BANGOD mabudlay na gid ang pagkabuhi sa sining “katapusan nga mga adlaw,” dapat gid kita mangin mapinasensiahon. (2 Tim. 3:1-5) Madamo nga tawo ang mahigugmaon sa kaugalingon, indi magsugot sa bisan ano nga kasugtanan, kag wala sing pagpugong sa kaugalingon. Indi gid sila mapinasensiahon. Gani dapat naton pamangkuton ang aton kaugalingon: ‘Indi na bala ako mapinasensiahon pareho sang mga tawo sa palibot ko? Ano ang buot silingon kon mapinasensiahon ang isa? Ano ang himuon ko para mangin permanente nga bahin sang akon personalidad ini nga kinaiya sang Cristiano?’

Suno sa paggamit sang Biblia, ang pagkamapinasensiahon indi lamang ang pagbatas sa isa ka problema. Ang mapinasensiahon nga tawo nagabatas nga may katuyuan. Wala niya ginahunahuna ang iya lang kaugalingon, kundi nabalaka man sia sa kaayuhan sang isa nga amo ang ginhalinan sang problema. Gani, nagalaum sia gihapon nga magaayo ang kahimtangan kag magabalik ang ila maayo nga kaangtanan. Amo sini kon ngaa ginlakip sang Biblia ang pagkamapinasensiahon sa mga kinaiya nga naghalin sa gugma. * (1 Cor. 13:4) Ang “pagkamapinasensiahon” isa man sa “mga kinaiya nga ginapatubas sang espiritu.” (Gal. 5:22, 23) Gani paano naton mapakita ini nga kinaiya?

Para mangin mapinasensiahon kita, dapat kita mangamuyo kay Jehova nga buligan kita sang iya espiritu, nga ginahatag niya sa mga nagasalig sa iya. (Luc. 11:13) Pero bisan pa gamhanan ang espiritu sang Dios, dapat man naton himuon ang masarangan naton suno sa aton ginapangamuyo. (Sal. 86:10, 11) Buot silingon, dapat kita magpanikasog nga mangin mapinasensiahon kada adlaw para mangin permanente ini nga bahin sang aton personalidad. Pero mahimo nga mabudlayan kita kon kaisa. Ano pa ang makabulig sa aton?

Dapat naton tun-an kag ilugon ang perpekto nga halimbawa ni Jesus. Sang ginlaragway ni apostol Pablo “ang bag-o nga personalidad,” nga nagalakip sang “pagkamapinasensiahon,” ginpalig-on niya kita nga ‘tugutan naton ang paghidait sang Cristo nga maggahom sa aton tagipusuon.’ (Col. 3:10, 12, 15) ‘Magagahom’ ini nga paghidait sa aton tagipusuon kon ilugon naton si Jesus kag nagasalig gid kita nga solbaron sang Dios sa Iya gintalana nga tion ang aton problema. Kon may amo kita sini nga pagsalig, indi madula ang aton pasensia, ano man ang matabo sa palibot naton.—Juan 14:27; 16:33.

Bisan pa gusto na gid naton mag-abot ang ginpromisa sang Dios nga bag-ong kalibutan, mangin mas mapinasensiahon kita kon dumdumon naton nga mapinasensiahon si Jehova sa aton. Ang Kasulatan nagapasalig sa aton: “Si Jehova indi mahinay may kaangtanan sa iya saad, kaangay sang  ginahunahuna sang pila ka tawo, sa baylo mapailubon sia sa inyo bangod indi niya luyag nga ang bisan sin-o malaglag kundi luyag niya nga ang tanan mahatagan sang kahigayunan nga maghinulsol.” (2 Ped. 3:9) Gani kon ginahunahuna naton nga mapinasensiahon si Jehova sa aton, mangin mas mapinasensiahon man kita sa iban. (Roma 2:4) Ano ang pila ka kahimtangan nga dapat kita mangin mapinasensiahon?

Kada adlaw, dapat kita mangin mapinasensiahon sa madamo nga kahimtangan. Halimbawa, dapat mapinasensiahon kita nga indi magsaligbat kon nagahambal ang iban bisan pa importante ang aton inughambal. (Sant. 1:19) Dapat man kita mangin mapinasensiahon kon nairitar kita sa batasan sang aton mga kauturan. Sa baylo nga maugot, mas maayo kon dumdumon naton kon paano ginatamod ni Jehova kag ni Jesus ang aton mga kaluyahon. Wala sila nagapokus sa aton gagmay nga mga sala. Sa baylo, makita nila ang aton maayo nga mga kinaiya kag mapinasensiahon sila nga nagahatag sa aton sing tion para mag-uswag.—1 Tim. 1:16; 1 Ped. 3:12.

Dapat man kita mangin mapinasensiahon kon may magsiling sa aton nga may nahambal kita ukon nahimo nga sala. Basi maakig kita dayon kag depensahan ang aton kaugalingon. Pero indi amo sini ang ginapalig-on sa aton sang Pulong sang Dios. Nagsiling ini: “Mas maayo pa nga magpailob sangsa magmatinaastaason. Indi ka mangakig dayon, kay ang nagapangakig dayon mga buangbuang.” (Man. 7:8, 9) Gani, bisan pa indi matuod ang ginasiling sang iban parte sa aton, dapat kita mangin mapinasensiahon kag maghunahuna sing maayo antes magsabat. Amo sini ang ginhimo ni Jesus sang ginpakalain sia sang iban.—Mat. 11:19.

