1. Kanday sin-o ang nagbuligay para matukod ang kongregasyon sa Filipos?

SANG nag-abot sanday apostol Pablo, Silas, Lucas, kag Timoteo sa Filipos, nga isa ka siudad nga sakop sang Roma, nasapwan nila nga madamo ang interesado sa maayong balita sang Ginharian. Nagbuligay ining apat ka makugi nga mga utod para tukuron ang kongregasyon didto. Sugod sadto, regular na nga nagatipon ang tanan nga disipulo didto, nga mahimo sa balay sang maabiabihon nga tumuluo nga si Lidia.—Binu. 16:40.

2. Ano nga pagtilaw ang naeksperiensiahan gilayon sang kongregasyon sa Filipos?

² Ang bag-o lang gintukod nga kongregasyon nakaeksperiensia gilayon sang pagtilaw. Gingamit ni Satanas ang mga tawo nga nagadumot sa kamatuoran para pamatukan ang pagbantala nanday Pablo kag sang iya mga kaupod. Gani gindakop sanday Pablo kag Silas, ginbunal sang bilugon, kag ginpriso. Paggua nila sa prisuhan, ginbisitahan nila ang bag-o nga mga disipulo kag ginpalig-on. Dayon nagbiya sa siudad sanday Pablo, Silas, kag Timoteo pero mahimo nga nagpabilin si Lucas didto. Ano ang ginhimo sang bag-o nga mga kauturan didto? Nagpadayon sila nga nag-alagad nga may kakugi sa bulig sang espiritu ni Jehova. (Fil. 2:12) Nalipay gid si Pablo sa ila ginhimo!

3. Parte sa ano ang ginpangamuyo ni Pablo nga narekord sa Filipos 1:9-11?

³ Pagligad sang mga napulo ka tuig, nagsulat si Pablo sa kongregasyon sa Filipos. Samtang ginabasa mo ini nga sulat, mabatyagan mo nga palangga gid ni Pablo ang iya mga kauturan. “Daw ano ang kahidlaw ko sa inyo tanan bangod palangga ko kamo kaangay sang pagpalangga ni Cristo Jesus sa inyo,” siling niya.  (Fil. 1:8) Nagsiling man sia nga ginapangamuyo niya sila. Ginpangabay niya kay Jehova nga buligan sila nga magbugana sa gugma, mapat-od nila ang mas importante nga mga butang, mangin wala sila sing kasawayan, indi nila mapasandad ang iban, kag padayon sila nga magpatubas sing matarong nga bunga. Subong, madamo man kita sing matun-an sa sinsero nga sulat ni Pablo. Gani basahon naton ang sulat ni Pablo para sa mga taga-Filipos. (Basaha ang Filipos 1:9-11.) Dayon binagbinagon naton ang mga punto nga ginsambit niya kag kon paano naton maaplikar ang kada isa sini.

4. (a) Suno sa 1 Juan 4:9, 10, paano ginpakita ni Jehova ang iya gugma sa aton? (b) Daw ano dapat kadaku ang aton gugma sa Dios?

⁴ Ginpakita ni Jehova ang iya daku nga gugma sa aton sang ginpadala niya ang iya Anak sa duta kag mapatay para sa aton mga sala. (Basaha ang 1 Juan 4:9, 10.) Ang gugma sang Dios nagapalig-on sa aton nga higugmaon man sia. (Roma 5:8) Daw ano dapat kadaku ang aton gugma sa Dios? Ginsabat ini ni Jesus sang ginsilingan niya ang isa ka Fariseo: “Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.” (Mat. 22:36, 37) Gani dapat higugmaon naton ang Dios sa bug-os naton nga tagipusuon. Kag gusto naton nga mas maglig-on pa gid ang aton gugma sa iya sa kada adlaw. Ginsilingan ni Pablo ang mga taga-Filipos nga ang ila gugma dapat “magbugana sing labi pa gid.” Ano ang aton himuon para maglig-on pa gid ang aton gugma sa Dios?

