Sang mga 13 anyos ako, nasubuan gid ako kay amat-amat ako nga nagapahilayo kay Jehova. Nakita ko ang akon mga kaupod sa eskwelahan nga daw makapagusto sila sa ila himuon sa ila kabuhi, kag nahisa ako sa ila. Pamatyag ko sobra ka estrikto sang akon mga ginikanan kag sang mga kasuguan sang Biblia, kag daw kabudlay gid sang mga ginapahimo ni Jehova. Nagapati ako nga matuod si Jehova, pero indi ko mabatyagan nga suod ako sa iya.

Naga-preaching lang ako para indi ako mangin inactive. Bangod wala ako nagahanda sa pag-preaching, indi ako kabalo kon ano ang isiling ko para sugdan ang pag-istorya sa iban, kag indi na ako kabalo sang akon isugpon para mapadayon ang pag-istorya. Gani wala ako sang ginabalikan nga interesado ukon Bible study, kag wala gid ako nalipay. Bangod sini, wala na gid ako nanamian mag-preaching. Sa pensar ko lang, ‘Ma-preaching gid kada semana? Kabudlay sini himuon.’

Sang 17 anyos ako, gusto ko na gid maghalin sa poder sang akon mga ginikanan. Gani nag-impake ako, naghalin ako sa amon balay, kag nagsaylo sa Australia. Nasubuan gid ang akon mga ginikanan  sang ginbiyaan ko sila. Nabalaka gid sila, pero nagasalig sila nga padayon ako nga magaalagad kay Jehova.

Sa Australia, mas napabay-an ko na gid ang akon pag-alagad kay Jehova. May mga tion nga indi ako makatambong sa mga miting. Nakig-abyan ako sa pareho ko nga mga pamatan-on nga nagatambong man sa mga miting, pero pagkadason nga gab-i, makadto kami sa nightclub para mag-inom-inom kag magsaotsaot. Kon madumduman ko ang eksperiensia ko sadto, narealisar ko nga gindungan ko ang pag-alagad kay Jehova kag ang pagpakig-abyan sa kalibutan. Pero ang matuod, wala ako nalipay sa akon pag-alagad kag wala man ako nalipay sa pagpakig-abyan sa kalibutan.

Pagligad sang mga duha ka tuig, may nakilala ako nga sister. Bangod sa iya, napalig-on ako nga usisaon ang ginahimo ko sa akon kabuhi. Pero wala sia kabalo nga napalig-on gid niya ako. Lima kami sadto ka dalaga nga nagaistar sa isa ka balay, kag gin-agda namon ang manugtatap sang sirkito kag ang iya asawa nga si Tamara nga magdayon sa amon balay sa sulod sang isa ka semana. Kon may ginaasikaso sa kongregasyon ang bana ni Tamara, nagaupod sia sa amon nga mga babayi, kag kasadya sa amon. Nalipay gid ako sadto nga tion. Kanami gid sa iya kag indi ka matahap mag-istorya sa iya. Nagdayaw gid ako kay kasadya man gali updon sang isa ka tawo nga nakapokus sa pag-alagad kay Jehova.

Malipayon gid si Tamara sa iya pag-alagad. Mapalig-on ka gid nga ilugon ang iya pagpabalor sa kamatuoran kag sa ministeryo. Malipayon sia kay ginahatag niya kay Jehova ang iya bug-os nga masarangan. Pero indi ako malipayon, kay wala ko ginahimo ang akon bug-os nga masarangan sa pag-alagad. May daku nga epekto sa akon ang maayo nga panimuot kag matuod nga kalipay nga nakita ko kay Tamara. Bangod sang iya halimbawa, napalig-on ako nga pamalandungan ini nga kamatuoran: Gusto ni Jehova nga mag-alagad kita sa iya nga “may kasadya” kag ‘magsinggit kita sa kalipay.’—Sal. 100:2.

Gusto ko gid mangin malipayon pareho kay Tamara. Pero para matabo ina, dapat ako maghimo sang pila ka importante nga mga pagbag-o.  Wala ko man ini mahimo dayon, kundi amat-amat lang. Nagahanda na ako sa pagbantala, kag naga-auxiliary payunir ako kon kaisa. Bangod sini, wala na ako masyado nakulbaan kag mas may kompiansa na ako. Mas nalipay pa gid ako sa pagbantala kay pirme ko na ginagamit ang Biblia. Sang ulihi, nag-auxiliary payunir na ako kada bulan.

Lainlain ang edad sang akon mga abyan. Ginahatag nila kay Jehova ang ila bug-os nga masarangan kag nalipay sila sa pag-alagad. Bangod sang ila maayo nga halimbawa, napalig-on ako nga pamalandungan kon ano ang pinakaimportante sa akon kabuhi, kag napalig-on man ako nga basahon ang Biblia kada adlaw. Nadugangan pa gid ang akon kalipay sa pagbantala, kag sang ulihi, nagregular payunir ako. Pagligad sang mga tinuig, nangin malipayon ako kag nabatyagan ko na liwat nga pamilya ko ang kongregasyon.

