nga magkabuhi suno sa mga kasuguan ni Jehova. Ginbag-o niya ang iya kabuhi kag nagpabawtismo sang 2001. Subong, malipayon gid sia kay ginasunod niya ang paagi sang pagkabuhi para sa mga Cristiano. *

7. Suno sa Mateo 7:13, 14, ano ang duha ka dalan nga pilian naton?

⁷ Importante gid nga husto ang dalan nga pilion naton. Gusto ni Satanas nga mag-untat kita tanan sa pagdalagan sa mabudlay nga dalan nga “nagapadulong sa kabuhi” kag magsaylo sa malapad nga dalan nga ginaagyan sang kalabanan nga tawo sa sini nga kalibutan. Amo ini ang dalan nga nanamian sang madamo kag mahapos agyan. Pero “nagapadulong [ini] sa kalaglagan.” (Basaha ang Mateo 7:13, 14.) Para makapabilin kita sa husto nga dalan kag indi magtalang, dapat kita magsalig kay Jehova kag magpamati sa iya.

8. Kon masandad ang isa nga nagadalagan, ano ang ginahimo niya?

⁸ Ang mga nagadalagan sa marathon nagatulok pirme sa dalan nga ila ginaagyan para indi sila makasandad. Pero posible gihapon nga indi hungod nga mabungguan sila sang kaupod nila nga nagadalagan ukon makasandad sila. Kon matumba sila, nagabangon sila kag nagadalagan liwat. Wala sila nagapokus sa nasandaran nila. Nagapokus gid sila sa finish line kag sa padya nga ila mabaton.

9. Kon masandad kita, ano ang dapat naton himuon?

⁹ Sa aton palumba, mahimo nga masandad kita sing madamo nga beses bangod nagasala kita sa aton ginahambal ukon ginahimo. Ukon basi masakitan kita bangod sang sala nga mahimo sang kaupod naton nga nagadalagan. Posible gid ini matabo. Tanan kita indi perpekto, kag tanan kita nagadalagan sa mabudlay nga dalan nga nagapadulong sa kabuhi. Gani puede kita “mabungguan” sang iban ukon kita ang “makabunggo” sa ila kon kaisa. Nagsiling si Pablo nga kon kaisa “may rason nga magreklamo” ang kada isa sa aton. (Col. 3:13) Pero sa baylo nga magpokus sa nagpasandad sa aton, dapat kita magpokus sa padya nga ihatag sa aton. Kon matumba gid man kita, dapat kita magbangon kag padayon nga magdalagan. Kon maakig kita kag mag-untat sa pag-alagad kay Jehova, indi kita makalab-ot sa finish line kag indi naton mabaton ang padya. Isa pa, mangin kasandaran man kita sa iban nga nagatinguha sa pagdalagan sa mabudlay nga dalan nga nagapadulong sa kabuhi.

10. Paano naton malikawan nga mangin “kasandaran” sa iban?

¹⁰ Para malikawan man naton nga mangin “kasandaran” sa mga kaupod naton nga nagadalagan, indi naton pag-ipilit ang gusto naton kundi pasugtan naton sila nga himuon ang gusto nila kon posible. (Roma 14:13, 19-21; 1 Cor. 8:9, 13) Kon himuon naton ini, indi kita pareho sa mga nagadalagan sa aktual nga palumba. Nagaunahay sila kay gusto sang kada isa nga sia lang ang makakuha sang padya. Ginahunahuna lang nila kon ano ang makabulig sa ila para magdaug sa palumba. Gani basi dis-ugon pa nila ang tupad nila nga nagadalagan para sila ang mauna. Indi kita pareho sa ila  kay wala kita nagakompetensiahanay. (Gal. 5:26; 6:4) Gusto naton buligan ang madamo para makaupod naton sila nga makasulod sa bag-ong kalibutan sang Dios kag mabuhi sing wala sing katapusan. Gani ginatinguhaan naton nga sundon ang laygay ni Pablo nga ‘pangitaon indi lamang ang aton personal nga kaayuhan, kundi ang iya man sang iban.’—Fil. 2:4.

11. Sa ano nagapokus ang isa nga nagadalagan, kag ngaa?

¹¹ Ang mga nagadalagan sa aktual nga palumba wala lamang nagatulok sa dalan nga ila ginaagyan; nagapokus man sila sa finish line. Bisan indi pa nila ini makita, ginaimadyin na nila nga malab-ot nila ini kag mabaton ang padya. Ginaganahan pa gid sila nga magdalagan kon pirme nila ini pensaron.