5. Paano naton mapalig-on pa gid ang aton gugma?

⁵ Dapat kilalahon naton ang Dios para mahigugma naton sia. Ang Biblia nagasiling: “Ang wala nagahigugma wala makakilala sa Dios, bangod ang Dios gugma.” (1 Juan 4:8) Ginpaathag ni apostol Pablo nga mangin malig-on ang aton gugma sa Dios kon may ara kita “sibu nga ihibalo kag bug-os nga paghantop” parte sa Iya. (Fil. 1:9) Sang nagsugod kita sa pagtuon sa Biblia, natun-an naton nga higugmaon ang Dios bisan wala pa naton nahibal-an ang tanan parte sa iya. Samtang nagadamo ang aton natun-an parte kay Jehova, nagalig-on pa gid ang aton gugma sa iya. Amo kon ngaa importante gid para sa aton nga tun-an sing regular ang Biblia kag pamalandungan ang aton nabasahan!—Fil. 2:16.

6. Suno sa 1 Juan 4:11, 20, 21, paano kita magbugana sa gugma?

⁶ Ang daku nga gugma sang Dios sa aton dapat magpahulag man sa aton nga higugmaon ang aton mga kauturan. (Basaha ang 1 Juan 4:11, 20, 21.) Basi maghunahuna kita nga hapos lang higugmaon ang aton mga kauturan. Kay man, ginasimba naton si Jehova kag ginatinguhaan naton nga mailog ang iya mga kinaiya. Ginailog man naton ang halimbawa ni Jesus, nga ginhatag ang iya kabuhi bangod sang iya daku nga gugma sa aton. Pero kon kaisa, mahimo nabudlayan kita nga tumanon ang sugo nga maghigugmaanay. Binagbinagon naton ang isa ka halimbawa sa kongregasyon sa Filipos.

7. Ano ang aton matun-an sa laygay ni Pablo para kanday Eudias kag Sintique?

⁷ Makugi nga mga utod sanday Eudias kag Sintique nga nag-alagad upod kay apostol Pablo. Pero, bangod sang indi pag-intiendihanay, mahimo nga naglainay ang ila buot. Sa iya sulat sa kongregasyon kon sa diin nagaalagad ining duha ka utod, ginlaygayan ni Pablo sanday Eudias kag Sintique nga “mangin isa sing panghunahuna.” (Fil. 4:2, 3) Nahantop ni Pablo nga kinahanglan man niya laygayan ang tanan sa kongregasyon: “Padayon nga himua ninyo ang tanan nga butang nga wala sing pagkumod kag pagbinaisay.” (Fil. 2:14) Sigurado nga nakabulig gid ang prangka nga laygay ni Pablo sa duha ka matutom nga utod kag sa tanan nga  kauturan sa kongregasyon nga maglig-on ang ila gugma sa kada isa.

8. Ano ang nagapabudlay sa aton nga higugmaon ang aton mga kauturan, kag ano ang makabulig sa aton?

⁸ Kon kaisa, mabudlay para sa aton nga higugmaon ang aton mga kauturan bangod nagapokus kita sa nahimo nila nga mga sala, pareho sang natabo kanday Eudias kag Sintique. Tanan kita makahimo sang sala adlaw-adlaw. Kon pirme naton panumdumon ang mga sala sang iban, mabudlayan kita nga higugmaon sila. Halimbawa, kon nalipatan sang aton utod nga buligan kita sa pagpaninlo sang Kingdom Hall, basi mairitar kita sa iya. Kag kon panumdumon pa gid naton ang tanan niya nga sala, mas mairitar na gid kita kag basi amat-amat nga magbugnaw ang aton gugma sa iya. Kon matabo ini sa imo, pamalandungi ini: Kabalo si Jehova sang aton mga sala kag sang mga sala sang aton utod. Pero bisan makasasala kita, ginahigugma gihapon niya kita tanan. Gani, dapat naton ilugon ang gugma ni Jehova kag magpokus sa maayo nga mga kinaiya sang aton mga kauturan. Kon nagapanikasog kita nga higugmaon ang aton mga kauturan, mahiusa kita sing bug-os.—Fil. 2:1, 2.

9. Ano ang nalakip sa “mas importante nga mga butang” nga ginsiling ni Pablo sa iya sulat para sa mga taga-Filipos?

⁹ Gintuytuyan si Pablo sang balaan nga espiritu nga laygayan indi lang ang mga taga-Filipos kundi ang tanan nga Cristiano nga ‘pat-uron ang mas importante nga mga butang.’ (Fil. 1:10) Nalakip sa sining importante nga mga butang ang pagpakabalaan sang ngalan ni Jehova, ang katumanan sang iya mga katuyuan, kag ang paghidait kag paghiusa sang kongregasyon. (Mat. 6:9, 10; Juan 13:35) Kon importante ini nga mga butang sa aton kabuhi, ginapamatud-an naton nga ginahigugma naton si Jehova.