Dapat gid mangin mapinasensiahon ang mga ginikanan kon ginatadlong nila ang sala nga panimuot ukon handum sang ila kabataan. Binagbinaga ang natabo kay Mattias, nga nagaalagad sa Bethel sa Scandinavia. Sang tin-edyer pa sia, pirme sia ginayaguta sang iya mga kaeskwela bangod sang iya mga ginapatihan. Wala ini mabal-an sang iya mga ginikanan sang primero. Pero natalupangdan nila nga nagaduhaduha na ang ila bata sa iya mga ginapatihan. “Dapat gid kami mangin mapinasensiahon sadto,” siling sang amay ni Mattias nga si Gillis. Nagapamangkot si Mattias: “Sin-o ang Dios? Ano abi kon ang Biblia indi Pulong sang Dios? Paano naton masigurado nga Dios gid ang nagsugo sini sa aton?” Ginsilingan man niya ang iya amay: “Ngaa hukman gid ako kon indi ko gusto magpati sa ginapatihan ninyo?”

Nagpaathag si Gillis: “Kon kaisa, nagapamangkot ang amon bata nga akig, indi sa amon sang iya iloy, kundi sa kamatuoran nga pamatyag niya amo ang nagapabudlay sa iya.” Ano ang ginhimo ni Gillis? “Malawig kami nga nagaistoryahanay sang akon bata. Sa kalabanan nga tion, ginapamatian ko lang sia kag ginapamangkot para maintiendihan ko ang iya ginabatyag kag pagtamod. Kon kaisa, may ginapaathag ako sa iya kag ginasilingan ko sia nga pamensaron niya anay ini sing pila ka adlaw antes namon ini istoryahan liwat. May mga tion nga ginasiling ko nga pamensaron ko anay ang ginhambal niya. Bangod sang amon  pirme nga pag-istoryahanay, amat-amat nga nahangpan ni Mattias ang mga panudlo parte sa gawad, pagkasoberano sang Dios, kag gugma ni Jehova. Nagkinahanglan ini sang malawig nga tion, kag masami nga mabudlay ini, pero amat-amat nga nagbakod ang iya gugma kay Jehova. Nalipay gid kami sang akon asawa nga nangin mapinasensiahon kami sa pagbulig sa amon bata sang tin-edyer pa sia, kay napatudok gid namon ang kamatuoran sa iya tagipusuon.”

Nagsalig si Gillis kag ang iya asawa sa bulig ni Jehova samtang mapinasensiahon nila nga ginabuligan ang ila bata. Nagsiling si Gillis: “Pirme ko sadto ginasilingan si Mattias nga palangga gid namon sia sang iya iloy amo nga nagapangamuyo gid kami sing hanuot kay Jehova nga buligan sia nga makahangop.” Nalipay gid ini nga mga ginikanan nga nangin mapinasensiahon sila!

Dapat man kita mangin mapinasensiahon kon nagaatipan sang nagamasakit nga miembro sang aton pamilya ukon mga abyan. Binagbinaga ang halimbawa ni Ellen, * nga taga-Scandinavia man.

Sang nagligad nga mga walo ka tuig, duha ka beses nga na-stroke ang bana ni Ellen kag naapektuhan ang iya utok. Gani indi na makabatyag ang iya bana sing kaluoy, kalipay, ukon kasubo. Mabudlay gid ini para kay Ellen. Nagsiling sia: “Dapat gid ako mangin mapinasensiahon kag pirme mangamuyo.” Nagsiling pa sia: “Nalugpayan ako sang ginasiling sang paborito ko nga teksto sa Filipos 4:13: ‘Sa tanan nga butang may kusog ako paagi sa isa nga nagapabakod sa akon.’” Bangod sang kusog kag bulig ni Jehova, nangin mapinasensiahon si Ellen sa pagbatas sang iya kahimtangan.—Sal. 62:5, 6.

Si Jehova ang pinakamaayo nga halimbawa sang nagpakita sang pagkamapinasensiahon. (2 Ped. 3:15) Sa Pulong sang Dios, mabasa naton ang madamo nga beses nga nangin mapinasensiahon si Jehova. (Neh. 9:30; Isa. 30:18) Halimbawa, ano ang ginhimo ni Jehova sang pila ka beses nga namangkot si Abraham parte sa Iya desisyon nga laglagon ang Sodoma? Una, ginpabay-an lang ni Jehova si Abraham sa paghambal. Mapinasensiahon si Jehova nga namati sa kada pamangkot kag ginakabalak-an ni Abraham. Dayon, ginpakita ni Jehova nga nagapamati sia sang ginsulit niya ang ginhambal ni Abraham nga kabalaka kag ginpasalig sia nga indi Niya paglaglagon ang Sodoma bisan pa napulo lang ang matarong sa sini nga siudad. (Gen. 18:22-33) Mapinasensiahon gid sia nga namati kag wala naakig!

Importante gid nga bahin sang bag-o nga personalidad ang pagkamapinasensiahon nga dapat ipakita sang tanan nga Cristiano. Kon panikasugan gid naton nga mangin mapinasensiahon, mapadunggan naton ang aton mapinalanggaon kag mapinasensiahon nga Amay sa langit, kag malakip kita sa “mga nagapanubli sang mga saad paagi sa pagtuo kag paghulat sing mapinasensiahon.”—Heb. 6:10-12.