12. Ano ang ginhatag ni Jehova sa aton?

¹² Ginhatagan ni Jehova ang iya katawhan sang sigurado nga padya kon matapos nila ang palumba. Amo ini ang kabuhi nga wala sing katapusan sa langit ukon sa paraiso sa duta. Ginalaragway sang Biblia ini nga padya, gani maimadyin naton kon mangin ano ka makalilipay ang aton kabuhi. Kon pirme naton pamensaron ang palaabuton nga ginpromisa ni Jehova sa aton, mangin mas determinado pa gid kita nga magbatas.

13. Ngaa mas maayo ang aton kahimtangan sangsa mga nagadalagan sa aktual nga palumba?

¹³ Dapat batason sang mga nagadalagan sa palumba sa Gresya ang kakapoy, ang pagpalanakit nga ila nabatyagan, ukon ang iban pa nga kabudlayan. Pero nagadepende lang sila sa ila paghanas kag sa ila kusog. Pareho sa ila, ginahanas man kita kon paano magdalagan sa aton palumba. Pero mas maayo ang aton kahimtangan sangsa mga nagadalagan sa aktual nga palumba. Ginahatagan kita ni Jehova sang kusog, kag wala niya ini ginalimitehan. Kon magsalig kita kay Jehova, nagapromisa sia nga hanason niya kita kag pabaskugon man niya kita!—1 Ped. 5:10.

14. Paano makabulig sa aton ang 2 Corinto 12:9, 10 nga mabatas ang mga kabudlayan?

¹⁴ Naeksperiensiahan ni Pablo ang madamo nga kabudlayan. Gin-insulto sia kag ginhingabot. Kon kaisa, nakabatyag sia nga maluya sia kag may ginbatas man sia nga “tunok sa unod.” (2 Cor. 12:7) Pero para sa iya, indi ini rason nga mag-untat sa pag-alagad. Sa baylo, gintamod niya ini nga kahigayunan nga magsalig kay Jehova. (Basaha ang 2 Corinto 12:9, 10.) Bangod sang panimuot ni Pablo, ginbuligan sia ni Jehova nga mabatas ang tanan nga kabudlayan.

15. Kon ilugon naton si Pablo, ano ang mabaton naton?

¹⁵ Mahimo nga insultuhon man kita ukon hingabuton bangod sang aton pagtuo. Basi may balatian kita ukon ginakapoy. Pero kon ilugon naton si Pablo, ini nga mga kabudlayan mangin kahigayunan para mabaton naton ang gugma kag bulig ni Jehova.

16. Bisan pa kon may balatian ka, ano ang masarangan mo pa himuon?

¹⁶ May malala ka bala nga balatian amo nga indi ka na makabangon ukon naka-wheel chair ka na lang? Mabudlay na bala sa imo ang paglakat ukon buron na ang imo panan-aw? Kon amo sini ang imo kahimtangan, makaalagad ka pa ayhan kay Jehova kaupod ang mga pamatan-on kag may maayo nga panglawas? Huo! Madamo sang tigulang na kag may balatian ang nagadalagan sa dalan nga nagapadulong sa kabuhi. Indi nila ini mahimo sa ila lang kusog. Makabaton sila sang kusog halin kay Jehova paagi sa pagpamati sa Cristianong mga miting paagi sa telepono ukon sa paglantaw sang narekord nga video sang mga miting. Kag  nagabantala sila sa mga doktor, mga nars, kag sa ila mga paryente.

17. Ano ang ginabatyag ni Jehova sa mga may balatian?

¹⁷ Kon indi mo na mahimo ang tanan nga gusto mo himuon sa pag-alagad kay Jehova bangod sang balatian, indi maluyahan sang buot kag indi maghunahuna nga indi ka na makabatas asta sa katapusan. Palangga ka ni Jehova bangod sang imo pagtuo sa iya kag sang tanan nga nahimo mo para sa iya. Kinahanglan mo gid ang bulig niya subong, kag indi ka niya pagbayaan. (Sal. 9:10) Sa baylo, magasuod pa gid sia sa imo. Ang isa ka sister nga may mga problema sa panglawas nagsiling: “Bangod nagalala ang akon balatian, nabuhinan ang akon kahigayunan nga masugid ang kamatuoran sa iban. Pero kabalo ako nga bisan diutay na lang ang mahimo ko, mapahalipay ko gihapon si Jehova, kag bangod sini, nalipay man ako.” Kon masubuan ka, dumduma nga kaupod mo si Jehova. Hunahunaa ang halimbawa ni Pablo, kag dumduma ang makapalig-on niya nga ginsiling: “Nalipay ako sa mga kaluyahon, . . . kay kon maluya ako, mabaskog ako.”—2 Cor. 12:10.