Pagligad sang isa ka tuig, nakilala ko si Alex. Mabuot sia, kag palangga gid niya si Jehova. Nanamian gid sia sa pagbantala. Isa sia ka ministeryal nga alagad kag anom ka tuig na nga nagapayunir. Nag-alagad man si Alex sing pila ka bulan sa Malawi bangod kinahanglan didto ang dugang nga mga manugbantala. Nagdayaw gid sia sa mga misyonero nga nakaupod niya didto kag napalig-on sia nga padayon nga unahon ang pag-alagad kay Jehova sa iya kabuhi.

Sang 2003, nagpakasal kami ni Alex, kag padayon kami nga nagpayunir. Madamo kami sang maayo nga mga eksperiensia, kag ginpakamaayo gid kami ni Jehova.

Sang 2009, gin-asayn kami bilang mga misyonero sa Timor-Leste, nga isa ka gamay nga pungsod sa isa ka isla sa Indonesia. Nakibot gid kami sa sini. Nalipay kami pero nakulbaan man. Pagligad sang lima ka bulan, nag-abot kami sa Dili, ang kapital sang pungsod.

Lain gid ang amon kabuhi diri sangsa amon naandan. Dapat kami mag-adjust sa bag-o nga kultura, lenguahe, pagkaon, kag sitwasyon. Ang kalabanan  nga tawo nga mabantalaan namon pigado gid, wala makaeskwela, kag nakaeksperiensia sang inhustisya. Kag madamo ang nahalitan sa pisikal kag na-trauma bangod sang inaway kag kasingki. *

Kanami gid magbantala diri. Halimbawa, nakilala ko ang 13 anyos nga si Maria. * Nasubuan gid sia kay pila pa lang ka tuig nga napatay ang iya iloy, kag malaka lang niya makita ang iya amay. Pareho sang madamo nga kabataan, wala sing direksion ang kabuhi ni Maria. Nadumduman ko sang isa ka bes nga nagahibi sia sang ginasugid niya sa akon ang iya nabatyagan. Pero wala ako sing naintiendihan sa iya ginahambal bangod indi pa ako masyado kabalo sang ila lenguahe. Nagpangamuyo ako kay Jehova kag ginpangabay ko sia nga buligan ako para mapalig-on ko si Maria. Dayon, ginbasa ko sa iya ang mga teksto nga makapaumpaw sa iya. Pagligad sang pila ka tuig, bangod sang pagtuon sang kamatuoran, daku gid ang ginbag-o ni Maria. Nangin mas malipayon na sia, kag nagbag-o pati ang iya pamayo. Nagpabawtismo sia, kag subong, may mga Bible study na sia. Nangin pamilya ni Maria ang madamo nga katawhan ni Jehova, kag nabatyagan niya nga palangga gid nila sia.

Ginapakamaayo gid ni Jehova ang pagbantala sa Timor-Leste. Ang kalabanan sang manugbantala ginbawtismuhan sang nagligad lang nga napulo ka tuig, pero madamo sa ila ang nangin payunir, ministeryal nga alagad, ukon gulang. Ang iban nagaalagad sa remote translation office kag nagabulig sa pag-translate sa mga publikasyon parte sa Biblia sa mga lenguahe sa sini nga lugar. Nalipay gid ako nga mabatian ang ila pagkanta sa mga miting, makita ang ila mga yuhum, kag makita nga nagauswag sila sa espirituwal.

Lain gid ang kabuhi sa Timor-Leste kon ikumparar sa kabuhi sa Australia, pero malipayon gid kami. Kon kaisa, nagaginutok kami sa gamay nga bus nga puno sing pasahero kag may karga pa nga mga uga kag mga utan nga halin sa merkado. May mga adlaw nga naga-Bible study kami sa gamay nga balay nga duta ang salog kag may mga manok nga nagadinalagan. Magin-ot man kag mapaang. Bisan pa nakaeksperiensia kami sang mga kabudlayan, pirme ko nahunahuna, ‘Makalilipay gid ini nga kabuhi!’

Kon pamensaron ko ang akon kabuhi sang una, nagapasalamat gid ako nga ginhimo sang akon mga ginikanan ang ila bug-os nga masarangan para tudluan ako parte kay Jehova. Kag ginbuligan nila ako sang nagluya ang akon pagtuo sang tin-edyer ako. Napamatud-an ko nga matuod gid ang ginasiling sang Hulubaton 22:6. Nalipay gid si Mama kag si Papa sa amon ni Alex kay ginaalagad namon si Jehova. Sugod sang 2016, nagaalagad kami sa sirkito sa teritoryo sang branch office sa Australasia.

Daw indi mapatihan nga sang una, wala gid ako nanamian sa pagbantala. Subong, nanamian na gid ako magbantala! Narealisar ko nga ano man ang matabo sa aton kabuhi, mangin malipayon gid kita kon mag-alagad kita sa Dios sing bug-os tagipusuon. Ang nagligad nga 18 ka tuig nga kaupod ko si Alex sa pag-alagad kay Jehova amo ang pinakamalipayon nga tion sang akon kabuhi. Naeksperiensiahan ko gid ang ginsiling ni salmista David kay Jehova: “Ang tanan nga nagadangop sa imo magakasadya; magahugyaw sila pirme sa kalipay. . . . Kag magakasadya ang mga nagahigugma sang imo ngalan.”—Sal. 5:11.