10. Paano kita mangin wala sing kasawayan?

¹⁰ Nagsiling man si Pablo nga dapat kita “mangin wala sing kasawayan.” Indi buot silingon nga dapat kita mangin perpekto. Imposible nga wala kita sing kasawayan pareho kay Jehova nga Dios. Pero mangin wala kita sing kasawayan sa panan-aw ni Jehova kon ginahimo naton ang aton bug-os nga masarangan nga maglig-on ang aton gugma kag pat-uron ang mas importante nga mga butang. Mapakita naton ang aton gugma kon ginatinguhaan gid naton nga indi mapasandad ang iban.

11. Ngaa dapat naton likawan nga mapasandad ang iban?

¹¹ Ang laygay nga likawan naton nga mapasandad ang iban isa ka serioso nga paandam. Paano naton mapasandad ang iban? Mapasandad naton ang iban paagi sa aton ginapili nga kalingawan, estilo sang bayo, ukon obra. Mahimo nga indi man malain ang aton ginahimo. Pero kon ang mga ginahimo naton makatublag sa konsiensia sang iban kag makapasandad sa ila, serioso gid ini nga butang. Si Jesus nagsiling nga mas maayo pa nga higtan kita sa liog sing mabug-at nga bato kag itagbong sa dagat sangsa mapasandad ang isa sang iya mga karnero!—Mat. 18:6.

12. Ano ang matun-an naton sa halimbawa nga ginpakita sang isa ka mag-asawa nga payunir?

¹² Binagbinaga kon paano gin-aplikar sang isa ka mag-asawa nga payunir ang paandam ni Jesus. Sa ila kongregasyon, may bag-o lang nabawtismuhan nga mag-asawa nga nagdaku sa estrikto nga mga pamilya. Ining bag-o lang nabawtismuhan nga mag-asawa nagapati nga indi dapat maglantaw sang sine ang mga Cristiano bisan pa indi man kuestyonable ang pelikula. Nasandad sila sang nahibal-an nila nga naglantaw sang sine ang mag-asawa nga payunir. Bangod sadto, wala na naglantaw sang sine ang mag-asawa nga payunir asta nga nahanas sang bag-o nga mga utod ang ila konsiensia kag nahantop  nila kon ano ang maayo kag malain. (Heb. 5:14) Ginpakita sang mag-asawa nga payunir nga ginahigugma nila ang ila bag-o nga mga utod indi lang sa pulong kundi sa buhat.—Roma 14:19-21; 1 Juan 3:18.

13. Paano naton maimpluwensiahan ang iban nga makahimo sing sala?

¹³ Mapasandad man naton ang iban kon impluwensiahan naton sila nga makahimo sing sala. Paano ini matabo? Hunahunaa ini nga halimbawa. Pagkatapos sang madugay kag grabe nga pagpanikasog, nauntat sang isa nga nagatuon sa Biblia ang iya bisyo sa pag-inom. Namat-od sia nga indi na gid sia mag-inom sang makahulubog nga ilimnon. Madamo ang iya ginhimo nga mga pagbag-o kag nabawtismuhan sia. Sang ulihi, may isa ka utod nga nag-imbitar sa iya sa isa ka sinalusalo kag ginhatagan sia sang ilimnon. Nagsiling ang utod: “Saksi ka na subong; buligan ka na sang espiritu ni Jehova nga mapunggan ang imo kaugalingon. Masarangan mo na nga indi magpasobra inom.” Makapasubo gid ang mangin resulta kon mamati ang bag-o nga utod sa sining indi husto nga pagpangatarungan!

14. Paano makabulig ang aton Cristiano nga mga miting nga maaplikar naton ang laygay sa Filipos 1:10?

¹⁴ Mabuligan kita sang aton Cristiano nga mga miting nga maaplikar sa madamo nga paagi ang laygay sa Filipos 1:10. Una, paagi sa mga ginabinagbinag naton sa aton mga miting, mahibaluan naton kon ano ang pinakaimportante para kay Jehova. Ikaduha, ginatudluan kita sa mga miting kon paano naton maaplikar ang aton ginatun-an para mangin wala kita sing kasawayan. Kag ikatlo, mapahulag kita nga  ipakita ang ‘gugma kag maayong mga buhat.’ (Heb. 10:24, 25) Kon ginapalig-on kita pirme sang aton mga kauturan, mas higugmaon pa gid naton sila kag ang aton Dios. Gani kon ginahigugma naton ang Dios kag ang aton mga kauturan sa bug-os naton nga tagipusuon, likawan gid naton nga mapasandad ang aton mga kauturan.