18. Ano ang mabudlay gid nga kahimtangan sang iban?

¹⁸ May isa pa ka kabudlayan ang iban nga nagadalagan sa dalan nga nagapadulong sa kabuhi. May mga problema sila nga indi makita kag mahimo indi mahangpan sang iban. Halimbawa, may depresyon sila ukon nagakabalaka sila sing sobra. Ngaa mabudlay gid ang kahimtangan sining pinalangga nga mga alagad ni Jehova? Kon ang isa nabalian sing butkon ukon naka-wheel chair, makita sang iban ang iya kahimtangan kag mahimo nila sia buligan. Pero ang mga may problema sa emosyon ukon sa hunahuna mahimo nga daw wala sing diperensia kon tulukon. Pareho lang kabudlay ang ila kahimtangan sa nabalian sing butkon. Pero bangod indi makita sang iban ang ila ginaantos, mahimo nga indi sila mapakitaan sang gugma kag kaluoy.

19. Ano ang matun-an naton sa halimbawa ni Mefiboset?

¹⁹ Kon indi mo na mahimo ang gusto mo himuon sa pag-alagad kay Jehova kag pamatyag mo indi ka mahangpan sang iban, mapalig-on ka sa halimbawa ni Mefiboset. (2 Sam. 4:4) Napiang sia halin sang bata pa sia, kag gintratar sia ni Hari David sing indi makatarunganon base sa ginsiling sang iban parte sa iya. Indi si Mefiboset ang balasulon kon ngaa natabo ini sa iya. Pero wala sia naakig, kag nagpasalamat pa sia sa maayo nga natabo sa iya. Nagpasalamat sia sa ginpakita sa iya ni David nga kaayo sang una. (2 Sam. 9:6-10) Gani sang gintratar sia ni David sing indi makatarunganon, gintinguhaan niya nga mahangpan ang bug-os nga sitwasyon. Wala sia naakig kay nagsala  si David. Kag wala niya ginbasol si Jehova sa ginhimo ni David. Ginhunahuna ni Mefiboset kon paano niya masuportahan ang hari nga ginpili ni Jehova. (2 Sam. 16:1-4; 19:24-30) Ginpasulat ni Jehova sa iya Pulong ang maayo gid nga halimbawa ni Mefiboset kay may matun-an kita sa sini.—Roma 15:4.

20. Ano ang kahimtangan sang iban bangod sang kabalaka, pero ano ang masaligan nila?

²⁰ Bangod sang sobra nga kabalaka, may pila ka kauturan nga ginanerbios kag indi mahim-os kon kaupod nila ang iban bisan sa kinaandan nga mga sitwasyon. Mahimo nga nabudlayan sila kon kaupod nila ang madamo nga tawo, pero padayon sila nga nagatambong sa mga miting, asembleya, kag kombension. Nakulbaan sila mag-istorya sa indi nila kilala, pero nagabantala sila gihapon sa iban. Kon amo sini ang imo kahimtangan, magsalig nga wala ka nagaisahanon. Madamo man ang nagabatyag sang imo nabatyagan. Dumduma nga nalipay si Jehova sa imo tinagipusuon nga pagpanikasog. Ang imo padayon nga pag-alagad nagapamatuod nga ginapakamaayo ka niya kag ginahatagan sang kusog nga kinahanglan mo. * (Fil. 4:6, 7; 1 Ped. 5:7) Kon nagaalagad ka kay Jehova bisan pa may problema ka sa panglawas ukon sa emosyon, makasalig ka nga nalipay si Jehova sa imo.

21. Sa bulig ni Jehova, ano ang mahimo naton tanan?

²¹ Maayo lang kay may kinatuhayan ang aktual nga palumba kag ang palumba nga ginpatuhuyan ni Pablo. Sa aktual nga palumba sang panahon sang Biblia, isa lang ka tawo ang makabaton sang padya. Indi pareho sa sini, makabaton sang padya nga kabuhi nga wala sing katapusan ang tanan nga matutom nga nagapadayon sa paagi sang pagkabuhi para sa mga Cristiano. (Juan 3:16) Kag sa aktual nga palumba, dapat maayo ang panglawas sang tanan nga nagadalagan; kay kon indi, mahimo nga indi sila magdaug sa palumba. Madamo sa aton ang indi maayo ang panglawas, pero nagabatas kita. (2 Cor. 4:16) Sa bulig ni Jehova, matapos naton tanan ang dalaganon!