15. Ano ang buot silingon sang ‘mapuno sing matarong nga bunga’?

¹⁵ Hanuot nga ginpangamuyo ni Pablo nga ‘mapuno sing matarong nga bunga’ ang mga taga-Filipos. (Fil. 1:11) Sigurado nga nalakip sa sining “matarong nga bunga” ang ila gugma kay Jehova kag sa iya katawhan. Nalakip man sa sini ang ila pagpakig-istorya sa iban parte sa ila pagtuo kay Jesus kag sa ila makalilipay nga paglaum. Sa Filipos 2:15, nagsiling naman si Pablo nga ‘nagasiga sila subong mga suga sa kalibutan.’ Ginapahanumdom kita sini sang gintawag ni Jesus ang iya mga disipulo nga “kapawa sang kalibutan.” (Mat. 5:14-16) Ginsugo man niya ang iya mga sumulunod nga ‘tudluan ang mga tawo agod mangin disipulo niya,’ kag nagsiling sia nga ‘mangin saksi sila tubtob sa pinakamalayo nga bahin sang duta.’ (Mat. 28:18-20; Binu. 1:8) Nagapatubas kita sing “matarong nga bunga” kon aktibo kita nga nagapakigbahin sa sining pinakaimportante nga hilikuton.

16. Paano ginpakita sang Filipos 1:12-14 nga makasiga kita subong mga suga bisan sa mabudlay nga mga kahimtangan? (Tan-awa ang piktyur sa kober.)

¹⁶ Ano man ang aton kahimtangan, makasiga kita subong mga suga. Kon kaisa, ang mga kahimtangan nga makapugong sa aton sa pagbantala mahimo mangin kahigayunan nga makabantala kita. Halimbawa, napriso si apostol Pablo sa isa ka balay sa Roma sang nagsulat sia sa mga taga-Filipos. Pero wala sia nag-untat sa pagbantala sa mga guardia nga nagabantay  sa iya kag sa mga nagabisita sa iya. Makugi nga nagbantala si Pablo bisan ano ang iya kahimtangan, kag nagpalig-on ini sa mga kauturan nga magpakita sing kaisog sa “pagbantala sang pulong sang Dios nga wala sing kahadlok.”—Basaha ang Filipos 1:12-14; 4:22.

17. Paano ang iban naton nga mga kauturan nakapadayon sa pagbantala bisan sa mabudlay nga mga kahimtangan?

¹⁷ Madamo sa aton mga kauturan ang nagapakita sing kaisog pareho kay Pablo. Nagaistar sila sa mga pungsod kon sa diin indi sila makabantala sa publiko nga mga lugar ukon sa mga balay, gani nagabantala sila sa iban nga mga paagi. (Mat. 10:16-20) Sa isa sini nga mga pungsod, ginpanugda sang isa ka manugtatap sang sirkito nga himuon sang kada manugbantala nga “teritoryo” ang iya mga paryente, kaingod, kaeskwela, katrabaho, kag kakilala. Sa sulod sang duha ka tuig, madasig nga nagdamo ang mga kongregasyon sa sini nga sirkito. Mahimo nga wala man ginadumilian ang aton pagbantala sa aton pungsod. Pero may matun-an kita sa halimbawa sang aton mga kauturan nga kabalo gid mangita sing pamaagi: Kon himuon naton ang aton bug-os nga masarangan nga makabantala sa iban, sigurado nga hatagan kita ni Jehova sang kusog nga kinahanglan naton sa pagbantala bisan may mga kabudlayan.—Fil. 2:13.

18. Ano ang dapat naton himuon?

¹⁸ Subong na ang tion nga mangin determinado kita nga iaplikar ang laygay ni Pablo sa iya sulat para sa mga taga-Filipos. Dapat pat-uron naton ang mas importante nga mga butang, mangin wala kita sing kasawayan, likawan naton nga mapasandad ang iban, kag magpatubas kita sing matarong nga bunga. Kon himuon naton ini, magabugana kita sa gugma kag mapadunggan naton ang aton mahigugmaon nga Amay, nga si Jehova.